ពីពេលនេះទៅ សមត្ថកិច្ចរដ្ឋាភិបាលកម្ពុជា នឹងរឹតបន្តឹង ឲ្យមានប្រសិទ្ធភាព«មួយកម្រិត»ថែមទៀត លើជនបរទេស​ដែលមកបង្កបទល្មើសលើទឹកដីកម្ពុជា អ្នកធ្វើការជនជាតិបរទេស និងពលករបរទេស​ដែលមកធ្វើការនៅ​ប្រទេស​កម្ពុជា។ នេះ ជាការអះអាងរបស់មន្រ្តីជាន់ខ្ពស់ នៃនគរបាលជាតិកម្ពុជា។

បណ្ដាជនវៀតណាម រស់នៅឃុំកំពង់លួង ស្រុកក្រគរ ខេត្តពោធិសាត់។

ពលករបរទេស - អគ្គនាយក នៃអគ្គនាយកដ្ឋានអន្តោប្រវេសន៍នៃក្រសួងមហាផ្ទៃកម្ពុជា លោកឧត្តមសេនីយ៍ សុខ ផល បានលើកឡើងថា ជនបរទេសដែលមករស់នៅ ឬមកធ្វើការលើទឹកដីកម្ពុជា ចាំបាច់ត្រូវគោរពច្បាប់របស់​ប្រទេសកម្ពុជា។ ឧត្តមសេនីយ៍ដដែលបន្តថា តាមច្បាប់របស់ប្រទេសកម្ពុជា តម្រូវឲ្យពលករបរទេសទាំងអស់ ដែល​មករស់នៅ និងធ្វើការនៅប្រទេសកម្ពុជា ចាំបាច់ត្រូវតែមានលិខិតស្នាមផ្លូវច្បាប់គ្រប់គ្រាន់ មានដូចជា លិខិតឆ្លងដែន ទិដ្ឋាការស្នាក់នៅធ្វើការ និងប័ណ្ណការងារជាដើម។

មកដល់ពេលនេះ យ៉ាងហោចណាស់មានជនបរទេស ពី៥ទៅ៦ម៉ឺននាក់ ដែលបានស្នាក់នៅ ឬធ្វើការ​តាម​រោង​ចក្រ​សហគ្រាស គ្រឹះស្ថានឯកជននានា នៅក្នុងប្រទេសកម្ពុជា ហើយក្រសួងមហាផ្ទៃកំពុងធ្វើស្ថិតិឡើងវិញ។ លោក សុខ ផល បានពន្យល់ទៀតថា ស្ថាប័នពាក់ព័ន្ធរបស់រដ្ឋាភិបាលកម្ពុជា កំពុងសហការគ្នាដើម្បីប្រមូលពន្ធ ឲ្យមាន​ប្រសិទ្ធភាព ដាក់ចូលក្នុងថវិការជាតិ លើជនបរទេសទាំងនោះ ព្រោះពលករកម្ពុជានៅបរទេស ក៏ត្រូវរដ្ឋាភិបាល​បរទេសដកហូតពន្ធដូចគ្នាផងដែរ។

ថ្លែងក្នុងពិធីប្រគល់សម្ភារៈមួយចំនួនធំ ដល់នាយកដ្ឋានក្រោមចំណុះ នៅអគ្គនាយកដ្ឋានអន្តោប្រវេសន៍ នៅគ្រា​ចុង​ក្រោយនេះ លោកឧត្តមសេនីយ៍ សុខ ផល បានព្រមានថា៖ «បើជនបរទេសណាម្នាក់ ដែលគិតថា ប្រទេសកម្ពុជា ជា​កន្លែងសម្រាប់ ប្រព្រឹត្តបទល្មើសនោះ ខ្ញុំសូមប្រកាសអំពាវនាវថា សូមឲ្យបញ្ឈប់នូវគំនិតនេះ ហើយកុំយកទឹកដី​នៃ​កម្ពុជា ជាកន្លែងងាយស្រួលប្រព្រឹត្ត អំពើល្មើសច្បាប់នោះ។»

គួរកត់សម្គាល់ថា ឆ្លើយតបនឹងបញ្ហាលំហូរចូល នៃជនអន្តោប្រវេសន៍វៀតណាមយ៉ាងច្រើនសន្ធឹកសន្ធាប់ មកកម្ពុជា ខ្វះការ​ត្រួតពិនិត្យ ដែលត្រូវបានរិះគន់ដោយគណបក្សសង្រ្គោះជាតិ និងមានករណីបទល្មើសទាក់ទង​នឹងជន​បរទេស​ច្រើន ក៏ដូចជាភាពស្មុគស្មាញក្នុងការគ្រប់គ្រងជនបរទេសនៅកម្ពុជា រដ្ឋាភិបាលកម្ពុជាគណបក្សប្រជាជនកម្ពុជា នៅ​អាណត្តិទី៥ថ្មីនេះបាន បានបង្កើតអគ្គនាយកដ្ឋានជនអន្តោប្រវេសន៍ថ្មីមួយ តាមអនុក្រិត្យលេខ១៨៣ ដើម្បីធានា​ប្រសិទ្ធភាព ដោះស្រាយបញ្ហាទាំងនោះ៕