លោកស្រី រ៉ាវីណា សេមដាសានី (Ravina Shamdasani) អ្នកនាំពាក្យឧត្តមស្នងការ​អង្គការសហ​ប្រជាជាតិ សម្រាប់សិទ្ធិមនុស្ស បានធ្វើសេចក្ដីប្រកាសព័ត៌មានមួយ ពីទីស្នាក់ការកណ្ដាល នៅទីក្រុង ហ្សឺណែវ ប្រទេស​ស្វីស នៅថ្ងៃទី១៨ ខែកក្កដា ឆ្នាំ២០១៤នេះ សម្ដែងការព្រួយបារម្ភរបស់ខ្លួន នៅក្នុងព្រឹត្តិការណ៍ផ្ទុះអំពើហិង្សា កាល​ពីថ្ងៃអង្គារ ទី១៥ ខែកក្កដា ឆ្នាំ២០១៤ នៅទីលានប្រជាធិបតេយ្យ រវាងក្រុមសន្តិសុខស៊ីឈ្នួល និង​អ្នក​គាំទ្រ​​គណបក្ស​​ប្រឆាំង បង្កឲ្យមានរបួសជាច្រើននាក់។

ក្នុងលិខិតប្រកាសព័ត៌មាន ដែលទស្សនាវដ្ដីមនោរម្យ.អាំងហ្វូ ទទួលបាន នៅរសៀលថ្ងៃទី១៨ ខែកក្កដានេះ បាន​សរសេរជាអាថ៌ទៀតថា៖ «យើងមានការរគៀសចិត្តជាខ្លាំង ចំពោះចំណាត់ការចាប់ចង មេដឹកនាំមួយ​ចំនួន នៃ​គណបក្សសង្គ្រោះជាតិ ក្រោមបទបង្កឲ្យមានអំពើហិង្សាទាំងនោះ។ យើងមានការព្រួយបារម្ភ ចំពោះ​បទចោទ​ប្រកាន់ធ្ងន់ធ្ងរ ដែលបានប្រកាសប្រឆាំងនឹងក្រុមមេដឹកនាំទាំងនេះ រួមមាន "បទបំបះបំបោរ" ដែល​ផ្ទុយ​ពីអ្វី​ដែល​​ក្រុម​មេដឹកនាំទាំងនោះ បានខិតខំប្រឹងប្រែងរម្ងាប់ក្រុមអ្នកតវ៉ា ដើម្បីបញ្ឈប់អំពើហិង្សា ក្នុងអំឡុង​ពេលមាន​ការ​ប៉ះ​ទង្គិចគ្នានេះ។»

លោកស្រី សេមដាសានី បានសរសេរទៀតថា៖ «រាល់ការចោទប្រកាន់ណាក៏ដោយ ដែលមានចរិកនយោបាយ ត្រូវ​តែទម្លាក់ចោលភ្លាម»។

ឧត្តមស្នងការសម្រាប់សិទ្ធិមនុស្ស របស់អង្គការសហប្រជាជាតិ បានធ្វើការអំពាវនាវ ដល់តុលាការកម្ពុជា​ត្រូវ​គោរព​​ឲ្យបានត្រឹមត្រូវ នូវបទដ្ឋានសិទិ្ធមនុស្ស ក្នុងសំនុំរឿងក្ដីទាំងនេះ ដោយសារតែមាននិតិវិធីជាច្រើន ត្រូវ​បាន​ធ្វើឲ្យ​មាន​កំហុសយ៉ាងធ្ងន់ធ្ងររួចមកហើយ នៅក្នុងសំនុំរឿងផ្សេងទៀតកន្លងមកថ្មីៗ។

«យើងក៏បានជំរុញទៅអាជ្ញាធរកម្ពុជា ឲ្យចាប់ផ្តើមការស៊ើបអង្កេតជាបន្ទាន់ ប្រកបដោយប្រសិទ្ធិភាព មិន​លំអៀង និងមានតម្លាភាព ដើម្បីធានាថា អ្នកដែលទទួលខុសត្រូវពិតប្រាកដ ចំពោះឧប្បត្តិហេតុ​អំពើហិង្សា​ទាំងនេះ ត្រូវ​បាន​ចាប់មកផ្ដន្ទាទោស»។

ជាទីបញ្ចប់ លិខិតរបស់អ្នកនាំពាក្យ បាននិយាយស្នើដល់ភាគីជម្លោះកម្ពុជាទាំងអស់ ត្រូវមានការអត់ធ្មត់​ជា​អតិបរមា និងបន្តការចរចា ដើម្បីបញ្ចប់ភាពជាប់គាំងផ្នែកនយោបាយ។ ជាពិសេសការរឹតបន្តឹង លើសេរីភាព​នៃ​ការបញ្ចេញមតិ និងការជួបប្រជុំដោយសន្តិវិធី គួរត្រូវបានដកចេញភ្លាម ហើយសិទ្ធិទាំងនេះ ចាំបាច់ត្រូវយក​មក​អនុវត្ត ដោយសន្តិវិធី ទោះក្នុងល័ក្ខខ័ណ្ឌណាក៏ដោយ៕