បណ្ដុះ​សុដន្ដ​«ទីបី» ដើម្បី​ឈប់​ឲ្យ​ប្រុស​ចាប់​អារម្មណ៍ មក​លើ​ខ្លួន (vdo)

ក្នុងអាយុ២១ឆ្នាំ យុវតីដែលរស់នៅក្នុងរដ្ឋផ្លរីដា សហរដ្ឋអាមេរិក មានសុបិន្ដចង់ក្លាយជា តារានៅតាមកញ្ចក់ទូរទស្សន៍ ហើយបានបណ្ដុះ«ដោះទីបី»មួយឡើង។ គេហទំព័រសារព័ត៌មានមួយ នៅអាមេរិក បានបញ្ជាក់ពីរឿងនេះ តែ​នៅ​បាន​បង្ក​មន្ទិល​នៅ​ឡើយ ថា​តើសុដន្ដទីបីនោះ ជាសុដន្ដពិតឬយ៉ាងណា។
Loading...
  • ដោយ: ឈូករ័ត្ន ដោយ ឈូករ័ត្ន (ទាក់ទង៖ [email protected]) - ប៉ារីស ថ្ងៃទី២៣ កញ្ញា ២០១៤
  • កែប្រែចុងក្រោយ: September 24, 2014
  • ប្រធានបទ: សោភ័ណភាព
  • អត្ថបទ: មានបញ្ហា?
  • មតិ-យោបល់

នាងបានអះអាងថា គ្រូពេទ្យជាច្រើន ដែលមានចំនួនពី៥០ទៅ៦០នាក់ បានបដិសេធបំណងរបស់នាង តែ​គ្រូ​ពេទ្យម្នាក់នោះ បានយល់ព្រមដាក់សុដន្ដទីបីនេះឲ្យនាង។ យុវតីអាយុ២១ឆ្នាំបានបញ្ជាក់ច្បាស់ថា មូលហេតុ​ដែលធ្វើឲ្យនាងសម្រេច ដាក់បន្ថែមសុដន្ដទីបីនេះ ដោយសារតែនាងចង់បញ្ឈប់ចំណាប់អារម្មណ៍របស់បុរស ដែលតែងតែមើលមកនាង ដូច«ក្របីនិងចេក» និងម្យ៉ាងទៀត ដើម្បីឈប់ចេញដើរជាមួយ​បុរសៗទាំង​នោះ។

មានឈ្មោះថា ចាស្មីន ទ្រីឌីវិល (Jasmine Tridevil) យុវតីដែលរស់នៅក្នុងក្រុង តាមប៉ា (Tampa - រដ្ឋផ្លរីដា ភាគអាគ្នេយ៍សហរដ្ឋអាមេរិក) បានពន្យល់ថានាងបានចំណាយប្រាក់ ដែលនាងសន្សំទុកក្នុងរយៈពេល២ឆ្នាំ ចំនួនដល់ទៅពីរម៉ឺនដុល្លារ ដើម្បីការវះកាត់។ នាងបានថ្លែងក្នុងកិច្ចសម្ភាសមួយ នៅតាមវិទ្យុថា៖ «នៅពីលើ​សុដន្ដ មានបណ្ដុះទាំងក្បាលដោះតូចមួយផង ហើយខ្ញុំបានសាក់វានៅជុំវិញ ដើម្បីឲ្យក្លាយជាក្បាល​ដោះដ៏​ពិត​មួយ»។

នាង ទ្រីឌឹវិល បានសរសេរនៅក្នុងទំព័រ ទ្វីសធើរ និងហ្វេសប៊ុក កាលពីខែសីហា ថានាងចង់ក្លាយជាតារា នៅ​តាមកម្មវិធីពិសេសៗរបស់ទូរទស្សន៍។ «ខ្ញុំបានរៀបចំក្រុមការងារថតវីដេអូមួយឡើង ហើយខ្ញុំបានថត​ឈុត​ឆាកទាំងឡាយដែលខ្ញុំចង់បាន បន្ទាប់មកខ្ញុំបានបង្ហាញយុទ្ធនាការទាំងនេះ ទៅឪពុកម្ដាយរបស់ខ្ញុំ។ ម្ដាយខ្ញុំ​មិនសប្បាយចិត្តទេ តែឪពុកខ្ញុំបានយល់ព្រមពីជម្រើសរបស់ខ្ញុំ។» នាងបញ្ជាក់ពីគោលបំណងរបស់នាងថា៖ «នោះគឺដើម្បីអាចចូលទៅក្នុងកម្មវិធីមួយ របស់ស្ថានីយ៍ទូរទស្សន MTV»។ នាងថែមទាំងបានបង្កើត​ការ​ឆ្នៃ​ម៉ូដមួយ យ៉ាងពិសេសថែមទៀត នោះគឺអាវទ្រនាប់សម្រាប់ដោះបី។ នាងនិយាយថា៖ «ខ្ញុំឆ្កួតហើយ តែខ្ញុំដឹង​ខ្លួនថាកំពុងធ្វើអ្វី»។

ប៉ុន្តែគេហទំព័រ Snopes.com ដែលមានឯកទេសខាងពិនិត្យស៊ើបអង្កេត មើលពាក្យចចាមអារាមនោះ បាន​បញ្ជាក់ថា ករណី​នេះជារឿង«បោកប្រាស»មួយ។ គេហទំព័របានសរសេរថា យុវតីនេះ បានបដិសេធមិន​បង្ហាញ​​អត្ត​សញ្ញាណ​ពិតរបស់ខ្លួន ហើយមិនបានបង្ហាញសូម្បីតែមួយដង នូវសុដន្ដទាំងបីនោះ ដោយគ្មាន​អាវ​ទ្រនាប់​ឡើយ។ រូបថត និងវីដេអូ ដែលសុទ្ធតែមានប្រភពពីនាងខ្លួនឯងផ្ទាល់ បានបង្ហាញពីពណ៌ស្បែក​ដើម​ទ្រូង​ទីបី​នោះ ខុសពីពណ៌ស្បែកដែលនៅលើដងខ្លួនរបស់នាង ដែលធ្វើឲ្យគេជឿថា រូបភាពទាំងនេះ អាច​​ជា​ការ​កាត់ត​ដើម្បីទាក់ទាញភាពល្បីល្បាញ៕

ខាងក្រោមនេះ ជាវីដេអូ ដែលនាងបានផ្សាយ នៅលើគេហទំព័រយូធូប៖

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...