ដើម្បីលើកទឹកចិត្ត និងជំរុញអ្នកវិនិយោគទុនអាមេរិក ឲ្យមកដាក់ទុនវិនិយោគនៅកម្ពុជា បានកាន់តែច្រើន លោក ស៊ុន ចាន់ថុល រដ្ឋមន្រ្តីក្រសួងពាណិជ្ជកម្ពុជា បានធានាអះអាង​ចំពោះមុខអ្នកវិនិយោគទុន ទាំងនោះថា ក្រសួង​ពាណិជ្ជកម្មកម្ពុជា នឹងធ្វើការកែទម្រង់ស៊ីជម្រៅ ដោយផ្តោតសំខាន់ការលុបបំបាត់អំពើពុករលួយ និងលើកកំពស់​អភិបាលកិច្ចល្អរបស់ក្រសួង។

លោក ស៊ុន ចាន់ថុល រដ្ឋមន្រ្តីក្រសួងពាណិជ្ជកម្ពុជា។ (រូបថត wikipedia)

ពាណិជ្ជកម្ម - រដ្ឋមន្រ្តីក្រសួងពាណិជ្ជកម្ពុជា លោក ស៊ុន ចាន់ថុល បានពន្យល់ប្រាប់ក្រុមហ៊ុនធំៗ យ៉ាងតិច​ចំនួន​៥០របស់សហរដ្ឋអាមេរិកថា រដ្ឋាភិបាលកម្ពុជា ក៏ដូចជាក្រសួងពាណិជ្ជកម្មកម្ពុជា កំពុងតែធ្វើការកំណែទម្រង់​ពិសេសមួយ ដើម្បីបង្កលក្ខណៈងាយស្រួសដល់អ្នកវិនិយោគទុន មកបណ្តាក់ទុនវិនិយោគនៅកម្ពុជា តាមរយៈការ​លុបបំបាត់អំពើពុករលួយ លើកកំពស់អភិបាលកិច្ចល្អ ក្នុងវិស័យពាក់ព័ន្ធ និងការធានាសុវត្ថិភាពដល់ក្រុមហ៊ុន​បរទេស ជាដើម។

ក្នុងកិច្ចសម្ភាសជាមួយវិទ្យុសំឡេងសហរដ្ឋអាមេរិក ផ្សាយជាខេមរភាសា ក្នុងអំឡុងពេលដំណើរ​ទស្សនកិច្ច​ទៅ​សហរដ្ឋអាមេរិក លោក ស៊ុន ចាន់ថុល បានថ្លែងថា វិស័យដែលប្រទេសកម្ពុជាចង់ឲ្យក្រុមហ៊ុនអាមេរិក មក​វិនិយោគ​រួមមាន បច្ចេកវិទ្យា ឧស្សាហកម្ម អាហារ ហេដ្ឋារចនាសម្ព័ន្ធ កសិឧស្សាហកម្ម ទេសចរណ៍ និងវិស័យសណ្ឋាគារ​ជា​ដើម។

បើតាមរដ្ឋមន្រ្តីរូបនេះ បានពន្យល់ថា កម្ពុជាប្រៀបាននឹងកោះសន្តិភាព សម្រាប់អ្នកវិនិយោគទុនបរទេស នៅពេល​ដែលប្រទេសជិតខាងកម្ពុជា និងក្នុងតំបន់កំពុងមានវិបត្តិ ហើយកម្ពុជាត្រូវចាប់យកឱកាសនេះឲ្យបាន តាមរយៈ​ការ​ពង្រឹកការឯកភាពជាតិ។ លោកស៊ុនចាន់ថុល ដែលទំនងជាសំដៅដល់ជម្លោះនៅសមុទ្រចិនខាត្បូង និងវិបត្តិ​នយោបាយជ្រាលជ្រៅនៅប្រទេសថៃ បានលើកឡើងថា នេះជា«ឱកាសមាន» សម្រាប់ប្រទេស​កម្ពុជាដែលមិន​ត្រូវ​ឲ្យរំលង។

បើទោះជាលោក ស៊ុន ចាន់ថុល រដ្ឋមន្រ្តីក្រសួងពាណិជ្ជកម្មកម្ពុជា បានសន្យាពីការកំណែទម្រង់យ៉ាងមុតមាំក៏ដោយ ក៏ការសន្យានោះនឹងនៅតែជាមន្ទិលសង្ស័យនៅឡើយ ដរាបណាលទ្ធផលជាក់ស្តែងមិនទាន់លេចចេញជារូបរាង ខណៈអ្នកវិនិយោគទុនរបស់លោកខាងលិច ពិសេសសហរដ្ឋអាមេរិក បានសម្តែងការស្ទាក់ស្ទើរ ក្នុងការដាក់បោះទុន​នៅប្រទេសកម្ពុជា ដោយមកពីមូលហេតុច្រើនទៀត ដូចជាប្រព័ន្ធយុត្តិធម៌នៅមិនរឹងមាំជាដើម៕