នយោបាយ - គណៈកម្មការជំនាញ ចម្រុះរបស់គណបក្សទាំងពីរ បាននឹងកំពុងជជែកពិភាក្សាគ្នាលំអិត នូវចំណុច​តូចៗមួយចំនួន ដែលមិនទាន់បានដោះស្រាយបញ្ចប់ នាព្រឹកថ្ងៃទី២៩ ខែកក្កដានេះ។ ទាំងគណបក្សប្រជាជនកម្ពុជា ទាំងគណបក្សសង្គ្រោះជាតិ មានសង្ឃឹមច្រើនក្នុងការឈានទៅរកភាពត្រូវគ្នា។ ជាមួយនឹងលទ្ធផលនេះ​បេក្ខភាព​តំណាងរាស្រ្តជាប់ឆ្នោតទាំង៥៥រូប គណបក្សសង្គ្រោះជាតិនឹងចូល«ស្បថ» នាពេលរសៀលថ្ងៃដដែលនេះ។

ក្រោយកិច្ចចចារកំពូល នៃគណបក្សទាំងពីរ ត្រូវបានបញ្ចប់កាលពីថ្ងៃទី២២ ខែកក្កដា ឆ្នាំ២០១៤នេះ បានសម្រេច​បង្កើតឲ្យមាន នូវគណៈកម្មការចំនួន១០នៃរដ្ឋសភា។ បន្ទាប់ពីការស្បថនិងធ្វើសច្ចាប្រណិធាន ក្រុមអ្នកតំណាងរាស្រ្ត​គណបក្សសង្គ្រោះជាតិទំាង៥៥រូប នឹងចូលប្រជុំសភា ដើម្បីធ្វើវិសោធនកម្មបទបញ្ជាផ្ទៃក្នុងរដ្ឋសភា ទាក់ទងទៅនឹង​ការបង្កើតបន្ថែមគណៈកម្មការជំនាញថ្មីនៃរដ្ឋសភា គណៈកម្មការអង្កេត បោសសំអាត និងប្រឆាំងអំពើពុករលួយ។

នាព្រឹកថ្ងៃទី២៩ ខែកក្កដានេះ នៅវិមានរដ្ឋសភា គណបក្សទាំងពីរក៏បានប្រជុំរៀបចំកិច្ចការផ្ទៃក្នុង នៃគណៈកម្មការ​ចម្រុះទាំងពីរ។ លោក រស់ សួរ មន្រ្តីច្បាប់មកពីគណៈសង្គ្រោះជាតិបានបន្ថែមថា កិច្ចជុំនួបប្រជុំថ្នាក់បច្ចេកទេសចម្រុះ នឹងឈានទៅរកលទ្ធផលជា«វិជ្ជមាន» ច្រើនជាងអវិជ្ជមាន។ ក្រោយលទ្ធផលនេះ សមាជិកតំណាងរាស្រ្ត​ទាំង៥៥រូប​គណបក្សសង្គ្រោះជាតិ នឹងចូលស្បថនៅព្រះបរមរាជវាំងវេលាម៉ោង៤ ល្ងាចថ្ងៃនេះ។

ផ្ទុយទៅវិញលោក យឹម សុវណ្ណ អ្នកនាំពាក្យគណបក្សសង្គ្រោះជាតិ ដូចជានៅតែលាក់ មិនចង់លើកពីបញ្ហាទាំងនេះ ប្រាប់អ្នកសារព័ត៌មានឡើយ។ ក្នុងកិច្ចសម្ភាសជាមួយទស្សនាវដ្តី​មនោរម្យ.អាំងហ្វូ លោកបានលើកឡើងថា នៅមិន​ទាន់មានដំណោះស្រាយនៅឡើយទេ មកទល់នឹងពេលនេះ។ ឯការចូល«ស្បថ» ក៏មិនទាន់បាន​កំណត់ពេលច្បាស់​លាស់ដែរ។ លោកបានថ្លៃងបែបនេះ ស្របពេលដែលតំណាងគណបក្សទាំងពីរ កំពុងស្វែងរកដំណោះស្រាយ​នៅ​វិមានរដ្ឋសភា ដើម្បីឈានទៅបញ្ចប់វិបត្តិ តាមកិច្ចព្រមព្រៀងកាលពីថ្ងៃទី២២ ខែកក្កដា កន្លងមកនេះ។

ដោយឡែកមន្រ្តីខាងគណបក្សប្រជាជនកម្ពុជា លោក ជាម យៀប ក៏បានថ្លែងប្រាប់ទស្សនាវដ្តីមនោរម្យ.អាំងហ្វូ​ក្នុង​ថ្ងៃទី២៩ ខែកក្កដានេះដែរថា លោកក៏ដូចជាមន្រ្តីគណបក្សប្រជាជនកម្ពុជាដទៃទៀត ពាក់ព័ន្ធកំពុងប្រជុំដោះស្រាយ​បញ្ហាតាមកិច្ចព្រមព្រៀងនៃជំនួបកំពូល។

ឯលោក រស់ សួរ បានបញ្ជាក់បន្ថែមដូច្នេះថា៖ «មន្រ្តីនៃគណបក្សទាំងពីរ កំពុងធ្វើការសម្រួលនៅព្រឹកនេះ។ (...) កំពុង​ប្រជុំគណៈកម្មការជំនាញ នៃរដ្ឋសភាគ្រប់ចំណុចទាំងអស់។ (...) ផែនការមេចេញហើយ នៅផែកការលំអិត ធ្វើតាម​គណៈកម្មការជំនាញនីមួយៗ។ (...) សម្រួលត្រូវព្រឹកនេះ ចូលល្ងាចនេះ។ បើមិនត្រូវគ្នាមិនចូលទេ តែភាគរយ​ច្រើន​បង្ហាញថាត្រូវគ្នា ដូច្នេះដាច់ខាតល្ងាចនេះត្រូវបានចូលស្បថ។»៕