លោកនាយករដ្ឋមន្រ្តី ហ៊ុន សែន កាលពីថ្ងៃទី១៨ ខែកញ្ញា ឆ្នាំ២០១៤ នៅសណ្ឋាគារសូហ្វីតែលភ្នំពេញ ចូល​រួមក្នុងការផ្សព្វផ្សាយ ផែនការយុទ្ឋសាស្រ្តអភិវឌ្ឍន៍ជាតិ (ផ.យ.អ.ជ) ឆ្នាំ២០១៤-២០១៨ បានធ្វើការណែនាំ​ដល់រដ្ឋមន្រ្តីក្រោមឱវាទទំាងអស់ ដែលជាសមាជិកសមាជិកា នៃរាជរដ្ឋាភិបាលអាណត្តិទីប្រាំ ត្រូវតែចូលបំភ្លឺ​គ្រប់គ្នា ដោយមិនចាំបាច់សួរនាំពីលោក (ហ៊ុន សែន) ថាគួ ឬមិនគួចូលនោះទេ។

លោកនាយករដ្ឋមន្រ្តី បានបង្ហាញពីការគាំទ្ររបស់ខ្លួនចំពោះរដ្ឋសភា ពិសេសគណកម្មការទី៧ថា៖ «ខ្ញុំពិត​ជាមានការអបអរសារទរ ជាមួយនឹងការរួមគ្នាដោះស្រាយបញ្ហា នៅក្នុងក្របខណ្ឌសភា។ ព្រោះដំណើរ​ការ​លទ្ធិប្រជាធិបតេយ្យសេរីពហុបក្ស គឺដំណើរការនៅក្នុងសភានោះឯង។ គេអត់និយាយនៅក្រៅ តាមចិញ្ចើម​ថ្នល់ ឬការនិយាយដើម្បីធើ្វការឃោសនាទេ។»

ទោះយ៉ាងណាក៏ដោយ ការលើកឡើងខាងលើនេះ ត្រូវបានសាធារណៈមតិមើលឃើញថា លោកនាយក​រដ្ឋមន្រ្តីហ៊ុន សែន កំពុងគេចវេស និងទំនងជាចង់ដោះខ្លួន ពីការទទួលខុសត្រូវនានា ដែលបានកើតឡើង​ក្នុងរយៈកាលប៉ុន្មានឆ្នាំ កន្លងមកនេះ។ ផ្ទុយទៅវិញ ការទទួលស្គាល់ និងឯកភាពរបស់លោក​នាយក​រដ្ឋមន្រ្តី​កម្ពុជារូបនេះ ដែលបានគាំទ្រឲ្យមានការកោះហៅរដ្ឋមន្ត្រីក្រោមឱវាទខ្លួន ទៅសួរនាំក្នុងសភានេះ ដូចជាចង់​បង្ហាញ​ពីអំណាចរបស់ខ្លួនយ៉ាងពេញទំហឹង ក្នុងការបង្គាប់បញ្ជា ទៅលើរដ្ឋមន្រ្តីទាំងនោះជាជាង។

អំណាចលោកនាយករដ្ឋមន្រ្តី ត្រូវបានបង្ហើបដោយខ្លួនលោក យ៉ាងដូច្នេះថា៖ «ឯកឧត្តម លោកជំទាវជា​រដ្ឋមន្ត្រីនានា កុំចាំបាច់ មកសួរនាយករដ្ឋមន្ត្រីថា ខ្ញុំទៅឆ្លើយ ឬអត់?។ បានសេចក្តីថា ឱ្យតែគណៈកម្មការ​នានា របស់រដ្ឋសភាកោះហៅ ទៅសួរ គឺត្រូវតែទៅ ហើយក៏កុំមក សួរនាយករដ្ឋមន្ត្រីថា ខ្ញុំគួរតែឆ្លើយបែប​ណា?។ (...) ត្រូវមើលក្នុងរដ្ឋធម្មនុញ្ញ មើលក្នុងច្បាប់ឱ្យច្បាស់ គឺរដ្ឋមន្ត្រីទទួលខុសត្រូវ ចំពោះមុខនាយក​រដ្ឋមន្ត្រី និងសភា។»

ការលើកឡើងខាងលើ ត្រូវបានមន្រ្តីម្នាក់នៃគណបក្សសង្គ្រោះជាតិ ដែលសុំមិនបញ្ចេញឈ្មោះ វាយតម្លៃថា ជាការរុញទូកបណ្តោយទឹក របស់លោក ហ៊ុន សែន។ មន្ត្រីរូបនោះបានបន្តថា លោកនាយករដ្ឋមន្រ្តី បាន​ប្រកាស«ព្រមាន»ដោយប្រយោលទៅគ្រប់រដ្ឋមន្រ្តីទាំងអស់ ឲ្យទទួលខុសត្រូវរៀងៗខ្លួន ប្រសិនរដ្ឋសភារក​ឃើញ​កំហុសឆ្គងណាមួយ នៅក្នុងស្ថាប័នក្រសួងដែលខ្លួនគ្រប់គ្រងនោះ។ លោកបានប្រៀបធៀបការថ្លែង​របស់លោក ហ៊ុន សែន ទៅនឹងយុទ្ធសាស្ត្រមួយ ដែលត្រូវបានក្រុមខ្មែរក្រហម ធ្លាប់បានយកមកប្រើ ក្នុងរយៈ​កាលបីឆ្នាំប្រាំបីខែម្ភៃថ្ងៃ នោះគឺ «ក្បាលអ្នកណា សក់អ្នកនោះ»។

ការកោះហៅរដ្ឋមន្ត្រីក្រសួង អប់រំ យុវជន និងកីឡា កាលពីថ្ងៃទី១៧ ខែកញ្ញា កន្លងទៅ ជាកោះហៅលើក​ទី​មួយ ដែលគណបក្សសង្គ្រោះជាតិ មានឱកាសយកយន្តការរដ្ឋសភាជាតិ ក្នុងការដោះស្រាយបញ្ហាជូនរាស្រ្ត និងប្រទេសជាតិ។ តាមការគ្រោងទុក គណកម្មការនាននៃរដ្ឋសភា នឹងកោះហៅរដ្ឋមន្រ្តីទាំងអស់ ដែលជា​សមាជិករដ្ឋាភិបាល របស់គណបក្សប្រជាជនកម្ពុជា ជាបន្តបន្ទាប់ទៀត ក្នុងពេលខាងមុខនេះ។ ប៉ុន្តែទោះជា​ការថ្លែងរបស់លោកនាយករដ្ឋមន្ត្រី ប្រាប់ឲ្យមន្ត្រីក្រោមឱវាទរបស់ខ្លួន ឲ្យចូលទៅបំភ្លឺនៅក្នុងសភាជាតិ​ក៏​ដោយ តែលោកនៅមិនទាន់ប្រកាសឲ្យដឹង ពីខ្លួនលោកផ្ទាល់ ថានឹងត្រូវចូលខ្លួនមកបំភ្លឺដែរឬទេ ប្រសិនជា​រដ្ឋសភា​កោះ​ហៅនោះ៕