ឡាយអ៊ិន៖ ទី​បំផុត ខ្ញុំ​ត្រឹម​តែ​ជា​«សត្វ​ក្របី»​សម្រាប់​នាង

ឌីជេ ឡាយអ៊ិន និងភរិយា ដែលធ្លាប់តែល្អូកល្អើនជាមួយគ្នានោះ ស្រាប់តែឥលូវនេះ ចំណងអាពាហ៍ពិពាហ៍របស់ពួកគេ បានឈានដល់ដំណាក់កាល ប្រេះឆា រហូតដល់មានការប្តឹងលែងលះគ្នា។ ចំពោះការបែកបាក់នេះ ឌីជេ ដ៏សម្បូរ​វោហារ​ស័ព្ទ បានចោទប្រកាន់ថា ដោយសារមានមនុស្សតាមយាយី បំបែកគ្រួសាររបស់លោក។
Loading...
  • ដោយ: ប្រាថ្នា ដោយ ប្រាថ្នា (ទាក់ទង៖ [email protected] ) - ភ្នំពេញ ថ្ងៃទី១៤ តុលា ២០១៤
  • កែប្រែចុងក្រោយ: October 18, 2014
  • ប្រធានបទ: តារាទូរទស្សន៍
  • អត្ថបទ: មានបញ្ហា?
  • មតិ-យោបល់

ខណៈដែលគូរស្វាមីភរិយា លោក ហែម បូរិទ្ធ ហៅ​ឌីជេ ឡាយអ៊ិន (Dj Lion) និង​អ្នក​នាង សន សុម៉ាលីនដា បាន​តស៊ូ​រស់​នៅ​ជា​មួយ​គ្នា រហូត​មាន​កូន ៣នាក់ ជា​ចំណង​ដៃ​នៃ​ក្តី​ស្នេហ៍​ហើយ​នោះ គ្មាន​នរណា​ម្នាក់​នឹក​ស្មាន​ថា ចំណង​អាពាហ៍ពិពាហ៍​រវាង​អ្នក​ទាំង​ពីរ​នេះ នឹង​ត្រូវ​ដាច់​ឡើយ។ អាច​និយាយ​បាន​ថា វា​ជា​រឿង​មួយ ដ៏​គួរ​ឲ្យ​ភ្ញាក់​ផ្អើល ព្រោះ​ពេល​កន្លង​មក អ្នក​ទាំង​ពីរ​ធ្លាប់​អួត​សរសើរ​ពី​គ្នា​ទៅ​វិញ​ទៅ​មក និង​មាន​ភាព​ល្អូក​ល្អើន​ជា​មួយ​គ្នា​ខ្លាំង​ណាស់។ ប៉ុន្តែជា​រឿ​ង​គួរ​ឲ្យ​ស្ដាយ ដែល​ស្នេហា​បែរ​ប្រេះ​ឆា ជួប​រឿង​រ៉ាវ​អាស្រូវ​ក្នុង​គ្រួសារ រហូត​ជំរុញ​ឲ្យ​អ្នក សន សុម៉ាលីនដា ដាច់​ចិត្ត​ធ្វើការ​ប្តឹង​សុំ​លែង​លះ។

ពិធីករសម្បូរវោហាស័ព្ទ របស់ស្ថានីយ៍ទូរទស្សន៍ស៊ីធីអ៊ិន លោក ហែម បូរិទ្ធ ហៅ ឡាយអិន បានសរសេរ​បក​ស្រាយ នៅលើជញ្ជាំងគណនីហ្វេសប៊ុករបស់លោកថា៖ «អ្នកណាខុស អ្នកណាត្រូវ ខ្ញុំមិនដឹងទេ។ ប៉ុន្តែសូម​អោយបងៗ អ្នកសារព័ត៌មានទាំងអស់ រួមជាមួយ លោកពូអ្នកមីងបងប្អូនគ្រប់ទីកន្លែង ជាពិសេសបងប្អូន ភូមិ​អំពិល ឃុំព្រែកពោធ៍ ស្រុកស្រីសន្ធរ ខេត្តកំពង់ចាម មេត្តាជួយរកខុសត្រូវអោយខ្ញុំផង ព្រោះមានមនុស្ស​ប្រុសគំនិតឆ្កែ ខួរក្បាលជាសត្វ អម(?)ជាខ្លា តាមមកប្រហារយាយីគ្រួសាររបស់ខ្ញុំគ្រប់ពេលវេលា រហូត​ដល់​បែក​គ្នាយ៉ាងនេះ»។

ឌីជេ ឡាយអ៊ិន បានសរសេរបន្តថា ទីបំផុតលោកបានក្លាយជាសត្វក្របី (ដើម្បីជិះចម្លង?) សម្រាប់អ្នកនាង សន សុម៉ាលីនដា ព្រោះរឿងរបស់ពួកគេទាំង២នេះ បានកើតឡើងកាលពី ១០ឆ្នាំមុន មកម្លេះ។ លោក​សរសេរ​ទៀតថា៖ «រហូតមកទល់ពេលនេះ នាងត្រូវការតែ កូនស្អាតៗប៉ុណ្ណោះ (បោកយកកូនប្រើ)។ សួម​ជួយ​ខ្ញុំផង ជួយ​ខ្ញុំ​ពិនិត្យមើលរឿងនេះផង។ ខ្ញុំសូមលើកម្រាមដៃដប់ សូមវត្ថុស័ក្តិសិទ្ធ និងបារមី គ្រប់ទីកន្លែង ជួយ​បង្ហាញ​អោយ​ឃើញ នូវអំពើលាមក គ្មានក្រមសីលធម៍របស់ពួកវាផង។»។

គេមិនដឹងថា តើពាក្យសម្ដីហៅ«ពួកវា» របស់លោក ហែម បូរិទ្ធ ខាងលើនេះ ចង់សំដៅលើនរណាឡើយ។ ប៉ុន្តែ​ទំនងជាលោក ចង់និយាយពីអ្នកនាង សុម៉ាលីនដា និងជន«អាថ៌កំបាំង»ម្នាក់ទៀត ដែលអាចជាជនទីបី ក្នុង​បញ្ហាប្រេះឆានៃចំណងស្នេហ៍អ្នកទាំងពីរ។ ទស្សនាវដ្ដីមនោរម្យ.អាំងហ្វូ មិនអាចទាក់ទងអ្នកនាង សុម៉ាលីនដា ដើម្បីសុំការស្រាយបំភ្លឺបាននៅឡើយ។

តែបើតាមពាក្យបណ្តឹង របស់អ្នកនាង សន សុម៉ាលីនដា ដែលលោក ឡាយអ៊ិន ផ្ទាល់បានបង្ហោះ នៅលើ​គណនីហ្វេសប៊ុករបស់ខ្លួន បានបញ្ជាក់ថា ក្រោយពីបានរៀបការស្របច្បាប់ ជាមួយនឹងលោក ហែម បូរិទ្ធ បានចុះសំបុត្រ អាពាហ៍ពិពាហ៍លេខ០៦ ខែកុម្ភៈ ឆ្នាំ២០១១ រហូតមានកូនបីនាក់អស់ រយៈពេល៤ឆ្នាំ នៃការ​រស់នៅជាមួយគ្នា គឺគ្មានសល់ទ្រព្យសម្បត្តិរួមនោះទេ មានតែបំណុលធនាគារ។ ហើយបំណុលទាំងនោះ អ្នកនាងសន សុម៉ាលីនដា សុខចិត្តទទួលខុសត្រូវ បូករួមទាំងអាហារកិច្ចចិញ្ចឹមកូន ក៏អ្នកនាងមិនទាមទារ ពីលោក ឡាយអិន ដែរ ដោយអ្នកនាងសុខចិត្ត ទទួលខុសត្រូវទាំងស្រុង។

ន័យក្នុងពាក្យបណ្តឹង របស់អ្នកនាង សន សុម៉ាលីនដា បន្តថា ការដែលអ្នកនាងសម្រេច ប្តឹងលែងជាមួយ​ស្វាមី ព្រោះអស់មនោសញ្ចេតនា នឹងគ្នា ហើយអ្នកនាងមិនសង្ឃឹមថា ចំណងស្នេហាមួយនេះ អាចស្តារឡើង​វិញបានឡើយ។ ចង់ដឹងថាអ្នកណាខុស អ្នកណាត្រូវ មានតែចាំមើលក្នុងពេលអនាគតប៉ុណ្ណោះ ប៉ុន្តែការ​បក​អាក្រាតគ្នា ដាក់នៅតាមបណ្ដាញសង្គម អាចឲ្យម្ចាស់ខ្លួនបានធូរស្បើយពីក្នុងចិត្ត ប៉ុន្តែមិនមានន័យថា អាច​ដោះស្រាយបញ្ហាបាននោះទេ។ ផ្ទុយទៅវិញ វាអាចធ្វើបញ្ហា កាន់តែមានសភាពធ្ងន់ធ្ងរទៅវិញ។

សូមបញ្ជាក់ដែរថា នៅក្នុងការបង្ហោះផ្សាយជាបន្តបន្ទាប់របស់លោក ហែម បូរិទ្ធ នៅលើគណនី​ហ្វេសប៊ុក​របស់លោក មានឃើញលោកកំពុងស្វែងរក ជួបកូនទាំងបីរបស់លោក ដោយលោកបានអះអាងថា៖ «ភរិយា​ខំ្ញ យកកូនៗទាំងបីលាក់ មិនអេាយជួបគ្នា តាំងពីថែ្ងទី ២៩-៩-២០១៤ រហូតមកដល់ពេលនេះ មិនដិងជា​នៅ​ទី​កនែ្លង​ណា?»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...