យន្ដហោះ របស់ក្រុមហ៊ុនម៉ាឡេស៊ីអ៊ែរឡាញ។ (រូបថត MONOROOM.info/ D.KEO)

ធ្លាក់យន្ដហោះ - ផ្សាយតាមបណ្ដាញទូរទស្សន៍ ស៊ីអ៊ិនអ៊ិន (CNN) ដ៏ល្បី លោក ចន ឃែរី រដ្ឋមន្ត្រីការបរទេស នៃ​សហរដ្ឋអាមេរិក បាននិយាយខ្លាំងៗថា៖ «វាច្បាស់ណាស់ ដែលកាំជ្រួចបាញ់ទម្លាក់យន្ដហោះនោះ ជាប្រភេទកាំជ្រួច ដែលផ្ដល់ដោយប្រទេសរ៉ូស្សី ហើយបានប្រគល់ដល់ដៃរបស់ក្រុមអ្នកបំបែកទឹកដី»។

សហរដ្ឋអាមេរិកនិងប្រទេសជាច្រើន នៅបស្ចឹមលោក បានគិតថាយន្ដហោះស៊ីវិល ដែលដឹកមនុស្ស២៩៨នាក់ ត្រូវ​បាន​បាញ់ទម្លាក់ នៅកំពស់ខ្ពស់ជាង១០គីឡូម៉ែត្រពីដី ដោយកាំជ្រួចប្រដេញបាញ់ចេញពីដី នៅក្នុងតំបន់មួយ​ដែល​គ្រប់គ្រងដោយ ក្រុមអ្នកបំបែកទឹកដីអ៊ុយក្រែន។

លោក ឃែរី បានថ្លែងតាមទូរទស្សន៍អាមេរិកមួយទៀត ឈ្មោះ អ៊ិនប៊ីស៊ី (NBC) ថា«ភស្ដុតាងដ៏មាំទាំ គួរឲ្យទុកចិត្ត​បាន​ជាច្រើន» បានចង្អុលរុញការទទួលខុសត្រូវទាំងនេះ ទៅលើប្រទេសរ៉ូស្សី និងក្រុមអ្នកបំបែកទឹកដីអ៊ុយក្រែន ដែល​និយមរ៉ូស្សី។ ប៉ុន្តែលោកមិនបានធ្វើការចោទប្រកាន់ដោយផ្ទាល់ ថាពួកគេទាំងនេះ ជាអ្នកបាញ់នោះទេ។

សហរដ្ឋអាមេរិកបានដឹងពីបញ្ហានេះ ដោយយោងទៅលើរូបភាពជាតឹកតាង ដែលថតដោយប្រព័ន្ធផ្កាយរណប។ លោក​រដ្ឋមន្ត្រីអាមេរិក បាននិយាយទៀតថា៖ «យើងបានដឹងពីដំណើរទំនង និងពីពេលវេលាដែលកាំជ្រួចនេះ ត្រូវ​បានបាញ់ចេញ»។ ដោយមិនភ្លេចផងទេ នូវការលើកឡើងពីកិច្ចសន្ទនានានា ដែលក្រុមអ្នកបំបែកទឹកដី បាន​ផ្សព្វ​ផ្សាយនៅលើបណ្ដាញសង្គម។

លោក ឃែរី បានបន្ថែមថា៖ «យើងបានដឹងដោយភាពជាក់លាស់ថា ប្រទេសអ៊ុយក្រែន មិនមានប្រព័ន្ធកាំជ្រួញ​បែប​នេះ នៅក្នុងតំបន់នាពេលនោះទេ។ ដូច្នេះ គេត្រូវសង្កតបញ្ហានេះទៅរកក្រុមអ្នកបំបែកទឹកដី។»

«អ្វីដែលបានកើតឡើង ពិតជាគួរឲ្យហួសចិត្តណាស់។ ក្រុមអ្នកបំបែកទឹកដីទាំងនោះ បានធ្វើនូវអ្វីគ្រប់យ៉ាង ផ្ទុយពីអ្វី​ដែលប្រធានាធិបតីរ៉ូស្សីបានលើកឡើង។ ដូចជាបានលើកសាកសពដាក់ឡើងលើឡាន ដោយមានទឹកមុខ​សប្បាយ​រីករាយ អូសទាញសាកសព និងរើកកាយសម្ភារៈផ្សេងៗ ពីកន្លែងដែលយន្ដហោះធ្លាក់ជាដើម។»

យ៉ាងណាក៏ដោយ ក៏រដ្ឋមន្ត្រីការបរទេសអាមេរិក នៅតែបានជំរុញឲ្យប្រទេសរ៉ូស្សី ត្រូវតែធ្វើអ្វីមួយ ជុំវិញបញ្ហានេះ ដើម្បីបង្ហាញឲ្យឃើញថា ខ្លួនមិនបានឃុបឃិត ជាមួយនឹងក្រុមអ្នកបំបែកទឹកដីនោះឡើយ៕