ប្រធានសហគមន៍ខ្មែរកម្ពុជាក្រោម ត្រូវជនមិនស្គាល់មុខគម្រាមសម្លាប់
- ដោយ: អ៊ុម វ៉ារី ដោយ អ៊ុម វ៉ារី (ទាក់ទង៖ [email protected]) - ភ្នំពេញ ថ្ងៃទី០៨ តុលា ២០១៤
- កែប្រែចុងក្រោយ: October 08, 2014
- ប្រធានបទ: បាតុកម្មប្រឆាំងវៀតណាម
- អត្ថបទ: មានបញ្ហា?
- មតិ-យោបល់
-
ចំពោះមុខអ្នកសារព័ត៌មាន នាទីលានប្រជាធិបតេយ្យ កាលពីព្រឹកថ្ងៃទី៨ ខែតុលា ឆ្នាំ២០១៤នេះ ប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា បានបញ្ជាក់ប្រាប់ថា លោកត្រូវបានជនមិនស្គាល់មុខ គំរាមតាមទូរស័ព្ទថានឹងបាញ់សម្លាប់រូបលោក បើលោកនៅតែដឹកនាំប្រឆាំង នឹងប្រទេសវៀតណាមនោះ។ លោកបានបញ្ជាក់ថា ជនដែលបានគម្រាមសម្លាប់រូបលោកនោះ បានទាក់ទងមករួបលោក ជាច្រើនដងមកហើយ ឲ្យលោកប្រយ័ត្នខ្លួន ហើយបញ្ឈប់ការដឹកនាំធ្វើបាតុកម្ម ការតវ៉ានៅមុខស្ថានទូតវៀតណាម។ ជនមិនស្គាល់មុខនោះ បានបញ្ជាក់ប្រាប់លោកថា «នៅមុខស្ថានទូតវៀតណាមនោះ មានទ័ពយួនច្រើនណាស់។ លោកឯងជាមេដឹកនាំនេះ គេនឹងបាញ់សម្លាប់។»
អតីតសមាជិកព្រឹទ្ធសភារូបនេះ បានបង្ហាញនូវជំហររបស់ខ្លួនថា លោកនឹងមិនខ្លាចចំពោះការគម្រាមទាំងនោះទេ។ លោកបានចេញមុខ ក្នុងការដឹកនាំបាតុកម្ម ប្រឆាំងនឹងប្រទេសវៀតណាមនេះ មានន័យថាលោកបានត្រៀមខ្លួន ស្លាប់រួចជាស្រេចទៅហើយ ចំពោះរឿងការពារទឹកដីខ្មែរកម្ពុជាក្រោមនេះ។ លោកបញ្ចាក់ដូច្នេះថា៖ «ទៅខ្លាចធ្វើអ្វី ទឹកដីនេះជាដឹកដីរបស់ខ្មែរ មិនមែនជាទឹកដីយួនទេ។ (…) យើងគ្មានការព្រួយទេ យើងនៅតែដឹកនាំធ្វើបាតុកម្ម យើងអត់ខ្លាចទេ ពេលមានបញ្ហាអី យួនទេដែលជាអ្នកទទួលខុសត្រូវ ។»
ឆ្លើយទៅនឹងការចោទសួរ របស់ទស្សនាវដ្តីមនោរម្យ.អាំងហ្វូ ទាក់ទងនឹងការដាក់ពាក្យបណ្ដឹង លោក ថាច់ សេដ្ឋា បានបញ្ជាក់ថា មកទល់នឹងពេលនេះ លោកនៅមិនទាន់រៀបចំធ្វើនៅឡើយ ក្នុងរឿងគម្រាមបាញ់សម្លាប់នេះ។ លោកបន្តថា តែលោកបានប្រាប់ ទៅក្រុមអាជ្ញាធររួចរាល់ហើយ ហើយលោកក៏កំពុងស្រាវជ្រាវរកប្រភព ទីតាំងរបស់ជនដែលបានហៅទូរស័ព្ទ មកគម្រាមនោះដែរ។
លោកបានបញ្ជាក់ថា តាមរយៈទូរស័ព្ទខ្សែមុន (កាលពីម្សិលម៉ិញ) បានហៅមកពីប្រទេសកាណាដា ប៉ុន្តែហៅមកចាប់តាំងពីយប់ម៉ិញ ជាបន្តបន្ទាប់មកទល់ពេលនេះ មិនអាចមើលឃើញលេខ (Privete) ទេ។ ទស្សនាវដ្តីមនោរម្យ.អាំងហ្វូ នៅមិនទានមានការបញ្ជាក់ណាមួយ ច្បាស់លាស់ពីមន្រ្តីអាជ្ញាធរមានសមត្ថកិច្ចកម្ពុជាបាននៅឡើយ ចំពោះការថ្លែងលើកឡើងខាងលើ៕