នៅក្នុងភោជនីយដ្ឋានដ៏មានប្រជាប្រិយ មានជំនាញខាងសាច់ មួយនេះ ត្រូវតំរង់ជួរយ៉ាងហោច ក៏២​ទៅ៣ម៉ោងដែរ ដើម្បីអតិថិជនអាចទទួលទាន នៅទីនោះបាន។ ប៉ុន្តែលោកប្រធានាធិបតីអាមេរិក បានប្រើប្រាស់​សិទ្ធិជាអាទិភាពរបស់លោក ក្នុងនាមជាប្រធានាធិបតី ដើម្បីបញ្ជៀសការតំរង់ជួរដ៏វែងនេះ កាលពីព្រឹកថ្ងៃព្រហស្បត្តិ៍ ទី១០ ខែកក្កដាកន្លងទៅនេះ។ មិនត្រឹមតែប៉ុណ្ណឹង លោកថែមទាំងចង់«ប៉ាវ»ថ្លៃទទួលទានអាហារនេះ ទៅឲ្យគ្រួសារ​មួយ ដែលនៅឈរជិតនោះផង។ រំពេចនោះ ការភ្ញាក់ផ្អើលមួយ បានកើតឡើង។

គ្រួសារដែលលោកប្រធានាធិបតី គិតថានឹងចេញតម្លៃទទួលទានឲ្យនោះ បានហៅម្ហូបដូចតទៅ៖ សាច់គោសុទ្ធ ១គីឡូក្រាម សាច់ជាប់ឆ្អឺង ១គីឡូក្រាម សាច់ក្រក ២៥០ក្រាម និងសាច់មាន់បារាំង ២៥០ក្រាម។ លោក អូបាម៉ា បានស្រែកសួរជាការលេងសើចថា៖ «ឈប់ចាំបន្តិច ... តើអ្នកឯងចង់ចិញ្ចឹមមនុស្សប៉ុន្មាននាក់នេះ?»។

នៅពេលគិតលុយ មានប៉ុន្មាន ... ជាង៣០០ដុល្លា ដែលសម្រាប់លោកប្រធានាធិបតី មានតម្លៃថ្លៃជ្រុល និងបាន​ធ្វើ​ឲ្យលោក ដាក់ក្រដាស ២០ដុល្លា ដ៏គួរឲ្យខ្មាសអៀន ចូលទៅក្នុងហោប៉ៅវិញ។ ប៉ុន្តែទោះយ៉ាងណាក៏ដោយ ក៏លោក​នៅមានប័ណ្ណឥណទាន សម្រាប់ទូទាត់ដោយគ្មានបញ្ហា។

បើតាមគេហទំព័រវាយតម្លៃ ពីភោជនីយដ្ឋានក្នុងសហរដ្ឋអាមេរិក បានឲ្យដឹងថា ភោជនីយដ្ឋាន ហ្វ្រង់ក្លាំង មាន​ប្រជាប្រិយភាពណាស់ តែជារឿយៗ តែងចង្អៀតណែត ដោយការតម្រង់ជួរ របស់អ្នកទៅចូលទទួលទាន។

ដើម្បីងាកខ្លួនចូលនយោបាយបន្តិច ភោជនីយដ្ឋាននេះ បានធ្វើការស្ទង់មតិមួយនៅថ្ងៃរសៀលឡើង ដោយបាន​ដាក់សំនួរទៅអតិថិជនរបស់ខ្លួនថា លោក បារ៉ាក់ អូបាម៉ា គួតែប្រើសិទ្ធិរបស់លោក មិនតំរង់ជួរ ឬត្រូវធ្វើដូចគេឯង។ ប៉ុន្តែបណ្ដាជនអាមេរិកាំងជាច្រើន ដែលបានគោរពតំណែងជាប្រធានាធិបតី និងបានស្រឡាញ់រាប់អានលោកនោះ ប្រមាណជាង១៤៥នាក់ ថាលោក អូបាម៉ា គួរតែប្រើសិទ្ធិនេះ ទល់នឹងបណ្ដាជន៥៥នាក់ផ្សេងទៀត គិតថា លោក អូបាម៉ា គួរតែតម្រង់ជួរដូចគេឯង៕