លោក ផៃ ស៊ីផាន លើកដៃចង់ធ្វើប្រដាល់ ជាមួយរូបចម្លាក់។ (រូបថតហ្វេសប៊ុក)

ពីនេះពីនោះ - «ខ្ញុំសូមឲ្យឯកឧត្ដមអ្នកនាំពាក្យ (...) ធ្វើម៉េចកុំនាំពាក្យដូចឯកឧត្ដម ផៃ ស៊ីផាន និង (...) ស្អីៗ​ណ្នឹង» នេះជាសម្លេងដែលគេបានស្ដាប់ឮ នៅតាមវិទ្យុ ហើយត្រូវបានអ្នកសម្របសម្រួលកម្មវិធី ប្រកាស​ឈ្មោះ មករា ពី​ខេត្ត​ក្រចេះ ដែលបាននិយាយយកលោក ផៃ ស៊ីផាន អ្នកនាំពាក្យទីស្ដីការគណរដ្ឋមន្ត្រី មក​ថ្លែងបញ្ជាក់ក្នុងឃ្លា ដ៏គួឲ្យ​ភ្ញាក់​ផ្អើលរបស់លោក។

បុរស មករា បានបន្ថែមភាពភ្ញាក់ផ្អើលទៀតថា «ព្រោះ (ពួកគាត់) នាំពាក្យ ប្រជាជនមិនចង់ស្ដាប់ទេ។ សូម​ឲ្យ​​ឯក​ឧត្ដម​នាំពាក្យឲ្យបានច្បាស់ៗ អញ្ចឹងបានប្រជាជនចូលចិត្តស្ដាប់។»

នៅមិនអស់ចិត្ត នឹងការលើកឡើងរបស់ពលរដ្ឋរូបនេះ លោក ជុន ច័ន្ទបុត្រ ដែលជាអ្នកសម្រប​សម្រួល​កម្មវិធី បាន​សួរបកទៅវិញថា៖ «មើលទៅច្បាស់ទេប៉ុណ្ណឹង? (...) ឬក៏នៅតែមានបញ្ហា?» បុរស មករា ដែល​មានសំនៀងជា​ពលរដ្ឋ​នៅតាមខេត្តនោះ បានបន្តពន្យល់ថា៖ «បាទ ខ្លាចលោថ្ងៃក្រោយទៅ ដូចឯកឧត្ដម ផៃ ស៊ីផាន ណ្នឹង ... គ្រាន់តែ​ឮ​សម្លេង ប្រជាជានបិទសម្លេងចោលបាត់។ អញ្ចឹងសូមឯកឧត្ដម (យឹម សុវណ្ណ) និយាយឲ្យច្បាស់ៗ។»

ការព្រមានរបស់ពលរដ្ឋរូបនេះ ទំនងជាបានធ្វើដោយប្រយោល ចំពោះគណបក្សសង្គ្រោះជាតិ តាមរយៈ​លោក យឹម សុវណ្ណ អ្នកនាំពាក្យ និងជាតំណាងឲ្យលោក សម រង្ស៊ី និងលោក កឹម សុខា បន្ទាប់ពីគណបក្ស​នេះបាននាំគ្នា ទាំង​មេ​បក្ស និងទាំងថ្នាក់ដឹកនាំជាន់ខ្ពស់របស់បក្ស បានចូលទៅធ្វើកិច្ចព្រមព្រៀង បញ្ចប់​វិបត្តិជាប់នយោបាយ ដែលកើត​មានជិតមួយឆ្នាំមកហើយ។ ការយល់ព្រមទាំង៧ចំណុច ដែលចេញ​ពីជំនួប​កំពូលថ្ងៃទី២២ ខែកក្កដា ជាមួយលោក ហ៊ុន សែន បានបង្កឲ្យអ្នកគាំទ្រមួយភាគ របស់គណបក្ស​សង្គ្រោះ​ជាតិ សម្ដែងការមិនពេញចិត្ត និងថែមទាំងបាន​ធ្វើ​ការថ្កោលទោសនោះទៀត។

ប៉ុន្តែ អ្វីដែលធ្វើឲ្យអ្នកស្ដាប់វិទ្យុអាស៊ីសេរីទាំងអស់ភ្ញាក់ក្រញាង ពីការលង់លក់ព្រោះពាក្យពន្យល់​របស់​លោក យឹម សុវណ្ណ នោះ គឺប្រិយមិត្តអ្នកស្ដាប់វិទ្យុពីខេត្តក្រចេះ លោក មករា បានធ្វើការព្រមានដូចក្នុង​ប៉ុន្មានឃ្លាខាងលើ ដោយ​យកលោក ផៃ ស៊ីផាន មកធ្វើការប្រៀបធៀប។

យ៉ាងណាក៏ដោយ សម្រាប់អាជីពជាអ្នកនាំពាក្យ មិនមែនជាអ្នក​និយាយ ដែលចេញពីបេះដូងរបស់ខ្លួន​ទាំង​ស្រុង​នោះ​ទេ។ អ្នកនាំពាក្យភាគច្រើន មិនថាតែនៅក្នុងប្រទេសកម្ពុជាទេ សុទ្ធសឹងជាមនុស្ស ដែលមាន​ជំនាញ​ខាង​សូត្រ​តាម ឬចេះធ្វើអត្ថាធិប្បាយ«តាម» ដែលមិនសូវខុសប៉ុន្មាន ពីសត្វ«សេក»នោះឡើយ៕