អង្គការសង្គមស៊ីវិល​ប្រមាណ​បួន បាន​រៀបចំ​សិក្ខាសាលា​ថ្នាក់​ជាតិ ដើម្បី​ចែក​រំលែក​នូវ​បទ​ពិសោធន៍ និង​​ការ​អនុវត្តន៍​ល្អ ស្តី​ពី​ភាព​ជា​ដៃ​គូ​រដ្ឋាភិបាល​បើក​ទូលាយ (OGP: Open Government Partnership) ។ សិក្ខា​សាលា​នេះ​ធ្វើ​ឡើង ក្នុង​រយៈពេល​ពីរ​ថ្ងៃ ពីថ្ងៃទី១៦ ដល់​១៧ ខែ​តុលា​នេះ នៅ​សណ្ឋាគារ​សាន់​វ៉េ ក្នុង​រាជធានី​ភ្នំពេញ។

នាយក​ប្រតិបត្តិ​អង្គការ​គណៈកម្មាធិការ សហ​ប្រតិបត្តិការ​ដើម្បី​កម្ពុជា (CCC) លោក សឿង សារឿន ក្នុង​កិច្ច​សម្ភាស​ជា​មួយ​អ្នក​សារព័ត៌មាន បាន​បញ្ជាក់​ថា ការ​ផ្តើម​ឲ្យ​កើត​មាន​សិក្ខា​សាលា ភាព​ជា​ដៃ​គូ​រដ្ឋាភិបាល​បើក​ទូលាយ​នេះ​ឡើង ព្រោះ​ចង់​ឲ្យ អ្នក​ចូល​រួម​បាន​បង្កើន​ចំណេះ​ដឹង​អំពី OGP និង​សារៈ​សំខាន់​នៃ OGP សម្រាប់​ការ​អភិវឌ្ឍ​ប្រកប​ដោយ​និរន្តរភាព នៃ​ប្រទេស​កម្ពុជា។ ផែនការ​ការងារ​ប្រចាំ​ប្រទេស​មួយ ត្រូវ​បាន​ព្រាង​សម្រាប់​បង្កើត ជា​ប្រព័ន្ធ​នូវ​ភាព​ជា​ដៃ​គូ​រដ្ឋាភិបាល​បើក​ទូលាយ (OGP) នៅ​កម្ពុជា។ និង​ការ​គាំទ្រ​ការ​កសាង​បណ្តាញ ត្រូវ​បាន​កសាង និង​ពង្រឹង​រវាង​អង្គការ​សង្គម​ស៊ីវិល និង​រដ្ឋាភិបាល ក្នុង​ប្រទេស​ទាំង​ប្រាំ​ជា​មួយ​សហភាគី​របស់​ខ្លួន នៅ​ប្រទេស​ឥណ្ឌូណេស៊ី ហ្វីលីពីន និងកូរ៉េ​ខាង​ត្បូង។

ក្រោមកិច្ចសហការរៀបចំ ដោយគណៈកម្មាធិការសហប្រតិបត្តិការដើម្បីកម្ពុជា (CCC), វិទ្យាស្ថានតស៊ូមតិ​និងគោលនយោបាយ (API), សមាគមយុវជនខ្មែរ (KYA), អង្គការសីលការ, និងអង្គការតម្លាភាពអន្តរជាតិ (TI) ជាមួយនឹងការចូលរួមពី មន្រ្តីតំណាងរាជរដ្ឋាភិបាលកម្ពុជា និងអង្គការសង្គមស៊ីវិល ដែលធ្វើការលើ​កិច្ចការតម្លាភាព, គណនេយ្យភាព, និងអភិបាលកិច្ចល្អនៅក្នុងប្រទេសកម្ពុជា, វៀតណាម, ហ្វីលីពីន, ឥណ្ឌូនេស៊ី, ម៉ាឡេស៊ី, និងម៉ិកស៊ីកូ។

លោក ប៉ិច ពិសី នាយកកម្មវិធីអង្គការតម្លាភាពកម្ពុជា (TI) បានបន្ថែមថា ការរៀបចំកម្មវិធីនេះ ដើម្បី​ជម្រុញ​ឲ្យកម្ពុជាអាចឈាងចូលទៅក្នុង OGP អបន្តរជាតិ បានតាមរយៈការធ្វ់កំណែប្រែច្បាប់ មួយចំនួនធំ ពិសេស​ការចូលមកប្រកាសទ្រព្យសម្បត្តិ នៃមន្រ្តីរាជការគ្រប់លំដាប់ថ្នាក់។ លោកបានថ្លែងឲ្យដឹងថា៖ «កម្ពុជាអាច​ចូលជាសមាជិក OGP ត្រូវតែមាននូវច្បាប់ទទួលបានព័ត៌មាន និងច្បាប់ការពារសាក្សីជាដើម។»

អ្នកវិភាគបញ្ហាសង្គមកម្ពុជា លោក កែមឡី បានលើកឡើងដែរថា នេះជាបញ្ហាថ្មីរបស់កម្ពុជា ហើយ វាក៏ជា​ឧបករណ៍អន្តរតំបន់ដែរ។ លោកបន្តថា រដ្ឋាភិបាលបើកចំហរ និងដាក់ចិត្តចូលរួមក្នុង OGP នាំឲ្យកម្ពុជា​មាន​ភាពចំណេញច្រើន ក្នុងការកំណែទម្រង់នូវផ្នែករដ្ឋបាល ហិរញ្ញវត្ថុសាធារណៈ កំណែទម្រង់វិមជ្ឈការ និង​វិសហមជ្ឈការជាដើម។ លោកក៏បង្ហាញនូវភាពសោកស្តាយ ដែលមិនមានការចូលរួម ពីមន្រ្តី​រាជរដ្ឋាភិបាល​ក្នុងកម្មវិធីនេះ។ ប៉ុន្តែយ៉ាងណាក៏ដោយរដ្ឋាភិបាល មានសហប្រតិបត្តការអន្តរជាតិនានា និងមានយន្តការ​ថ្នាក់ក្រោមជាតិច្រើន គ្រាន់តែថាប្រសិទ្ធិភាព នៃការអនុវត្តនៅមានលក្ខណៈខ្សោយ និងមានភាព​ចង្អៀត​ចង្អល់ ជាមួយអង្គការសង្គមស៊ីវិលជាតិ និងអន្កតរជាតិ៕