ក្នុងសន្និសិទសារព៌ត័មាន នៅ​សកល​វិទ្យាល័យ​ខេមរៈ កាល​ពី​ព្រឹក​ថ្ងៃ​ទី១៣ ខែ​តុលា​នេះ បណ្តា​ក្រុម​យុវជន និង​សហគម​នៃ​អ្នក​រងគ្រោះ​ដោយ​បញ្ហា​ដីធ្លី​ជា​ច្រើន នៅ​តែ​បន្ត​សម្តែង​ការ​ព្រួយ​បារម្មណ៍​​របស់ពួកគេ នៅ​ចំពោះ​ការ​បណ្តេញ​ចេញ​ដោយ​បង្ខំ និង​គ្មាន​​ដំណោះ​ស្រាយ​ពី​រដ្ឋាភិបាល​។ ផ្ទុយ​ទៅ​វិញ រដ្ឋាភិបាល​កម្ពុជា បែរ​ជា​ទទួល​យក​ជនជាតិ​ដទៃ មក​បន្ថែម​បន្ទុក​លើ​ការ​ទទួល​ខុស​ត្រូវ​របស់​ខ្លួន និង​ផ្តល់​ការ​លំបាក​ដល់​ពលរដ្ឋ​រង​គ្រោះ ដោយ​បញ្ហា​ដីធ្លី​ជា​បន្ត​បន្ទាប់ នា​ពេល​អនាគត។

សម្រាប់​លោក កែម ឡី អ្នក​វិភាគ​ឯករាជ្យ ដែល​មាន​វត្តមាន​នៅ​ក្នុង​សន្និសីទ​ការសែត​នោះ​ដែរ បាន​លើក​ឡើង​ថា អ្វី​ទាំង​នោះ មិន​មែន​ជា​បញ្ហា​ដែល​ដោះស្រាយ​មិន​បាន​ទេ។ លោក​បាន​ធ្វើការ​រំលឹក​ថា រដ្ឋាភិបាល​អូស្ត្រាលី​បច្ចុប្បន្ន កំពុង​រង​នូវ​ការ​រិះគន់​ពី​បណ្តា​ប្រទេស​ធំៗ​ជា​ច្រើន។ តែ​សម្រាប់​កម្ពុជា​វិញ លំហូ​ចូល​នៃ​ជន​អន្តោប្រវេសន៍ ដែល​ជា​ការ​ព្រួយ​បារម្ភ​ចំពោះ​មុខ​នោះ គឺ​«ជន​អន្តោប្រវេសន៍​វៀតណាម»។

លោកថា មកដល់ពេលនេះ បើដាក់ជាការព្រួយបារម្ភ លើអន្តោប្រវេសវៀតណាម ក៏វាហាក់ដូចជា​ចង់​ជ្រុល​ពេលទៅហើយ។ ឧទាហរណ៍ ករណីសិប្បកម្មមួយចំនួន របស់ជនជាតិវៀតណាម ដែលមានកម្មករជា​ជន​ជាតិរបស់ខ្លួន (វៀតណាម) ក្នុងមួយសិប្បកម្មប្រមាណ៥០ ទៅ៦០នាក់។ ហើយសិប្បកម្មរបស់វៀតណាម​ទាំងនោះ នៅក្នុងប្រទេសកម្ពុជាមានយ៉ាងច្រើនសន្ធឹកសន្ធាប់ នៅស្ទើរទូទាំងប្រទេសកម្ពុជា។ វត្តមាននៃ​ប្រជាជនវៀតណាមទាំងនោះ មិនអាចអាជ្ញាធរថ្នាក់ក្រោមណាម្នាក់ ចូលទៅធ្វើ«ស្ថិតិ»បានឡើង ព្រោះក្រុម​ទាំងនោះមានខ្នងក្រាស់ និងខ្នងបង្អែកយ៉ាងធំ រឹងមាំពីថ្នាក់លើរបស់គេ ក្នុងប្រទេសកម្ពុជា។

យ៉ាងណាក៍ដោយ ការគ្រប់គ្រងស្ថិតិនៃការរស់នៅ ក្នុងតំបន់មួយជាតួនាទីរបស់នគរបាល។ លោក កែម ឡី បញ្ជាក់ថា ករណីទាំងអស់នេះ មានតែនគរបាលទេ ដែលដឹងរឿងច្រើនជាងគេ ហើយការ«ឈឺចាប់»​របស់​ពួកគេ ត្រូវបានកើតឡើង នៅពេលដែលពួកគេត្រូវធ្វើថ្លង់ ធ្វើគរ ក្នុងពេលដែលគេស្តាប់លឺ និងមើលឃើញ​ផ្ទាល់​ភ្នែកនោះ។ លោកបន្តថា លោកក៏ដូចជាប្រជាពលរដ្ឋមួយចំនួនទៀត មិនសូវជាមានការខឹងសម្បា ជា​មួយនឹងក្រុមនគរបាល កងរាជធាវុធហត្ថ ឬទាហានទាំងនោះប៉ុន្មានទេ ព្រោះថាពួកគេក៏មិនអាចធ្វើអ្វី​ក្រៅ​ពី​នេះបានដែរ។ បើមិនដូច្នេះទេ ពួកគេក៏ប្រឈមមុខនឹងការបាត់បង់ដំណែង និងរហូតអាចមានការចាប់ខ្លួន និងមានទោសទណ្ឌជាដើម។

អ្នកវិភាគរូបនេះ បានបញ្ជាក់ទៀតថា «ទាំងទាហាន ប៉ូលីស រាជអាវុធហត្ថ ជាអ្នកអនុវត្តន៍ដឹងរឿងច្រើន​ណាស់។ ដូចករណីវៃនៅស្ពាននាគ គេបញ្ជូនទៅមន្ទីរពេទ្យ អ្នករបួសទាំងនោះ រួមទាំងពេទ្យ ហើយពេទ្យ​ទាំង​នោះ បានថតទុកឲ្យខ្ញុំទាំងអស់ដោយពួកគេប្រាប់ថា អ្នកឈឺល្មមៗត្រូវធ្វើជាឈឺធ្ងន់ ឬឈឺខ្លាំង ឯអ្នក​ដែលរបួសតិចតួចត្រូវរុំ (បង់) ឲ្យក្រាស់ ឬធំជាដើម។» លោកបន្ថែមថា អ្នករបួសទាំងនោះមានការឈឺចាប់ ដែលត្រូវយករូបភាពដែលមានសាច់ឈាមរបស់ពួកគាត់ ទៅលលេងក្នុងរឿងអំណាចបុគ្គល។ ឯក្រុម​គ្រូ​ពេទ្យវិញក៏លើកឡើងថា ពួកគេក៏មានការឈឺចាប់ ជាងអ្នកដែលរងគ្រោះទៅទៀត ដែលយកពេលវេលា​នៃការងារ និងវិជ្ជាជីវៈរបស់ពួកគាត់ មកធ្វើជាការលេងសើច សងសឹក ក្នុងរឿងនយោបាយនោះ។

សូមទស្សនាវីដីអូ នៃការថ្លែងរបស់លោក កែម ឡី ជុំវិញបញ្ហាជនអន្តោប្រវេសន៍​នៅ​កម្ពុជា ដូចខាងក្រោម៖