ប្រតិកម្មរបស់សហគមន៍អន្តរជាតិ បានធ្លាក់ចុះមកជាបន្តបន្ទាប់។ បន្ទាប់ពីប្រទេសធំៗ មានដូចជាសហរដ្ឋអាមេរិក និងបារាំងជាដើម បានថ្លែងប្រតិកម្មជាបន្តបន្ទាប់ មិនគាំទ្ររដ្ឋប្រហារយោធានៅថៃនេះមក អគ្គលេខាធិការរបស់​អង្គការសហប្រជាជាតិ លោក បាន គី-មូន (Ban Ki-moon) នៅក្នុងសេចក្ដីប្រកាសព័ត៌មានមួយ បានសម្ដែងការ​ខ្វាយខ្វល់នៅចំពោះព្រឹត្តិការណ៍នយោបាយ នៅក្នុងប្រទេសអាស៊ីអាគ្នេយ៍មួយនេះ។

កងទ័ពថៃយាមកាមនៅតាមដងផ្លូវ ជាមួយនឹងរបងបន្លាលួស។ (រូបថត AFP)

នយោបាយថៃ - អគ្គលេខាធិការរបស់អង្គការសហប្រជាជាតិ លោក បាន គី-មូន  បានសម្ដែងការ​ព្រួយបារម្ភរបស់​លោក នៅចំពោះ​រដ្ឋប្រហារយោធា នៅប្រទេសថៃ និងទាមទារឲ្យមានរដ្ឋាភិបាលស៊ីវិល និងតាមបែបប្រជាធិបតេយ្យ​ឡើងវិញ។ នេះជាការថ្លែងឲ្យដឹងរបស់លោក ស្ទេហ្វាន ដួចារិក (Stéphane Dujarric) អ្នកនាំពាក្យរបស់លោក​អគ្គលេខាធិការ។

អ្នកនាំពាក្យរូបនោះ បានបន្តទៀតថា «លោកអគ្គលេខាធិការ ស្នើសុំយ៉ាងម៉ឺងម៉ាត់ ឲ្យគ្រប់ភាគីទាំងអស់ ធ្វើការជា​មួយគ្នា ក្នុងន័យស្ថាបនា ដើម្បីបញ្ឈៀសឲ្យបាននូវអំពើហិង្សា និងត្រូវគោរពសិទ្ធិមនុស្ស»។

កងទ័ពថៃបានធ្វើរដ្ឋប្រហារ កាលពីថ្ងៃទី២២ ខែឧសភា វេលាម៉ោង៤កន្លះរសៀល រំលំរដ្ឋាភិបាលចាំផ្ទះរបស់ថៃ ហើយបានព្យួរទុកជាបណ្ដោះអាសន្ន នូវសិទ្ធិសេរីភាពជាមូលដ្ឋានជាច្រើន ក្នុងនោះមានការហាមប្រាមរាល់ការ​ជួបជុំនយោបាយលើសពី៥នាក់ បិទចរាចរណ៍ចាប់ពីម៉ោង១០យប់រហូតដល់ម៉ោង៥ភ្លឺ ជាដើម។

ដោយឡែកសហរដ្ឋអាមេរិក តាមរយៈរដ្ឋមន្ត្រីក្រសួងការបរទេសរបស់ខ្លួន លោក ចន ឃេរី (John Kerry) បាន​បញ្ជាក់នៅក្នុងសេចក្ដីប្រកាសព័ត៌មានមួយថា «គ្មានអំណះអំណាងអ្វី មកធ្វើឲ្យមានជារដ្ឋប្រហារ​យោធាបែបនេះ​ឡើយ»។ លោក ឃេរី បានអំពាវនាវឲ្យដាក់ឲ្យមានវិញភ្លាមជាបន្ទាន់ នូវរដ្ឋាភិបាលស៊ីវិលមួយ និងលិទ្ធិ​ប្រជា​ធិបតេយ្យ។ រដ្ឋមន្ត្រីការបរទេសអាមេរិក បានដាក់ការត្រួតពិនិត្យ ទៅលើហេតុការណ៍អវិជ្ជមានណាមួយ ដែលអាច​នឹងធ្វើល្អក់កករ នូវសម្ព័នភាពរវាងទីក្រុងវ៉ាស៊ីនតោន និងទីក្រុងបាងកក។

រីឯអ្នកនាំពាក្យរបស់មន្ទីរប៉ង់តាហ្គោន (ក្រសួងការពារជាតិសហរដ្ឋអាមេរិក) វិញ បានថ្លែងឲ្យដឹង នៅ​ប៉ុន្មានម៉ោង​ក្រោយរដ្ឋប្រហារយោធានោះថា៖ «សហរដ្ឋអាមេរិក ធ្វើការពិនិត្យឡើងវិញ នូវកិច្ចសហ​ប្រតិបត្តិការ​យោធាជាមួយ​នឹងទីក្រុងបាងកក ដើម្បីសម្រេចិត្តថា តើនឹងត្រូវធ្វើការផ្អាកជាបណ្ដោះអសន្នសិន ឬ​យ៉ាង​ណា បន្ទាប់​ពីមានរដ្ឋ​ប្រហារ​យោធាមួយនៅក្នុងប្រទេសថៃ»៕