មុន​នឹង​ក្លាយ​ជា​តារា​ល្បី តើ មាស សុខសោភា បាន​ឆ្លង​កាត់​អ្វី​ខ្លះ? (vdo)

ទម្រាំក្លាយជាតារាចម្រៀងល្បី និងទទួលបានកេរ្តិ៍ឈ្មោះ ក៏ដូចជាតម្លៃខ្ពស់ដូចសព្វថ្ងៃនេះ តើកញ្ញា មាស សុខសោភា តារាចម្រៀងប្រចាំឲ្យផលិតកម្មថោន បានឆ្លងកាត់ជីវិតបែបណាខ្លះ?
Loading...
  • ដោយ: ប្រាថ្នា ដោយ ក.ចាន់នីតា (ទាក់ទង៖ [email protected]) - ភ្នំពេញ ថ្ងៃទី១៥ កក្កដា ២០១៤
  • កែប្រែចុងក្រោយ: September 17, 2014
  • ប្រធានបទ: ជីវិតតារា
  • អត្ថបទ: មានបញ្ហា?
  • មតិ-យោបល់

មាស សុខសោភា ជាតារាចម្រៀងស្រីមួយរូប ដែលទទួលបានការគាំទ្រយ៉ាងច្រើន ពីស្រទាប់​មហាជន​ និង​ទស្សនិកជនក្នុងប្រទេស ក៏ដូចជាក្រៅប្រទេស ទាំងយុវវ័យ និងមនុសវ័យចំណាស់។ ប្រិយមិត្ត​ជាទូទៅ​ បាន​ចាត់ទុក តារាចម្រៀងសម្លេងខ្ពស់ មាស សុខ សោភា ថាជាតារាគំរូ ដោយសារតែតារាប្រជាប្រិយសម័យថ្មី​រូប​នេះ បានលះបង់ពេលវេលា ក្នុងការថែររក្សាធនធានធម្មជាតិ ដាំដើមឈើ និងចូលរួម ប្រឆាំការកាប់បំផ្លាញ​ព្រៃឈើ នៅតំបន់ភ្នំឱរ៉ាល់ខេត្តកំពង់ស្ពឺ។ សកម្មភាពដ៏កម្រ ដែលធ្វើឲ្យតារាចម្រៀង មានប្រជាប្រិយភាព​កើនឡើងថែមមួយកំរិតទៀត។ ខាងក្រោមនេះ ជាការរំលឹកឡើងវិញយ៉ាងសង្ខេប ពីជីវិតរបស់តារាចម្រៀង មាស សុខសោភា មុននឹងនាងបានមកដល់វិថីសិល្បៈដ៏រុងរឿងនេះ។

កញ្ញា មាស សុខសោភា កើតនៅថ្ងៃទី២៩ ខែមករា ឆ្នាំ១៩៨៤ ក្នុងខេត្តកំពង់ស្ពឺ មានឪពុកឈ្មោះ មាស សារឹម អតីតប្រធានមន្ទីរឧស្សាហកម្មខេត្តកំពង់ស្ពឺ ហើយម្ដាយឈ្មោះ សុខ វិលន់ ជាអតីតបុគ្គលិកនៅក្នុង​មន្ទីរ​ឧស្សាហកម្មខេត្ត។ នាងជាកូនទី២ នៅក្នុងគ្រួសារដែលបងប្អូនចំនួន៣នាក់៖ ទី១ លោក មាស សុខរតនៈ សព្វថ្ងៃអ្នកនិពន្ធបទចម្រៀង ទី២ ជារូបនាង និងទី៣ លោក មាស សុខវណ្ណៈ ជាទាហាន។

ក្រោយពីឪពុករបស់កញ្ញាទទួលមរណៈភាព នៅអំឡុងពេលដែលយុវតី មាស សុខសោភា កំពុងរៀន​នៅ​ថ្នាក់ទី១០ក្នុងវិទ្យាល័យព្រះបាទជ័យវរ្ម័នទី៧នោះ កញ្ញាបានឈប់ការរៀនសូត្រ ដោយសារតែនៅពេលនោះ បន្ទុក​គ្រួសារទាំងអស់ ត្រូវធ្លាក់មកលើកញ្ញា និងបងប្រុស ដែលត្រូវសម្រេចចិត្ត ដើរច្រៀងតាម​រោងការនៅ​តាម​ស្រុកស្រែ ដើម្បីបានកម្រៃតិចតួចយកមកផ្គត់ផ្គង់ ជីវភាពរស់នៅ។ បន្ទាប់មកទៀត តារាទើបនឹង​ដុះ​ពន្លក មាស សុខសោភា និងបងប្រុសបាន ផ្លាស់ប្តូពីការច្រៀងតាមរោងការ មកច្រៀងតាមភោជនីយដ្ឋាន​វិញម្ដង តែ​នាង​ទទួលបានកម្រៃ ត្រឹមពី១ទៅ២ដុល្លារប៉ុណ្ណោះ ក្នុងមួយថ្ងៃ។

នៅក្នុងអំឡុងឆ្នាំ ១៩៩៩ កញ្ញា មាស សុខសោភា បានចូលរួមប្រឡងចម្រៀង ក្នុងកម្មវិធីបារី Mild Seven សហការជាមួយទូរទស្សន៍ប៉ុស្ត៍លេខ៣ ហើយនៅពេលនោះ កញ្ញាទទួលបានចំណាត់ថ្នាក់លេខ ១។ ប៉ុន្តែ​កញ្ញាមិនត្រូវបានម្ចាស់កម្មវិធីផ្តល់សិទ្ធិ ឱ្យក្លាយជាអ្នកចម្រៀងប្រចាំកម្មវិធី និងក្លឹបរបស់គេទេ ព្រោះអ្នក​រៀបចំ​កម្មវិធីយល់ថា នាងមានរូបសម្រស់មិនស្អាត មិនសក្ដិសមធ្វើជាតារាចម្រៀងក្នុងក្លឹបរបស់ពួកគេទេ។

ជីវិតបន្តបន្ទាប់ពីអំឡុងពេលនោះ តមកប៉ុន្មានឆ្នាំក្រោយ តារាស្រីថ្មីនៅតែបន្តច្រៀង នៅតាមភោជនីយដ្ឋាន ដើម្បីបានកម្រៃមកចិញ្ចឹមជីវិត និងគ្រួសារ។ ប៉ុន្តែមុខរបរនេះ មិនបានធ្វើឲ្យតារា មាស សុខសោភា មានរស្មី​ចែងចាំងបានឡើយ។ រហូតមកដល់ ឆ្នាំ២០០៤ ជិវិតរបស់កញ្ញា បានទទួលពន្លឺនៃភាពជោគជ័យបន្តិចម្តងៗ ពោលនៅក្រោយពេលដែលកញ្ញា បានឈានជើងចូលក្នុងផលិតកម្ម រស្មីស្ទឹងសង្កែ។ បទចម្រៀងដំបូង ដែល​ទួលបានការគាំទ្រពីទស្សនិកជន នៅក្នុងផលិតនេះ គឺបទ«រស់នៅក្រោមទ្រូងបងសែនកក់ក្តៅ» និងបទ​«អូន​នឹក​នឹកបង»។

សូមជួបជាមួយបទ«អូននឹកនឹកបង»៖

ក្រោយពីមានការគាំទ្រ និងប្រជាប្រិយភាពគ្រាន់បើហើយ កញ្ញាបានចាកចេញពី​ផលិតកម្ម​ស្ទឹងសង្កែ ក្នុង​ឆ្នាំ​២០០៥ ដោយប្រឡូកចូលក្នុងផលិតកម្ម យូធូ(U2)។ ក្រោយមកញ្ញា នៅឆ្នាំ ២០០៨ កញ្ញាបានប្តូរទ្រនំមក​ផលិតកម្ម អ៊ឹម (M) វិញ។ នៅក្នុងផលិតកម្មអ៊ឹមបានមួយឆ្នាំ កញ្ញាបានចាកចេញមកផលិតកម្មសាន់ដេវិញ ក្នុងឆ្នាំ២០០៩។ ហើយនៅចុងក្រោយបង្អស់ កញ្ញាបានចូលមកផលិតកម្មថោន រហូតមកដល់សព្វថ្ងៃ។ ម្ចាស់​ពានអាណាចក្រតារា ផ្នែកចម្រៀងប្រជាប្រិយរូបនេះ ត្រូវបានគេចាត់ទុកថា ជាតារាចម្រៀងដែលចូល​ចិត្ត​ប្តូរ​ទ្រនំជាងគេ។ ប៉ុន្តែមានតែផលិតកម្ម ថោនមួយប៉ុណ្ណោះ ដែលគេឃើញថា កញ្ញាឈរជើងជាប់បានយូរ​ជាង​គេ។

យ៉ាងណាក៏ដោយ នៅក្រោមទ្រនំរបស់ផលិតថោន កេរ្តិ៍ឈ្មោះរបស់កញ្ញាកាន់តែល្បីខ្លាំងឡើង។ បទដំបូង​ដែលកញ្ញាទទួលបានប្រជាប្រិយភាពខ្លាំង ចាប់តាំងពីចូលផលិយកម្មមួយនេះ គឺបទ «I am Sorry» ដែល​ចាប់ដៃគួរជាមួយ តារាចម្រៀងប្រុស ករុណា ពេជ្រ ដែលទើបនឹងរះថ្មី។ រហូតមកដល់ពេលនេះ តារាចម្រៀង ដែលកំពុងទទួលភាពល្បីល្បាញខ្លាំងរូបនេះ បានទទួលពានពីកម្មវិធីអាណាចក្រតារា ចំនួនពីរដងហើយ ផ្នែក​ចម្រៀងប្រជាប្រិយ។

តារាចម្រៀង មាស សុខសោភា ជាតារាខ្មែរតែមួយដួងគត់ (រហូតមកដល់ថ្ងៃនេះ) ដែលត្រូវបានគេហទំព័រ​ចែកផ្សាយវីដេអូ យូធូប (Youtube) ក្រោមសេវាកម្មមួយហៅកាត់ថា វ៉េវ៉ូ (Vevo) ទទួលយកចម្រៀងរបស់​នាង ទៅផ្សាយនិងលក់ តាមបណ្ដាញអ៊ិនធើណែត បន្ទាប់ពីនាងបានច្រៀង ចម្រៀងប៉ុន្មានបទឲ្យផលិតកម្ម​ខ្មែរ-​អាមេរិកាំង​មួយនៅអាមេរិក កាលពីជាងមួយឆ្នាំមុន៕

សូមជួបជាមួយបទ «I am sorry»៖

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...