ឈប់ម៉ូតូដោះទុក្ខសត្វ ត្រូវចោរវាយដណ្តើមយកម៉ូតូ របួសធ្ងន់
- ដោយ: ក. វិច្ចនី ដោយ ក.វិច្ចនី (ទាក់ទង៖ [email protected]) - ភ្នំពេញ ថ្ងៃទី ១៣ តុលា ២០១៤
- កែប្រែចុងក្រោយ: October 14, 2014
- ប្រធានបទ: វាយប្លន់
- អត្ថបទ: មានបញ្ហា?
- មតិ-យោបល់
-
យុវជនម្នាក់ ដែលត្រូវចោរវាយប្លន់យកម៉ូតូ ត្រូវបានគេស្គាល់ថា ជានិស្សិតរៀននៅសាកលវិទ្យាល័យភូមិន្ទភ្នំពេញ ឆ្នាំទី៤ និងម្នាក់ទៀត ត្រូវជាមិត្តភក្តិជិតស្និត នៅបន្ទប់ជាមួយគ្នា ត្រូវបានចោរប្លន់យកម៉ូតូ នៅពេលដែលត្រឡប់ពីលេងផ្ទះមិត្តភក្តិវិញ។ ហេតុការណ៍នេះបានកើតឡើង នៅតាមបណ្តោយផ្លូវរទេះភ្លើង ជិតផ្សារដីហុយ កាលពីម៉ោងជិត ១០:០០យប់ថ្ងៃទី ១១ ខែតុលា ឆ្នាំ ២០១៤។
យុវជនទាំងពីរនាក់នេះ មានស្រុកកំណើតនៅខេត្តបន្ទាយមានជ័យ។ សព្វថ្ងៃនេះ ពួកគេមកបន្តការសិក្សា នៅសាកលវិទ្យាល័យភូមិន្ទភ្នំពេញ និងជួលផ្ទះស្នាក់ នៅម្តុំជិតផ្សារដីហុយ។ នៅល្ងាចថ្ងៃទី ១១ ខែតុលា ជនរងគ្រោះឈ្មោះ បឿន ប៊េត និងមិត្តភក្តិបានទៅលេងផ្ទះមិត្តភក្តិ ដែលរៀនថ្នាក់ជាមួយគ្នា នៅភ្នំពេញថ្មី។
លុះដល់វេលាម៉ោងជិត ១០:០០យប់ ទើបបបួលគ្នាត្រឡប់មកផ្ទះវិញ ដោយជិះម៉ូតូតែមួយជាមួយគ្នា រហូតមកដល់ចំនុចកើតហេតុ ម្តុំរ៉ារទេះភ្លើងជិតផ្សារដីហុយ យុវជនទាំងពីរបានចុះដោះទុក្ខសត្វ នៅចំនុចស្ងាច់ ក្បែរផ្លូវរទេះភ្លើងនោះ រួចទើបឡើងជិះម៉ូតូវិញ។ រំពេចនោះ ស្រាបតែមានចោរមួយក្រុក បានចូលមកព្រួតវាយដណ្តើមម៉ូតូតែម្តង ប៉ុន្តែមិនបានសម្រេចទេ ដោយជនរងគ្រោះបើកម៉ូតូរត់រួច។
រហូតមកដល់ពេលនេះ ជនរងគ្រោះឈ្មោះ បឿន ប៊េត អាចនិយាយស្តី និងបរិភោគចំណីអាហាបានខ្លះៗហើយ ក្រោយពីត្រឡប់មកពីមន្ទីរពេទ្រវិញ នាព្រឹកថ្ងៃទី ១៣ តុលានេះ។ ជនរងគ្រោះរូបនេះ បានប្រាប់ទស្សនាវដ្តីមនោរម្យ.អាំងហ្វូ ទាំងសភាពទ្រុឌទ្រោម និងស្អកៗថា ខ្លួនត្រូវបានចោរវាយបែក ក្បាលពីរន្លែង មុខបីកន្លែង ត្រូវដេរអស់ជាច្រើនថ្នេរ និងវាយចំខ្នងជាច្រើនកន្លែងទៀត។
ជនរងគ្រោះបានបន្តទៀតថា ក្រុមចោរប្លន់នោះ ប្រហែលជាមានគ្នា ៥នាក់ ដែលព្រួតវាយខ្លួន និងមិត្តភក្តិ។ ខណៈពេល ដែលចោរបានព្រួតវាយនោះ ជនរងគ្រោះដែលជិះម៉ូតូនៅពីក្រោយ ក៍បានលោតចុះពីម៉ូតូទៅរកឲ្យគេជួយ ឯខ្លួនខំប្រឹងជិះម៉ូតូគេចពីក្រុមចោរ ទាំងឈាមកំពុងហូរហាម។ បឿន ប៊េត បាននិយាយថា ខ្លួនមានស្មារតីរឹងមាំខំប្រឹងយ៉ាងណា ឲ្យតែទ្រព្យនៅគង់ បើទោះបីជាម៉ូតូនោះមិនមែនជារបស់ខ្លួនក៍ដោយ។
ជនរងគ្រោះខំប្រឹងជិះម៉ូតូដោយខ្លួនឯង រហូតដល់ផ្ទះ ដោយមិនមានប៉ូលិស និងប្រជាពលរដ្ឋណាម្នាក់ មកធ្វើអន្តរាគមន៍ឡើយ។ លុះដល់ផ្ទះ ទើបអ្នកនៅបន្ទប់ជាមួយ យកទៅសង្រ្គោះនៅមន្ទីរពេទ្យព្រះកុសមៈ ហៅពេទ្យលោកសង្ឃ។ ឯម៉ូតូនៅល្អមិនមានបាក់បែកខូចខាតអ្វីទេ ហើយជនរងគ្រោះអាចនិយាយស្តី និងអាចឲ្យមិត្តភក្តិ និងសាច់ញ្ញាតិទៅសួរសុខទុក្ខបាន។ ប៉ុន្តែចំពោះករណីរចោរប្លន់នេះ ប៉ូលីសនៅមិនទាន់រកមុខសញ្ញា ឃើញនៅឡើយ៕