លោក ហ៊ុន សែន ក្នុងឱកាសជួបជាមួយអ្នកសារព័ត៌មាន នៅរដ្ឋសភាព្រឹកថ្ងៃទី២៧ ខែកក្កដានេះ បានព្រមានយ៉ាង​ចាស់ដៃ ដោយផ្ទាល់នៅចំពោះមុខ ទៅកាន់អ្នកសារព័ត៌មាននៃវិទ្យុសម្លេងសហរដ្ឋអាមេរិក ដែលបានសាកសួរសំនួរ​ទៅលោក។ លោក ហ៊ុន សែន បានប្រាប់ឲ្យអ្នកសារព័ត៌មានរូបនោះ «កុំសួរសំនួរដដែលៗ»។

លោក ហ៊ុន សែន នៅរដ្ឋសភាថ្ងៃទី២៨ ខែកក្កដា ឆ្នាំ២០១៤។ (រូបថត MONOROOM.info/ S. Tith)

ព័ត៌មាន - បន្ទាប់ពីបានបញ្ចប់ការផ្តល់សុពលភាព ទៅឲ្យលោក សម រង្ស៊ី ក្លាយជាតំណាងរាស្ត្រជាប់ឆ្នោតនោះមក លោកនាយករដ្ឋមន្រ្តី ហ៊ុន សែណ បានចេញមកថ្លែងនៅចំពោះអ្នកកាសែត ជាច្រើននាក់ ពាក់ព័ន្ធនឹងបេក្ខភាពម្នាក់ មកពីស្ថាប័នឯករាជ្យ ដើម្បីចូលជាសមាជិក គ.ជ.ប ទី៩នោះថា លោកបានជួបពិភាក្សាមួយលោក សម រង្ស៊ី ពី​បេក្ខភាព​នោះ ដែលត្រូវកើតចេញពីការស្រុះស្រួលគ្នា រវាងគណបក្សប្រជាជនកម្ពុជា និងគណបក្សសង្គ្រោះជាតិ។

តែលោក ហ៊ុន សែន មិនបានបង្ហាញពីឈ្មោះ ឬអត្តសញ្ញាណថា ជាអ្នកណានៅឡើយ ដោយគ្រាន់តែបន្ថែមថា ជា​ការ​គោរពសិទ្ធិ ត្រូវរង់ចាំដល់មានការឆ្លើយតបជាផ្លូវការ នូវរវាងប៉ុន្មានម៉ោងខាងមុខទៀតនេះសិន។ រំពេចនោះ អ្នក​សារព័ត៌មាន​ជើងចាស់ម្នាក់ របស់វិទ្យុសម្លេងសហរដ្ឋអាមេរិក ហៅកាត់ថា VOA លោក ហេង រស្មី ទំនងជាមាន​ចេតនា​«ឆ»លោកនាយករដ្ឋមន្រ្តី ដើម្បីបានឈ្មោះបុគ្គល ដែលជាបេក្ខភាពទី៩ នៃសមាជិក គ.ជ.ប ដោយបានតាំងជាសំនួរ​យ៉ាងដូច្នេះថា៖ «បេក្ខភាពម្នាក់ចុងក្រោយ អ្នកទី៩ សម្តេចពេញចិអ្នកមួយណាដែរ?»

មិនបង្អង់យូរនិង«ទាន់ឱកាសល្អ» លោកនាយករដ្ឋមន្រ្តីបានធ្វើការព្រមានភ្លាមៗ ដោយផ្ទាល់ និងនៅចំពោះមុខ​អ្នក​សារព័ត៌មានជាច្រើនទៀត យ៉ាងដូច្នេះថា៖ «ខ្ញុំបានប្រាប់អំបាញ់ម៉ិញហើយ ប្រហែលជាលោកគួរ​តែត្រូវបាន​រៀន​សូត្រ​បន្ថែម នៅពេលដែលខ្ញុំបាននិយាយថា គោរពសិទ្ធិអ្នកដែលត្រូវជ្រើសរើស។ (...) មិនទាន់មានការឆ្លើយតបជាផ្លូវការ ការបញ្ចេញឈ្មោះគឺជាការបំពាន។»

លោកនាយករដ្ឋមន្រ្តី នៅតែប្រកាន់ជំហរ ក្នុងការឲ្យអ្នកសារព័ត៌មាន រង់ចាំរហូតដល់ពេលមានការឆ្លើយតប ពី​បេក្ខជន​ដែលនឹងត្រូវរើសជាមុនសិន។ លោកក៏បានលើកឡើងថា អ្នកសារព័ត៌មានត្រូវតាមដានឲ្យជាប់ និងស្តាប់ឲ្យ​បាន ជាសវាងការសួររឿងដដែលៗ។ លោក ហ៊ុន សែន បានតាំងខ្លួន ជាគ្រូបង្រៀនខាងសារព័ត៌មានទៀតថា៖ «ខ្ញុំ​បង្រៀន ពីរបៀបសួររបស់អ្នកសារព័ត៌មាន ចំពោះអ្នកនយោបាយ ឬអ្នកធ្វើអ្វីក៏ដោយ។»

វីដេអូ កិច្ចសម្ភាស របស់លោក ហ៊ុន សែន ឲ្យទៅអ្នកសារព័ត៌មាន៖