អតីតម្ដាយចុង និងអតីតកូនដើមរៀបការ បន្ទាប់ពីតតាំងក្ដីអស់ច្រើនខែឆ្នាំ
- ដោយ: ឈូករ័ត្ន ដោយ ឈូករ័ត្ន (ទាក់ទង៖ [email protected]) - ប៉ារីស ថ្ងៃទី០៤ តុលារ ២០១៤
- កែប្រែចុងក្រោយ: October 05, 2014
- ប្រធានបទ: ក្ដីស្នេហ៍
- អត្ថបទ: មានបញ្ហា?
- មតិ-យោបល់
-
អ្នកស្រី អេលីហ្សបែត ឡូរ៉ង់ (Elisabeth Lorentz) អាយុ៤៨ឆ្នាំ បានថ្លែងប្រាប់អ្នកសារព័ត៌មានថា៖ «នៅទីបំផុត យើងបានមកដល់ថ្ងៃដ៏ពិសេសហើយ! ខ្ញុំគ្រាន់តែសង្ឃឹមថា ប្រវត្តិតស៊ូរបស់ពួកយើង អាចជាប្រយោជន៍ដល់គូរស្នេហ៍ផ្សេងទៀត ដែលមានស្ថានភាពព្រហាក់ប្រហែលគ្នា ហើយដែលខ្ញុំដឹងថា មានចំនួនយ៉ាងច្រើន។»
គ្មានជាប់សាច់ឈាមអ្វីសោះ ...
ជាខែច្រើនឆ្នាំណាស់មកហើយ ប្រព័ន្ធយុត្តិធម៌បារាំង បានហាមមិនឲ្យអ្នកទាំងពីររៀបការនឹងគ្នាទេ ក្រោមហេតុផលថា អេលីហ្សាបែត ធ្លាប់ជាប្រពន្ធរបស់ឪពុករបស់កូនដើម លោក អេរិច ហូដ័រ (Eric Holder) អាយុ៤៥ឆ្នាំ ដែលបានក្លាយជាបុរសកំពូលស្នេហ៍របស់អ្នកស្រី ចាក់ទឹកមិនលេច។ អ្នកទាំងពីរ មិនមានជាប់សាច់ឈាមអ្វីនឹងគ្នាទាល់តែសោះ ខណៈច្បាប់របស់ប្រទេសបារាំង បានហាមឃាត់អាពាហ៍ពិពាហ៍ ឬចំណងស្នេហ៍ ដែលមានជាប់ខ្សែរស្រឡាយដោយផ្ទាល់។
នៅក្រៅប្រព័ន្ធតុលាការ អ្នកទាំងពីរបាននាំយកបុព្វហេតុស្នេហ៍របស់ពួកគេ សរសេរឡើងទៅដល់វិមានប្រធានាធិបតីបារាំងថែមទៀត។ ប៉ុន្តែចម្លើយដែលពួកគេទទួលបាន ជាក្រដាសមួយសន្លឹក ចុះហត្ថលេខាដោយ ប្រធានាធិបតី ហ្វ្រង់ស៊័រ ហូឡង់ (François Hollande) រំលឹកអ្នកទាំងពីរ ពីច្បាប់រដ្ឋប្បវេណី មាត្រា១៦១ ដែលនៅតែហាមឃាត់អាពាហ៍ពិពាហ៍នេះ។
លុះត្រាមកដល់ខែមិថុនា ឆ្នាំ២០១៤នេះ ទើប អេលីហ្សាបែត និង អេរិច ទទួលបានដីការសម្រេចរបស់តុលាការក្រុង ម៉េស (Metz) ពីសិទ្ធិរៀបអាពាហ៍ពិពាហ៍របស់ពួកគេ ហើយលោករដ្ឋអាជ្ញាដែលតែងតែជំទាស់ នូវចំណងស្នេហ៍របៀបនេះ តាំងពីឆ្នាំ២០១៣មកនោះ មិនបានប្ដឹងឧទ្ទរណ៍ឡើយ។
ស្រុកច្បាប់និយាយពីច្បាប់
ម៉ាទីជើ អៀហាដ (Mathieu Ehrhardt) មេធាវីរបស់គូរស្នេហ៍ទាំងពីរ បានធ្វើអត្ថាធិប្បាយថា៖ «យើងមិនបានដឹងពីមូលហេតុ ដែលឈានទៅដល់ការសម្រេចដីការ របស់តុលាការនោះទេ ប៉ុន្តែយើងតែងតែបានបញ្ជាក់ថា ច្បាប់របស់ប្រទេសបារាំង មិនបានស្របទៅនឹងទិដ្ឋភាពទូទៅ នៃអនុសញ្ញាអ៊ឺរ៉ុបស្ដីពីសិទ្ធិមនុស្សនោះទេ ហើយនោះជាអ្វីដែលបានប៉ះពាល់យ៉ាងធ្ងន់ធ្ងរ ទៅដល់សិទ្ធិរៀបអាពាហ៍ពិពាហ៍ និងជីវិតឯកជន។»
គួរំលឹកដែរថា នៅឆ្នាំ២០០៥ តុលាការសិទ្ធិមនុស្សរបស់អ៊ឺរ៉ុប បានពិន័យប្រព័ន្ធច្បាប់របស់ចក្រភពអង់គ្លេស នៅក្នុងសំនុំរឿងប្រហាក់ប្រហែលគ្នា។ នៅចុងឆ្នាំ២០១៣ តុលាការកំពូលបារាំង ក៏បានសម្រេចឲ្យកូនដើម ជាស្ត្រីមួយរូប រៀបការនឹងឪពុកចុងរបស់ខ្លួនដែរ ក្រោមមូលហេតុថា ជាករណីពិសេសមួយ។
ក្នុងអាពាហ៍ពិពាហ៍របស់ អេលីហ្សាបែត និងអេរិច កាលពីថ្ងៃសៅរិ៍ ទៅ៤ ខែតុលានេះ ឪពុកកូនកម្លោះដែលជាអតីតស្វាមីរបស់ អេលីហ្សាបែត ក៏មានវត្តមានរបស់លោក ក្នុងឱកាសនោះដែរ ទាំងនៅក្នុងកម្មវិធីសាសនា និងកម្មវិធីជប់លៀង។ អេលីហ្សាបែត បាននិយាយប្រកបដោយជំនឿជាក់ លើអតីតស្វាមីរបស់ខ្លួនថា៖ «ជានិច្ចជាកាល គាត់តែងតែគាំទ្រពួកយើង»៕