បាល់ទាត់ពិភពលោក - សម្រាប់ការប្រកួតនៅលើកក្រោយមួយទៀត រវាងក្រុមអេស្ប៉ាញ ជាមួយនឹងក្រុម អូស្ត្រាលី ដែលទើបនឹងហាលអាវដូចគ្នា ក្រោយការប្រកួតចាញ់ក្រុមហូឡង់នោះ គ្រាន់តែជាការប្រកួត «បង្គ្រប់​កិច្ច» ប៉ុណ្ណោះ។ តែនៅចំពោះបរាជ័យផ្ទួនៗរបស់ខ្លួននេះ គេមិនដឹងថាតើអេស្ប៉ាញ អាចនឹង​ស្វែង​រក​មុខ​មាត់​របស់​ខ្លួនត្រឡប់ទៅផ្ទះ តាមរយៈការប្រកួតចុងក្រោយបានខ្លះ ឬយ៉ាងណាផង។ ខាងក្រោមនេះ ជាប្រតិកម្ម​របស់សារព័ត៌មានអេស្ប៉ាញ ដែលចេញផ្សាយនូវអត្ថបទរបស់ខ្លួនភ្លាមៗ ក្រោយហេតុការណ៍​ដ៏​អាក្រក់ កើតឡើងចំពោះអតីតជើងឯកពិភពលោក ឆ្នាំ២០១០ និងជើងឯកអ៊ឺរ៉ុបពីរដងជាប់គ្នា (ឆ្នាំ២០០៨ និង​ឆ្នាំ២០១២)។

«បរាជ័យជើងឯកពិភពលោក» ជាចំណងជើងដ៏ធំៗ របស់សារព័ត៌មានចេញប្រចាំថ្ងៃ El Mundo ដែលដាក់​នៅ​បន្ទាប់​ពីព័ត៌មានសំខាន់មួយទៀត ដែលសំខាន់ជាង៖ ការឡើងស្នងរាជ្យរបស់ រាជបុត្ររបស់អតីតព្រះរាជា ជ័ន កាឡូស នៅ​ពាក់កណ្ដាលអាធ្រាត ថ្ងៃទី១៨ដដែលនេះ។

ចំពោះការសែតកីឡាមួយទៀត ឈ្មោះ Marca បានដាក់ចំណងជើងធំៗ ខ្លាំងៗថា «បែកបាក់ខ្ចេច!» ដែល​បាន​ពន្យល់​នៅក្នុងអត្ថបទរបស់ខ្លួន ពី«ការលាយ៉ាងអាណោចអាធម របស់ក្រុមអតីតជើងឯក​ពិភពលោក​ឆ្នាំ​២០១០» ចេញពីការ​ប្រកួតពិភពលោកនៅឆ្នាំនេះ។ «ជាថ្មីម្ដងទៀត អេស្ប៉ាញ បានធ្លាក់ខ្លួន​ទៅក្នុងរូបភាព​ដ៏​អាក្រក់​មួយ បន្ទាប់ពីត្រូវបាន​ក្រុមបាល់ទាត់ ឈីលី គ្របសង្កត់រហូតសឹងតែមិនបាច់ប្រឹង។ គ្រាប់ទាំងពីរ​របស់ ក្រុមបាល់ទាត់ ឈីលី តាំងពីពាក់​កណ្ដាលម៉ោងដំបូងនោះ បានបង្ហាញពីអនុភាពដ៏ខ្លាំងក្លា នៃសន្ទុះ​បាល់​ទាត់​យុវជន​ជំនាន់ក្រោយ។»។

រៀបរាប់ស្រដៀងគ្នានេះដែរ សារព័ត៌មានចេញប្រចាំថ្ងៃ AS បានសរសេរនៅពីក្រោមចំណងជើង «មួយដំបង​នៅ​ម៉ារ៉ាកាណា និងលាហើយការប្រកួតពិភពលោក» ដាក់ថា៖ «អេស្ប៉ាញ នៅតែគ្មានប្រតិកម្មអ្វីសោះ បន្ទាប់​ពី​បានចាញ់​ហូឡង់ពីសប្ដាហ៍មុនរួច ហើយបានក្លាយជាក្រុមបាល់ទាត់ដំបូងគេ ដែលត្រូវបានជម្រុះចេញ​ជា​ស្ថាពរ។ (...) ត្រូវតែ​មានការ​ជួបជជែក​គ្នាឡើងវិញ សម្រាប់រដូវកាលថ្មី។»

«អេស្ប៉ាញ ដើរចេញពីការប្រកួតនៅប្រេស៊ីលឆ្នាំ២០១៤ បន្ទាប់ពីបានដួលនៅចំពោះក្រុមបាល់ទាត់ ឈីលី» នេះ​ជា​ការ​លើកឡើងបែបថ្នមសម្លេងបន្ដិត របស់ការសែត El Pais។ «ក្រុមអេស្ប៉ាញ បានបាត់បង់ឱកាស ដែលខ្លួនធ្លាប់មាន នៅក្នុងការប្រកួតពិភពលោកបែបនេះ បន្ទាប់ពីបានធ្លាក់ខ្លួនចាញ់ ក្រុមបាល់ទាត់ ឈីលី ដែលមានកម្លាំងខ្លាំងជាង»។ ការសែតបានសរសេរទៀតថា៖ «បរាជ័យរបស់ក្រុមអេស្ប៉ាញ បានចាប់​ផ្ដើម​ដោយ​ការសម្លាប់ ដោយមិនរើសមុខ របស់​ក្រុមហូឡង់ ក្នុងពិន្ទុ៥-១»៕