ផៃ ស៊ីផាន៖ កឹម សុខា បានធ្វើអនុប្រធានសភា ព្រោះការលះបង់របស់បក្សប្រជាជន
- ដោយ: អ៊ុម វ៉ារី ដោយ អ៊ុម វ៉ារី (ទាក់ទង៖ [email protected]) - ភ្នំពេញ ថ្ងៃទី២៤ តុលា ២០១៤
- កែប្រែចុងក្រោយ: October 24, 2014
- ប្រធានបទ: សង្គ្រាមសម្ដី
- អត្ថបទ: មានបញ្ហា?
- មតិ-យោបល់
-
ជាប្រតិកម្មតប ទៅនឹងការថ្លែងជាហូរហែររបស់លោក កឹម សុខា អនុប្រធានរដ្ឋសភា និងជាប្រធានស្ដីទីគណបក្សសង្គ្រោះជាតិនោះ លោក ផៃ ស៊ីផាន អ្នកនាំពាក្យទីស្តីការគណរដ្ឋមន្រ្តី បានធ្វើការវាយបកវិញថា តំណែងជាអនុប្រធានរដ្ឋសភាជាតិ របស់លោក កឹម សុខា ក្នុងពេលនេះ ជាការលះបង់ដ៏ធំធេង របស់គណបក្សប្រជាជនកម្ពុជា។
ការថ្លែងរបស់លោក ផៃ ស៊ីផាន នៅក្នុងលិខិតចំហរមួយ បានធ្វើឡើងបន្ទាប់ពីពាក្យវាយប្រហារ រិះគន់ធ្ងន់ៗ ពីសំណាក់អនុប្រធានរដ្ឋសភា លោក កឹម សុខា បានព្រមានគណបក្សប្រជាជនកម្ពុជា ឲ្យត្រៀមខ្លួនធ្វើជាគណបក្សប្រឆាំងវិញ ដោយសារតែគណបក្សកាន់អំណាចមួយនេះ មានចេតនា និងព្យាយាមម្តងហើយម្តងទៀត ក្នុងការលុបបំបាត់ស្មារតីបង្រួបបង្រួមជាតិ ដែលជាស្មារតី នៃកិច្ចព្រមព្រៀងសន្តិភាពទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១។
លោក កឹម សុខា បានពន្យល់ថា កិច្ចព្រមព្រៀងក្រុងប៉ារីស ២៣ តុលា ១៩៩១ គឺជាទិវាប្រវត្តិសាស្រ្ដ សម្រាប់ខ្មែរទាំងអស់គ្នា ខុសពីព្រឹត្តិការណ៍រដ្ឋប្រហារថ្ងៃទី ១៨ មីនា ១៩៧០ ឬជ័យជំនះរបស់ក្រុមខ្មែរក្រហម នៅថ្ងៃទី ១៧ មេសា ១៩៧៥ ដែលព្រឹត្តិការណ៍ទាំងនេះមានអត្ថន័យ សម្រាប់បម្រើឲ្យតែក្រុមមួយប៉ុណ្ណោះ។ ថ្ងៃចុះកិច្ចព្រមព្រៀងក្រុងប៉ារីសនេះ ក៏កាន់តែខុសពីថ្ងៃទី ៧ មករា ១៩៧៩ ដែលលោក កឹម សុខា បានបរិហាគណបក្សប្រជាជនកម្ពុជា ថាជាថ្ងៃដែលប្រទេសវៀតណាម បានវាយទន្ទ្រាន កាន់កាប់ប្រទេសកម្ពុជានោះដែរ។
ប៉ុន្តែការថ្លែងរបស់លោក កឺម សុខា ខាងលើ មិនត្រូវបានលោក ផៃ ស៊ីផាន បកស្រាយឡើយ ដោយលោកគ្រាន់តែទទួលស្គាល់ថា អ្វីៗទាំងអស់ដែលប្រជាពលរដ្ឋកម្ពុជាកំពុងទទួលបាន ក៏ដូចជាគណបក្សសង្គ្រោះជាតិ ដែលមានឱកាសចូលមកក្នុងស្រុក អង្គុយក្នុងរដ្ឋសភានេះ ក៏ជាចំណែកមួយ នៃកិច្ចព្រមព្រៀងសន្តិភាពទីក្រុងប៉ារីស។ ផ្ទុយទៅវិញ មន្ត្រីអ្នកនាំពាក្យរូបនេះ បានចោទប្រកាន់ ត្រឡប់ទៅលោក កឹម សុខា ថា៖ «មិនដែលធ្លាប់ខ្វល់ខ្វាយ ក្មុងការគោរពនូវបំណង របស់កិច្ចព្រមព្រៀងសន្តិភាពនេះឡើយ។ ទាំងស្មារតី ទាំងគំនិត ទាំងសកម្មភាព គឺស្ថិតនៅជាឧទ្ទាម ដូចដែលបានប្រព្រឹត្ត នៅពេលមុនកិច្ចព្រមព្រៀងសន្តិភាពនេះ។»
លោក ផៃ ស៊ីផាន បានអះអាងថា គណបក្សប្រជាជនកម្ពុជា មិនរុញរា នឹងធ្វើការលះបង់ ឬពលីកម្មអ្វីៗគ្រប់បែបយ៉ាង ដើម្បីសន្តិភាព និងការរីកចំរើនរបស់ប្រជាជននោះឡើយ។ ជាក់ស្តែងនៅក្នុងអាណ្តទី៥ នេះ គណបក្សប្រជាជនកម្ពុជា បានលះបង់ជ័យជំនះ (ក្នុងការបោះឆ្នោត) ដើម្បីសុខសន្តិភាព របស់ប្រជាជាតិ។ លោកបញ្ជាក់ទៀតថា៖ «ក្រៅពីប្រជាជាតិ និងប្រជាជនកម្ពុជា គឺឯ.ឧ កឹម សុខា ទទួលបានតំណែងជាអនុប្រធានទី១ រដ្ឋសភាជាតិ ពីកិច្ចសម្បទានរបស់ CPP និងការប្រឹងប្រែងរបស់សម្តេចតេជោ។»
សង្គ្រាមសម្ដីរវាងលោកទាំងពីរខាងលើ ត្រូវបានលោក ព្រហ្ម គិត មន្ត្រីចូលនិវត្តន៍ម្នាក់ជំនាញខាងច្បាប់ រស់នៅក្នុងប្រទេសបារាំង ចូលខ្លួនមកវិន្និច្ឆ័យប្រាប់ទស្សនាវដ្ដីមនោរម្យ.អាំងហ្វូ ថា វាដូចជាមិនមានអីទាក់ទងគ្នាសោះ ពីរឿងតំណែងអនុប្រធានរដ្ឋសភា ទៅនឹងស្មារតីនៃកិច្ចព្រមព្រៀងសន្តិភាពទីក្រុងប៉ារីស ហើយក៏គ្មាននរណាសួរចង់ដឹង ឬទទូចសុំឲ្យគណបក្សប្រជាជនកម្ពុជានេះ ត្រូវវេទនាលះបង់ ឬធ្វើពលិកម្ម ទាំងខ្លួនមិនចង់នោះទេ។ តែករណីដែលសំខាន់ គេត្រូវចោទសួរថា តើគណបក្សកាន់អំណាចមួយនេះ ស្គាល់ពីកាតព្វកិច្ចរបស់ខ្លួនឬអត់? តើមន្ត្រីដែលនៅក្នុងគណបក្សនេះ យល់ពីភារកិច្ច ដែលខ្លនត្រូវបំពេញដល់កម្រិតណា?
វីដេអូរបស់លោក កឹម សុខា ៖