ក្នុងព្រឹត្តិការណ៍វាយបំបែក កាលពីព្រឹកថ្ងៃទី១៣ ខែឧសភា ការរៀបចំពិធិបុណ្យ វិសាខបូជា របស់ក្រុមការងារ​ដើម្បី​សន្តិភាព ត្រូវបានក្រុមយុវជន សិស្ស និស្សិត និងមន្រ្តីអង្គការសង្គមស៊ីវិលមួយចំនួនចាត់ទុក ការដេញ វាយ បំបែក របស់ក្រុមសន្តិសុខទាំងនោះ (វា) ជាការបង្កឲ្យមានភាព អសន្តិសុខទៅវិញទេ។ ពីក្នុងចំណោមនោះ សកម្មជន​មួយ​ចំនួន បានលើកឡើងពីអសមត្ថភាពរបស់រដ្ឋាភិបាល ដែលបានបង្កើតក្រុមសន្តិសុខនេះឡើង និងបានទាមទារឲ្យ លោកនាយករដ្ឋមន្ត្រី ហ៊ុន សែន ចុះចេញពីតំណែងនោះទៀត។

ការជួបជុំរបស់ក្រុមពលរដ្ឋ ក្នុងឱកាសបុណ្យវិសាខបូជា ក្រោមការឃ្លាំមើលរបស់ក្រុមសន្ដិសុខបិទមុខ នៅថ្ងៃទី១៣ ខែឧសភា ឆ្នាំ២០១៤។ (រូបថត ហ្វេសប៊ុក)

ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី១៣ ឧសភា ២០១៤
-------------------------------------

សេរីភាព - ក្នុងកិច្ចសម្ភាសជាមួយអ្នកសារព័ត៌មាន ក្រោយពីមានការដេញ វាយ បំបែក នៃក្រុមសន្តិសុខខណ្ឌ ក៏ដូច​ជាក្រុមបង្ក្រាបបាតុកម្មដែលមានដំបង ដំបងឆក់ និងខែលនោះ អ្នកស្រី សិទ្ធិ ប្រជា (ឈ្មោះដែលទស្សនាវដ្តីដាក់ឲ្យ) តំណាងខាងព្រះពុទ្ធសាសនា បានលើកឡើងថា ក្រុមការងារអ្នកស្រី មិនមែនជាក្រុមបាតុកម្ម ឬកូដកម្មអ្វីឡើយ។ ពួក​គាត់មកជួបជុំគ្នា ដើម្បីរៀបចំពីធីបុណ្យ បែបព្រះពុទ្ធសាសនា ទៅតាមទំនាបទំលាប់ ប្រពៃណី និងធ្វើនៅទី​គោរព​សក្ការៈបូជាដូចជារមណីដ្ឋានវត្តភ្នំ និងព្រះអង្គដងកើប៉ុណ្ណោះ។

អ្នកស្រីបានទំលាក់បន្ទុកនៃការទទួលខុសត្រូវនេះ ទៅលើរដ្ឋាភិបាលដែលគ្មានសមត្ថភាព និងការមិនទទួលខុសត្រូវ ដោយបានបង្កើតក្រុមទាំងនេះឡើង ដើម្បីដេញ វាយ និងចាប់យកសម្ភារៈរបស់គេដូចជា«ចោប្លន់»។ អ្នកស្រីបាន​ថ្លែងទៀតថា៖ «ប្លន់ទាំងរស់។ (...) មិនមែនជាក្រុមសន្តិសុខទេ ជាក្រុមអសន្តិសុខ។ (...) បាវចនាដែលសរសេរថា “ជាតិ សាសនា ព្រះមហាក្សត្រ” គ្មានប្រយោជន៍នោះទេ ព្រោះគ្មានអ្នកគោរពទេ។ ក្រុមអសន្តិសុខទាំងនោះ (វា) មិន​គោរពទេ។ អញ្ចឹង គួសម្តេច (ហ៊ុន សែន) ចុះចេញពីតំណែងទៅ។»

«ថ្ងៃបុណ្យ។ យើងមិនមែនធ្វើនយោបាយទេ យើងធ្វើបុណ្យ។ ប្រជាជនគ្រប់ជាតិសាសន៍ ដែលមានមេត្តាធម៌ គេធ្វើ​គ្រប់គ្នា ព្រោះវាមិនមែនជាបុណ្យសម្រាប់តែខ្មែរមួយទេ ជាបុណ្យចំរុះជាតិសាសន៍។ (...) ចាប់ពីក្រោយ​បោះឆ្នោត​មាន​ការ វាយដុំ ច្រំធាក់ ចាប់ចង បាញ់សម្លាប់ពាសវាលពាសកាល នៅស្រុកខ្មែរដូចសមរភូមិចឹង។ យើងគិតថា ធម៌ព្រះ ធម៌ព្រះពុទ្ធ អាចមានការជ្រាបវចូលក្នុងខួរក្បាល ក្រុមអសន្តិសុខទាំងនោះ។ ហេតុដូច្នេះហើយ បានជាយើងខំធ្វើ។ (...) បើពួកគេមិនបានធ្វើ មិនចូលរួមធ្វើទេ សុំតែកុំមករំខានទៅបានហើយ។ (...) យើងចង់ឲ្យប្រទេស​ខ្មែរមានសុខ​សន្តិភាព។» នេះជាការបញ្ជាក់បន្ថែមរបស់អ្នកស្រី សិទ្ធិ ប្រជា។

លោក លឹម វន្នី សកម្មជនមួយរូបរបស់ក្រុមការងារបណ្តាញសម្រាប់យុត្តិធម៌ និងសន្តិភាព និងជាអ្នកតំណាងខាង​គ្រឹស្តិ​សាសនា ដែល​ចូលរួមក្នុងការជួបជុំនោះ ក៏បានរងនូវការដេញ វាយ និងបំបែកដោយក្រុមសន្តិសុខ​ខណ្ឌ​ដូនពេញ​ទាំងនោះដែរ។ លោកបាន​បង្ហាញនូវការខកចិត្ត ក្នុងនាមព្រះយេស៊ូគ្រឹះ ចំពោះសកម្មភាពនៃការបំបែក​ដោយក្រុមអាជ្ញាធររដ្ឋាភិបាលនេះ។ លោក​បានលើកឡើងយ៉ាងដូច្នេះថា «ប្រជាពលរដ្ឋខ្មែរគ្រប់រូប មានសិទ្ធិ និង​សេរីភាពពេញលេញក្នុងការសម្តែងមតិ ស្របតាមរដ្ឋធម្មនុញ្ញដែលមានចែង។»

អ្នកស្រីសិទ្ធិ ប្រជា ក៏បានសង្កត់ធ្ងន់ដែរថា ផ្នែកការអនុវត្តជាក់ស្តែង ប្រទេសកម្ពុជាសព្វថ្ងៃគ្មានលិទ្ធិប្រជាធិបតេយ្យ​ទេ ព្រោះលិទ្ធិប្រជាធិបតេយ្យនៅកម្ពុជា មានតែលើក្រដាសប៉ុណ្ណោះ។ អ្នកស្រីបានថ្លែងថា បើមានលិទ្ធ​ប្រជាធិបតេយ្យ​នោះ មិនមែនប្រជាពលរដ្ឋខ្មែរ ធ្វើការបញ្ចេញមតិមិនបាន បើសូម្បីតែក្នុងកម្មវិធីបុណ្យសាសនាក៏ធ្វើមិនបាន​នោះ​ទេ។ អ្នកស្រីបន្តទៀតថា៖ «ទោះបីនាយករដ្ឋមន្រ្តី(ហ៊ុន សែន) ខំប្រកាសថាជាប្រទេសលិទ្ធិប្រជាធិបតេយ្យក៏ដោយ តែបើ​ឲ្យកូនចៅ (របស់លោក ហ៊ុន សែន ធ្វើនូវអំពើ) គ្មានលិទ្ធិប្រជាធិបតេយ្យបែបនេះ (...) ព្រះសង្ឃ ឬរាស្រ្តសាមញ្ញមិនឲ្យ​ធ្វើបុណ្យដែរ។ បាវចនារបស់ជាតិ ដាក់មកវាគ្មានប្រយោជន៍។

ក្នុងនាមជាយុវជន កញ្ញា ពៅ ចាន់ដាវី ដែលបានចូលរួមក្នុងកម្មវិធីនោះ ហើយក៏ត្រូវបានដេញវាយ និងបំបែកពី​សំណាក់​ក្រុមសន្តិសុខខណ្ឌ បានឯកភាពថា សម្រាប់ប្រទេសកម្ពុជា មិនមានសិទ្ធិ សេរីភាព និងលិទ្ធិប្រជាធិបតេយ្យ​ពិតប្រាកដទេ។ ជាងនេះកញ្ញា មានការសោកស្តាយយ៉ាងខ្លាំង ដែលអាជ្ញាធរ ឬរដ្ឋាភិបាលកម្ពុជា មិនបានគោរព​ច្បាប់​ក្នុងនាមជាថ្នាក់ដឹកនាំយ៉ាងដូច្នេះសោះ។ តែទោះយ៉ាងនេះក្តី កញ្ញានៅតែប្រកាន់ជំហរ តស៊ូមតិធ្វើយ៉ាងណាទាមទារ និងជំរុញឲ្យមានការគោរពច្បាប់ ដោយក្រុមអាជ្ញាធរទាំងនោះ ឬរដ្ឋាភិបាល។ «ក្នុងនាមជាយុវជន បើសិនជាយើងមិន​នាំគ្នាធ្វើទេ នោះស្ថានភាពស្រុកទេសយើង កាន់តែយ៉ាប់យឺនជាងនេះហើយ។ (...) យើងមិនមែនប្រឆាំងទេ តែ​ទាម​ទាឲ្យរដ្ឋាភិបាលត្រូវតែគោរពច្បាប់ ដោយខ្លួនឯងជាមុនសិន ដើម្បីសន្តិភាព និងការរីកចំរើនរបស់ប្រទេសជាតិ។ (...) យើងខកចិត្តចំពោះពួកគាត់ ដែលមិនបានធ្វើអ្វីទាល់តែសោះដើម្បីសន្តិភាព គាត់បែរជាហាមឃាត់អ្នក​ដែលធ្វើដើម្បី​សន្តិភាពទៅវិញ។»

ជាមួយគ្នានេះ អ្នកស្រី សិទ្ធិ ប្រជា សូមផ្តាំផ្ញើរទៅប្រមុខរដ្ឋាភិបាល បើពិតជាមានការគោរពច្បាប់មែននោះ ឲ្យក្រឡេក​មើលកូនចៅខ្លួនឯងផង។ អ្នកស្រីបានដាក់ជាចម្ងល់ថា ក្រុមសន្តិសុខទាំងនោះ មិនត្រូវបានទទួលស្គាល់ដោយ​ក្រសួង​មហាផ្ទៃឡើយ ចុះហេតុអ្វីបានជាពួកគេមានសិទ្ធិ មកវាយដំ ច្រំធាក់ប្រជាពលរដ្ឋខ្មែរ។ «សូមបើកភ្នែកមើលផង កុំងងឹត​ពេក!»

លោក អំ សំអាត ប្រធានផ្នែកបច្ចេកទេសស៊ើបអង្កេត របស់អង្គការការពារសិទ្ធិមនុស្សលីកាដូ បានបង្ហាញនូវ​ទស្សនៈ​ផ្ទាល់ថា ក្នុងព្រឹត្តិការណនៃការហាមឃាត់ មិនឲ្យមានការជួបជុំនៅទីសាធារណៈនេះ ព្រោះតែស្ថេរភាពនយោបាយ​នៅតានតឹង។ ដូច្នេះ គណបក្សនយោបាយ ពិសេសគណបក្សកាន់អំណាច ត្រូវតែគិតពីស្ថេរភាពនៃ«អំណាចរបស់​បក្ស» ជៀសជាងគិតពី«ឧត្តមប្រយោជន៍ជាតិ និងឧត្តមប្រយោជន៍ប្រជាពលរដ្ឋ។ លោកបានបញ្ជាក់យ៉ាងដូច្នេះថា «បើកាលណាថ្នាក់ដឹកនាំគិតពីឧត្តមប្រយោជន៍"បក្ស" ធំជាងឧត្តប្រយោជន៍ជាតិ និងប្រជាពលរដ្ឋ វាមានការប៉ះពាល់​យ៉ាងធ្ងន់ធ្ងរដល់សិទ្ធិប្រជាពលរដ្ឋ និងលិទ្ធិប្រជាធិបតេយ្យកាន់តែធ្លាក់ចុះយ៉ាងគំហុក។»

យ៉ាងណាក៏មកទល់នឹងល្ងាចថ្ងៃទី១៣ ខែឧសភានេះ ទស្សនាដ្តីមនោរម្យ.អាងហ្វូ នៅមិនមានប្រតិកម្មតបណាមួយ ពីខាងមន្រ្តីរាជរដ្ឋាភិបាល នៅឡើយទេ ចំពោះរាល់ការចោទប្រកាន់ខាងលើនេះ៕