សុខ ស្រីនាង៖ ចង់គេយកប្តីជានាយករដ្ឋមន្ត្រី ក៏មិនទើសក្បាលនរណា...
- ដោយ: ប្រាថ្នា ដោយ ប្រាថ្នា (ទាក់ទង៖ [email protected] ) - ភ្នំពេញ ថ្ងៃទី០៦ តុលា ២០១៤
- កែប្រែចុងក្រោយ: October 07, 2014
- ប្រធានបទ: តារា
- អត្ថបទ: មានបញ្ហា?
- មតិ-យោបល់
-
«ចង់គេយកប្តី ជានាយករដ្ឋមន្ត្រី ក៏មិនទើសក្បាលនរណាឡើយ» នេះជាការលើកឡើង របស់តារាស្រីសាច់សខ្ចី និងជាម៉េម៉ាយចាយរាងមិនចាញ់ក្រមុំ អ្នកនាង សុខ ស្រីនាង។ ការលើកឡើងរបស់អ្នកម៉េម៉ាយរូបនេះ ធ្វើឡើងបន្ទាប់ពីមានព័ត៌មានជាច្រើនពីមហាជន ជាពិសេសនោះ គឺព័ត៌មានចចាមអារ៉ាម ចេញពីមាត់អតីតស្វាមីនាង លោក ស៊ី សុវត្តិ ផ្ទាល់តែម្តង ដែលថា បើប្រុសៗណាចង់បានបេះដូង សុខ ស្រីនាង មកថ្នមថ្នាក់ ទាល់តែបុរសនោះមានប្រាក់ មានអំណាច មានវីឡា។ បើគ្មានរបស់ទាំងនេះទេ ប្រញាប់ដកខ្លួនចេញឲ្យឆ្ងាយទៅ។
តារាចម្រៀងរបស់ផលិតកម្មសាន់ដេរូបនេះ បានប្រតិកម្មបន្តទៀតថា ហេតុអ្វីបានជាអតីតស្វាមីរបស់នាង ចូលចិត្តបញ្ចេញពាក្យចចាមអារាមបញ្ចើចបញ្ចើឱ្យនាងខ្លាំងម្លេះ បើពេលនេះគេមានភរិយាថ្មី រស់នៅជាមួយគ្នាសុខសាន្តហើយនោះ?
ក្រោយពេលដែរម៉េម៉ាយរូបស្រស់រូបនេះ បានបង្ហាញខ្លួនឡើងវិញ នៅក្នុងពិភពសិល្បៈរហូតស្តារបានកេរ្តិ៍ឈ្មោះល្បីជាថ្មីនោះ នាងហាក់បីអន្ទងបានដួងចិត្តបុរសៗជាច្រើន ដែលមានទ្រព្យ បុណ្យស័ក្ក មិនថាទាំងក្នុងនិងក្រៅប្រទេសនោះទេ បានប្រាថ្នាសុំចូលខ្លួន មកព្យាបាលរបួសបេះដូងរបស់នាង។ ទស្សនិកជនមួយចំនួន ក៏ធ្លាប់បានលើកឡើងដែរថា ថ្វីត្បិតតែអ្នកនាងជាម៉េម៉ាយក៏ពិតមែន ប៉ុន្តែរូបសម្ផស្សវិញក្រមុំសុំខ្មាស ហើយអ្នកដែលបានចូលមកស្អំបេះដូងរបស់នាង បន្ទាប់ពីប្រេះឆាជាមួយតារាចម្រៀងរួមអាជីព លោក ស៊ី សុវត្តិ នោះ គឺប្រាកដជាបុរសអ្នកមានទ្រព្យស្តុកស្តម្ភណាម្នាក់ហើយ។
តបនឹងព័ត៌មានចចាមអារាមទាំងឡាយ ស្រង់សម្តីដោយ កាសែតក្នុងស្រុកមួយ អ្នកមេម៉ាយរូបស្រស់ សម្តីផ្អែមរូបនេះបានឲ្យដឹងថា៖ «សម្រាប់ជីវិតខ្ញុំ ការជ្រើសរើសគូស្រករថ្មី ពេលណានោះ គឺមិនទាន់កំណត់ទេ តែខ្ញុំមានល័ក្ខខ័ណ្ឌផ្ទាល់ខ្លួន។ បុរសដែលខ្ញុំត្រូវសាងស្នេហ៍ ចាំបាច់មិនមែនជាគូកំណាន់ចិត្តគេ បែបអាថ៌កំបាំងជាដាច់ខាត។ ខ្ញុំត្រូវការស្នេហាមួយបើកចំហ ហើយក៏ត្រូវការអាពាហ៍ពិពាហ៍ត្រឹមត្រូវតាមប្រពៃណីដែរ ប៉ុន្តែជាបុរសត្រូវមានចិត្តស្មោះ និងចេះទទួលខុសត្រូវ ហើយឲ្យមានចិត្តស្មោះចំពោះភរិយាផង។»
អ្នកនាងអះអាងបន្តថា គូស្នេហ៍អនាគតរបស់នាង នឹងមិនសំដៅលើទ្រព្យធនទេ ទោះក្រក៏ទទួលយកដែរ។ បើអញ្ចឹងមែន ចាំមើលទៅមើល៍ ថាតើមាននរណាខ្លះ នឹងត្រៀមទៅតម្រង់ជួរ?