ការភ្ញាក់ផ្អើលបានកើតឡើងហើយ។ កាតក្រហមសម្រាប់បណ្ដេញកីឡាករ ឲ្យចេញពីការប្រកួត ត្រូវបានចែកទៅឲ្យ​កីឡាករអ៊ុយរឺហ្គាយ មុនគេ នៅពេលដែលក្រុមនេះ បានជួបទាត់ជាមួយនឹងក្រុមបាល់ទាត់ កូស្ដារីកា នាថ្ងៃដំបូង​នៃវគ្គ​ប្រកួតជម្រុះ។ ក្រុមបាល់ទាត់អ៊ុយរឺហ្គាយ ដែលល្បី​គួសមថា ជាក្រុមបាល់ទាត់ពូកែ (ធ្លាប់ឡើងដល់ពាក់​កណ្ដាល​ផ្ដាច់​ព្រ័ត្រ ឆ្នាំ២០១០) មានកីឡាករចំណានៗជាច្រើននោះ បែរជាត្រូវជួបនឹងភាពបរាជ័យយ៉ាងជូរចត់ (១-៣) ទល់នឹង​ក្រុម​កូស្ដារីកា ដែលទើបនឹងកើតនេះទៅវិញ។

កីឡាករ កូស្តារីកា យកបាល់មកដាក់ក្នុងអាវ ដូចពរពោះចង់កើតកូន។ (រូបថត fifa)

បាល់ទាត់ពិភពពលោក - ជាការភ្ញាក់ផ្អើលដ៏ខ្លាំងមួយ ដែលក្រុមបាល់ទាត់កូស្ដារីកា ដែលមិនមានឈ្មោះទាល់​តែ​សោះ ក្នុងពិភពបាល់ទាត់ តែបែជាបានបំបាក់យ៉ាងចាស់ដៃ ក្រុមអ៊ុយរឺហ្គាយ ដែលធ្លាប់ឡើងដល់ពាក់កណ្ដាល​ផ្ដាច់​ព្រ័ត្រ កាលពីបាល់ទាត់ពិភពលោកឆ្នាំ២០១០នោះ។

ប្រហាក់ប្រហែលនឹងក្រុមអេស្ប៉ាញ កាលពីយប់ថ្ងៃសុក្រដែរ ក្រុមអ៊ុយរឺហ្គាយ បានចាប់ផ្ដើមការប្រកួតរបស់ខ្លួន ដោយ​មិនមានការពិបាកអ្វីទាំងអស់ ហើយថែមទាំងបានទាត់បញ្ចូលទីរបស់ កូស្ដារីកា បានមួយគ្រាប់មុនទៀត នៅនាទី២៤ ដោយកីឡាករអ៊ុយរឺហ្គាយ អេឌីសុន កាវ៉ានី (Edison Cavani) នោះផង។

ប៉ុន្តែនៅពាក់កណ្ដាលម៉ោងទីពីរ ការប្រកួតចាប់ផ្ដើមមានបញ្ហា សម្រាប់ក្រុមអ៊ុយរឺហ្គាយ តែផ្ទុយទៅវិញ ក្រុមកូស្ដារីកា ដូចជាបានជួបនឹងសុភមង្គលមួយយ៉ាងត្រចះត្រចង់។ ក្រុមបាល់ទាត់ មកពីប្រទេសដែលមិនសូវស្គាល់មួយនេះ បាន​បង្កើតការវាយបកច្រើនដង ទៅលើក្រុមអ៊ុយរឺហ្គាយ ដែលនៅហាក់ដូចជានៅស៊ាំញ៉ាំ មិនទាន់ច្បាស់នៅឡើយ។

បន្ទាប់ពីរកបានមួយគ្រាប់ ធ្វើឲ្យក្រុមខ្លួនបានស្មើនៅនាទី៥៦ ជាមួយក្រុមបាល់ទាត់អ៊ុយរឺហ្គាយ ដ៏ល្បីឈ្មោះរួចហើយ នៅបីនាទីក្រោយមក ក្រុមកូស្ដារីកា បានយកឱកាសបាល់ពិន័យទាត់ពីចំងាយមួយ ដើម្បីដាក់បញ្ចូលទី​បានមួយគ្រាប់​ទៀត។

បន្ទាប់ពីបានទទួលមួយគ្រាប់ទៀត (៣-១) ពីក្រុមកូស្ដារីកា នៅពេលជិតបញ្ចប់ម៉ោងប្រកួតទៅហើយនោះ ស្រាប់តែ​ក្រុម​អ៊ុយរឺហ្គាយ ទទួលរងនូវទម្ងន់ថ្មបាក់មួយទៀត ដែលខ្មែរតែងនិយាយថា «ក្រហើយកូនឈឺទៀត»។ នោះគឺ អាជ្ញា​កណ្ដាលបានដកកាតក្រហម បណ្ដេញកីឡាករ ម៉ាស៊ី ពេរ៉ីរ៉ា​ (Maxi Pereira) ចេញពីការប្រកួត បន្ទាប់ពីកីឡាករនេះ បានទាត់មួយទំហឹង ទៅលើក្មងជើងកីឡាករខ្សែប្រយុទ្ធមួយរូប របស់ក្រុមកូស្ដារីកា។

ឆ្លងចេញពីលទ្ធផលនេះ ក្រុមអ៊ុយរឺហ្គាយ អាចមានស្ថានភាពពិបាក និងមិនមានសំណាងប៉ុន្មានទេ ព្រោះនៅក្នុងពូល C នៅមានក្រុមអ៊ីតាលី និងក្រុមអង់គ្លេសទៀត ដែលសុទ្ធតែជាក្រុម«មហាយក្ស»ខាងបាល់ទាត់។ យ៉ាងណាក៏ដោយ គេមិនត្រូវមើលងាយបាល់ទាត់ ដែលជា«បាល់មូល»នោះឡើយ។ ដូចយ៉ាងក្រុមកូស្ដារីកា ដែលគេតែងចាត់ទុកថា ជា​ក្រុមដែលអន់បំផុតនេះ តែនៅពេលនេះ គេបានភ្លឺភ្នែកជាងមុន ថាមិនត្រូវមើលក្រុមបាល់ទាត់ណាមួយ តែ​សម្បក​ក្រៅ​នោះឡើយ៕