ជីវិត - លោក ខឹម វាសនា ដែលគេធ្លាប់តែស្គាល់ថា អ្នកនយាបាយ នោះ បានធ្វើឱ្យគេមានការភ្ញាក់ផ្អើលជាខ្លាំង បន្ទាប់​ពីអ្នកប្រើប្រាស់បណ្តាញសង្គមហ្វេសប៊ុកមួយរូប បានបង្ហោះវីដេអូមួយ ដែលមានលោក ខឹម វាសនា បាន​សម្តែងរឿង រួមជាមួយលោក ទេព រិន្ទដារ៉ូ និងអ្នកនាងអម្ពរទេវី ក្នុងរឿង«ជើងខ្លាំងមានតែមួយ»។ ភា្ញក់ផ្អើល ដោយ​សារតែពួកគេមួយចំនួនទាំងនោះ មិននឹកស្មានថា អ្នកនយោបាយដ៏លេចធ្លោ លោកខឹម វាសនា គឺជាអតីតតារា​ភាពយន្ដ ដ៏ស្រស់សង្ហាដូច្នេះឡើយ។

អ្នកប្រើប្រាស់ហ្វេសប៊ុកមួយចំនួន បានលើកឡើងថា ប្រសិនគេមិនបានឃើញវីដេអូនេះទេ គេពិតជាមិនដឹងថា លោក ខឹម វាសនា ដែលធ្លាប់តែកាន់ក្បាលមេក្រូ ឃោសនាតែពីរឿងនយោបាយ គឺជាតួកុនម្នាក់សោះ ព្រោះតែកន្លងមក​ឈ្មោះរបស់លោក មិនត្រូវបានល្បីសុះសាយថា ជាតារាភាពយន្ដនោះទេ តែល្បីជាអ្នកនយោបាយ ហើយក៏មិន​ដែល​ឮ​ចាស់ទុំជំនាន់មុននិយាយពីលោកដែរ សូម្បីតែវីដេអូដែលបង្ហោះ នៅលើប្រព័ន្ធយូធូប ក៏គេមិនដែលធ្លាប់ស្គាល់​លោក ជាតួសម្តែងនោះឡើយ។

អ្នកមាននិន្នាការមិនគាំទ្រនូវទស្សនៈរបស់លោក ខឹម វាសនា ចំពោះរឿងនយោបាយ និងបានធ្វើការរិះគន់​លោកជា​រឿយៗនោះ បែរជាត្រឡប់មកគាំទ្រ និងសរសើរពីទេពកោសល្យរបស់លោក ខឹម វាសនា ទៅវិញ។ នៅពេលដែល​បានឃើញខ្សែភាពយន្ត ដែលប្រធានគណបក្ស«ជួង»បានសម្តែង ពួកគេនិយាយថា លោក ខឹម វាសនា សម្តែងបាន​ល្អណាស់។

បើតាមគេហទំព័រវិគីភីឌា ដែលរៀបរាប់ជីវប្រវត្តិរបស់លោកបានបញ្ជាក់ថា ក្នុងឆ្នាំ ១៩៨៨ លោក ខឹម វាសនា ជាអ្នក​ដើរថតរូប ហើយក៏បានរៀន ពីផ្នែកថែរក្សាជួសជុលកាមេរ៉ា អស់រយៈពេល៤ឆ្នាំដែរ។ អំឡុងឆ្នាំ ១៩៨៩ - ១៩៩៣ លោក ខឹម វាសនា បានក្លាយជាថៅកែកុន ជាអ្នកនិពន្ធ ដឹកនាំរឿង និងជាតួសម្តែងភាពយន្ដ នៅក្នុងភាពយន្ដ​ដែល​លោកផលិតនោះផង។ ផលិតកម្មរបស់អតីតតួកុន និងជាប្រធានគណបក្សសម្ព័ន្ធ​ដើម្បី​ប្រជាធិបតេយ្យ​បច្ចុប្បន្ន​រូបនេះ មានឈ្មោះថា ផលិតកម្មយុវវ័យភាពយន្ត។

ស្នាដៃផលិតរឿង និពន្ធ ដឹកនាំរឿងដោយខ្លួនឯង របស់លោកមានចំនួន០៤រឿង ដូចជារឿង «មន្តស្នេហ៍ស្រីមុំ» រឿង​«មួយកំផ្លៀងអនុវស្សារីយ៍ ឬស្នាកស្នាមអនុស្សារីយ៍» រឿង«លេខមួយដូចគ្នា» និងរឿង«ជើងខ្លាំងមានតែមួយ»។ ​រឿង​ចុងក្រោយរបស់លោកជារឿងភាគ ដែលមានចំណងជើងថា «កំហុសអ្នកណា?» ត្រូវបានថតជិតចប់ហើយ តែត្រូវ​អាក់​ខាន​ទៅវិញ ដោយមានបញ្ហា(?)។

មនុស្សជំនាន់ប្រហែលនឹងលោក ខឹម វាសនា ឬអ្នកដែលស្គាល់ប្រវត្តិលោកពីមុនមក បានថ្លែងថា ប្រមុខគណបក្ស​សម្ព័ន្ធដើម្បីប្រជាធិបតេយ្យរូបនេះ មានលក្ខណៈជាសិល្បករ ឬជាអ្នកសម្ដែង ច្រើនជាងអ្នកនយោបាយ។ ភាពយន្ដ​ដែលលោកបាននិពន្ធ ដឹកនាំ និងសម្ដែង មានភាពជោគជ័យច្រើន និងទទួលការឲ្យតម្លៃ ថាពោរពេញដោយ​ទេពកោសល្យ។ ប៉ុន្តែនៅក្នុងនយោបាយ លោក ខឹម វាសនា មិនសូវមានលក្ខណៈគ្រប់គ្រាន់ ដើម្បីក្លាយជាអ្នកដឹកនាំ​នោះទេ។ គេឧស្សាហ៍ឃើញ និងស្ដាប់ឮ លោក ខឹម វាសនា ខឹង យំ ឬស្រែកជារឿយៗ ពីអ្វីដែលលោកមានអារម្មណ៍​នៅក្នុងខ្លួន ដែលនោះជាលក្ខណៈដ៏ពិសេស សម្រាប់សិល្បករមួយរូប តែមិនមែនជាអ្នកនយោបាយនោះទេ៕

ខាងក្រោមនេះ ជាវីដេអូដកស្រង់ ដែលប្រិយមិត្តហ្វេសប៊ុក បានយកទៅចុះផ្សាយ៖

នេះជារូបភាពដែលលោក ខឹម វាសនា ខ្លួនលោក បានរំលឹកពីពេលលោក នៅជាអ្នកថតរូបអាជីព៖