តើគេគួរបញ្ឈប់ កុំឲ្យមនុស្សប្រមឹក ជិះយន្ដហោះឬ? អ្នកដំណើរពីរនាក់ ដែលជិះនៅលើយន្ដហោះ របស់​ក្រុមហ៊ុនអាកាសចរណ៍ សាន់វិញ (Sunwing) ហោះភ្ញាប់រដ្ឋធានីតូរ៉ុងតូ ប្រទេសកាណាដា ទៅកាន់ប្រទេស​គុយបា បានធ្វើខ្លួនឲ្យស្ថិតនៅក្រោមឥទ្ធិពលសុរាយ៉ាងជោគជាំ បន្ទាប់ពីពួកគេបានទិញមកសេព នៅមុន​ពេលឡើងយន្ដហោះបន្តិច។ នេះបើតាមស្ថានីយ៍ទូរទស្សន៍កាណាដា ស៊ីធីវី ញ៉ូ (CTV News)។

ក្រុមហ៊ុនអាកាសចរណ៍ បានធ្វើការពន្យល់ថា បន្ទាប់ពីបានចូលទៅលាក់ខ្លួន ក្នុងបន្ទប់ទឹកលើយន្ដហោះ ស្ត្រី​ក្មេងៗទាំងពីរនាក់ បានបញ្ឆេះបារីមួយដើមឡើង បណ្ដាលឲ្យសញ្ញាអាសន្នបានលោតបន្លឺឡើង។ បន្ទាប់​ពីនោះមកទៀត ស្ត្រីទាំងពីរបានឈ្លោះប្រកែកគ្នា រហូតឈានទៅដល់វាយតប់គ្នា នៅលើយន្ដហោះ បង្កឲ្យ​យន្ដហោះបាត់ភាពលំនឹងរបស់ខ្លួន។

ប៉ុន្តែហេតុការណ៍បានស្ងប់ស្ងាត់ទៅវិញ ដោយក្រុមបម្រើការនៅលើយន្ដហោះ បានអនុវត្តតាមយុទ្ធវិធី ដែល​មានស្រាប់ ដើម្បីគ្រប់គ្រងស្ថានការណ៍។ នោះគឺស្ត្រីវ័យក្មេង ត្រូវបានបង្ក្រាប និងយន្ដហោះត្រូវបាន​បង្វែ​ទិស ឲ្យវិលត្រឡប់ទៅកាន់ ព្រលានយន្ដហោះដើមវិញ នៅរដ្ឋធានីតូរ៉ុងតូ។ យន្ដហោះប្រដេញពីរគ្រឿង ធុន F-18 បំពាក់ដោយកាំជ្រួចច្រើនដើម របស់ប្រទេសកាណាដា ត្រូវបានបញ្ជាការដ្ឋានកងទ័ព​ការពារ​អាកាស ប្រចាំនៅតំបន់អាមេរិកខាងជើង បញ្ជាឲ្យមកហោះអមយន្ដហោះដឹកអ្នកដំណើរនេះ។

យន្ដហោះបានចុះចតដោយគ្មានហេតុភេទអ្វីកើតឡើងឡើយ ហើយអ្នកដំណើរទាំងអស់ ក៏បានចេញ​ត្រឡប់​​ទៅវិញ តាមជើងយន្ដហោះថ្មី ក្នុងយប់ថ្ងៃដដែលនោះ ឆ្ពោះទៅប្រទេសគុយបាវិញដែរ។ ចំណែកឯ​ស្ត្រីប្រមឹកទាំងពីររូបវិញ ត្រូវបានចាប់ឃាត់ខ្លួនភ្លាម នៅពេលយន្ដះហោះចុះមកដល់ដី មុននឹងធ្វើការឃុំខ្លួន​ជាបណ្ដោះអាសន្ន នាពេលបន្ទាប់មក នៅនឹងព្រលានយន្ដហោះ៕

នគរបាល ឡើងមកនាំខ្លួនស្ត្រីវ័យក្មេង នៅបន្ទាប់ពីយន្ដហោះចុះចត នៅក្រោមក្រសែរភ្នែកក្ដៅក្រហាយ របស់អ្នកដំណើរផ្សេងទៀត។