ករណីនេះ ត្រូវបានប្រព័ន្ធយុត្តិធម៌នៃទីក្រុងកេប៊ិច (Québec) ប្រទេសកាណាដា តាមដាននិងស៊ើបអង្កេត ដោយប្រើ​រយៈ​ពេលជិត១០ឆ្នាំមកហើយ។ ទីបំផុតទៅ នៅថ្ងៃចន្ទទី១៥ ខែកញ្ញាកន្លងទៅនេះ ចៅក្រម​សាលា​ក្ដីនៃទីក្រុង កេប៊ិច បានប្រកាសចោទប្រកាន់ អ្នកស្រី ឡេច ឡេងគី និងស្វាមី លោក ឈុន ស៊ីវ៉េង ថាមាន​ទោសនៅក្នុងបទប្រព្រឹត្តិ​ជា​ច្រើន។ ចៅក្រម ប៉ាទ្រិក ហេលី (Patrick Healy) បានសង្ខេបនៅក្នុងសាល​ក្រម​សម្រេចនោះថា៖ «ជនជាប់ចោទ បាន​ទទួលនូវផលិតផលឧក្រិដ្ឋ នៃជំនួញគ្រឿងញៀន ដោយមិនត្រឹម​តែ​ស្ដុកទុក នូវផលិតផលទាំងនោះទេ តែថែមទាំង​បាន​លាងសំអាត នូវប្រាក់កខ្វក់ ដែលចេញពីផលិតផល​ទាំង​នោះ ជាបន្តបន្ទាប់មកផង»។

អ្នកស៊ើបអង្កេត បានរកឃើញថា ការផ្ទេរលាងសំអាតប្រាក់កខ្វក់ទាំងនោះ ត្រូវបានធ្វើនៅក្នុងក្រុង កេប៊ិច នៅ​ក្នុង​ប្រទេស​កូឡំប៊ី ម៉ិចស៊ិច គុយបា បាហាម៉ាស ចាម៉ែអ៊ិក ផ្លរីដ អ៊ីស្ត្រាអែល ប៊ែលហ្សិក និងជាពិសេស​នៅ​ក្នុង​ប្រទេស​កម្ពុជា។

ប្រាក់ដែលលាងសំអាត ចេញពីការជួញដូរគ្រឿងញៀននោះ ត្រូវបានធ្វើឲ្យប្រែក្លាយទៅជាមាស ពេជ្រ អាគារ ឬត្រូវ​បានផ្ទេរតាមប្រព័ន្ធអេឡិកត្រូនិក ឬយកទៅដោយផ្ទាល់ ទៅកាន់ប្រទេសកម្ពុជា។ ចៅក្រម​បាន​ថ្លែង​បន្ត​ទៀត​ថា៖ «បើ​ទោះ​ជាគ្មានចំនួនទឹកប្រាក់ច្បាស់លាស់ ជាភស្ដុតាង តែនៅមានភស្តុតាងផ្សេងទៀត ដែល​គេ​អាច​ដឹង​បានថា ចំនួនទឹក​ប្រាក់មានចំនួនច្រើនជាង ១០០លានដុល្លារ»។

ចៅក្រមបានពន្យល់ទៀតថា អ្នកស្រី ឡេច និងលោក ឈុន ធ្លាប់មានធនាគារនៅក្នុង​ប្រទេសកម្ពុជារួច​ហើយ ហើយ​ប្ដីប្រពន្ធទាំងពីរនាក់ ចង់ប្រកបរបរនេះ នៅក្នុងប្រទេសកាណាដាជាបន្តទៀត។ លោកចៅក្រម បាន​បន្ត​ទៀត​ថា៖ «ហើយ​ពួកគេត្រូវការលុយ ដើម្បីប្រកបរបរនេះបាន»។

ការវិន្និច្ឆ័យទោស នឹងត្រូវប្រកាសឲ្យដឹង នៅខែតុលាខាងមុខ។ តែបើតាមច្បាប់របស់ប្រទេសកាណាដា ជន​សង្ស័យ​អាចនឹងទទួលទោសរហូតដល់១០ឆ្នាំ នៅក្នុងពន្ធនាគារ ជាមួយនឹងការរឹបអូសយកទ្រព្យសម្បត្តិ​ទាំង​អស់។ សវនាការ​នៅថ្ងៃចន្ទ បានបង្ហើបឲ្យដឹងដែរថា ប្ដីប្រពន្ធទាំងពីរនាក់ បានព្យាយាមសុំលិខិត​ឆ្លង​ដែន ពី​ស្ថានទូតនៃព្រះរាជា​ណា​ចក្រ​កម្ពុជា ប្រចាំនៅប្រទេសកាណាដា ដែលធ្វើឲ្យគេគិតថា ជនសង្ស័យ​អាច​នឹង​មានបំណងរត់គេចខ្លួន ដោយប្រើ​លិខិត​ឆ្លងដែននោះ។ ប៉ុន្តែចៅក្រមបានដាក់ល័ក្ខខ័ណ្ឌយ៉ាងតឹងរ៉ឹង ថា​កង​កម្លាំង​នគរបាលនៃប្រទេសកាណដា នឹង​ត្រួត​ពិនិត្យ​យ៉ាង​ដិតដល់ ធ្វើយ៉ាងណាមិនឲ្យអ្នកទាំងពីរ​អាច​គេច​ខ្លួន​រួច ពីសំណាញ់ច្បាប់ឡើយ៕