«មានថ្ងៃ ៧មករា ទើបមានថ្ងៃ ២៣តុលា...»
- ដោយ: សេក មនោរកុមារ ដោយ សេក មនោរកុមារ (ទាក់ទង៖ [email protected]) - ប៉ារីស ថ្ងៃទី ២៣ តុលា ២០១៤
- កែប្រែចុងក្រោយ: October 26, 2014
- ប្រធានបទ: ប្រវត្តិមួយ
- អត្ថបទ: មានបញ្ហា?
- មតិ-យោបល់
-
បើរដ្ឋាភិបាលលោក ហ៊ុន សែន នៅតែអនុវត្តនយោបាយដឹកនាំប្រទេសដូចកន្លងមក នឹងនៅមានថ្ងៃទី២៣ តុលា ទីពីរ ឬថ្ងៃទី២៣ តុលា ទីបី ទីបួនជាបន្តទៅទៀត។ អញ្ចឹង សូមកុំឲ្យមន្ត្រីគណបក្សប្រជាជនកម្ពុជា មានមោទនភាព ដោយលើកយកថ្ងៃ ៧មករាមកបាំងមុខឲ្យសោះ។ នេះជាការបញ្ជាក់របស់ អ្នកស្រាវជ្រាវ និងជាអ្នកសរសេរសៀវភៅប្រវត្តិសាស្ត្រ លោក ស.គ.ស.ម នៅក្នុងប្រតិកម្មជាកិច្ចសម្ភាសមួយរបស់លោក ជាមួយទស្សនាវដ្ដីមនោរម្យ.អាំងហ្វូ តបទៅនឹងការលើកឡើង របស់ក្រុមមន្ត្រីគណបក្សប្រជាជនកម្ពុជា ដែលកំពុងកាន់អំណាចសព្វថ្ងៃ។
នៅចំពោះពលរដ្ឋច្រើនរយនាក់ ដែលបានចូលរួមប្រារព្ធទិវា រំលឹកខួបលើកទី ២៣ នៃកិច្ចព្រមព្រៀងសន្តិភាពក្រុងប៉ារីស ថ្ងៃ ២៣ តុលា ឆ្នាំ២០១៤ កន្លងមកនេះ លោកស្រី ឡោ ខេង តំណាងរាស្រ្តមណ្ឌលភ្នំពេញ របស់គណបក្សប្រជាជនកម្ពុជា បានប្រកាសថា មានថ្ងៃ ៧មករា ទើបមានថ្ងៃ ២៣ តុលា។ លោកស្រីបានបន្តទៀតថា៖ «ទោះបីមាន ២៣តុលាក៍ដោយ ក៍យើងមិនទាន់មានសន្តិភាព សន្តិសុខ ឯកភាពគ្នាទេ លុះត្រាតែយើងមានគោលនយោបាយឈ្នះៗ ទើបយើងបានចាប់បង្ខំ កំលាំងខ្មែរក្រហម ដើម្បីឲ្យខ្មែរក្រហមដាក់អាវុធ មកចូលរួមជាមួយរដ្ឋាភិបាលបាន។ នេះគឺអ្វីដែលយើងទទួលបាន ពីការឯកភាពជាតិតែមួយ។»
សម្រាប់លោក ស.គ.ស.ម បានថ្លែងទទួលស្គាល់ថា ថ្ងៃ៧ មករា ១៩៧៩ បានរំដោះប្រជាជនកម្ពុជាចេញ ពីរបបប្រល័យពួជសាសន៍ខ្មែរក្រហមនោះ ពិតមែនហើយ ហើយការថ្លែងរបស់លោកស្រី ឡោ ខេង ខាងលើនេះ ក៏មិនខុសអ្វីដែរ។ ព្រោះបើគ្មានថ្ងៃ៧ មករាទេ ក៏គ្មានការចូលឈ្លានពានពីប្រទេសវៀតណាម គ្មានព្រឹត្តិការណ៍នយោបាយបន្តសម្លាប់ប្រជាជនកម្ពុជា ក្នុងផែនការ«ក៥»របស់រដ្ឋាភិបាលអាយ៉ងក្រោយឆ្នាំ១៩៧៩ និងគ្មានការបំបិទសិទ្ធិសេរីភាព នៅក្នុងរបបកុម្មុយនីសទីពីរ លើកបន្តុបដោយវៀតណាម បន្ទាប់ពីរបបកុម្មុយនីសទីមួយរបស់ខ្មែរក្រហម ហើយថ្ងៃទី២៣ ខែតុលា ឆ្នាំ១៩៩១ ក៏មិនមានរូបរាង និងមិនអាចចាប់កំណើតចេញមកនោះដែរ។ គេត្រូវនិយាយថា មានថ្ងៃ៧ មករា ១៩៧៩ ទើបមានផែនការអាណានិគមថ្មី របស់ប្រទេសវៀតណាមមកលើកម្ពុជា មានផែនការ«ក៥» ដើម្បីបន្តសម្លាប់ប្រជាជនកម្ពុជា និងមានរឿងអាក្រក់ជាច្រើនទៀត ដាក់សង្កត់មកលើប្រទេសកម្ពុជា ហើយបណ្ដាលឲ្យមានថ្ងៃ២៣ តុលា ១៩៩១នេះឡើង។
អ្នកនិពន្ធសៀវភៅជីវប្រវត្តិមហាបុរសខ្មែររូបនេះ បានបន្តការបកស្រាយទៀតថា៖ «នយោបាយឈ្នះៗ របស់លោក ហ៊ុន សែន អាចយកឈ្នះសម្រាប់អ្នកមិនដឹងរឿង។ ព្រោះចរន្ដនយោបាយខ្មែរក្រហម បានថមថយកម្លាំង ឈានទៅរកការរលំរលាយជាបណ្ដើរៗ ចាប់ពីក្រោយការបោះឆ្នោតឆ្នាំ១៩៣មក។ ព្រោះហេតុអ្វី? ព្រោះជាកត្តាសត្យានុម័ត្ររបស់ធម្មជាតិ ដែលមានកើតហើយ តែងតែត្រូវស្លាប់ទៅវិញ ហើយម្យ៉ាងទៀត អន្តរជាតិលែងទទួលស្គាល់ និងលែងគាំទ្រ ពីបុព្វហេតុរបស់ក្រុមនេះតទៅទៀត។ (...) លោក ហ៊ុន សែន ខ្លួនលោកដឹងច្បាស់ណាស់ តើជម្លោះផ្ទៃក្នុងរបស់កម្លាំងខ្មែរក្រហម នៅអំឡុងឆ្នាំ១៩៩៧ មកទល់ឆ្នាំ១៩៩៩ បានកើតចេញពីអ្វី? មិនជាល្បិចបំបែកបំបាក់ របស់លោក ហ៊ុន សែន ទេឬ?»
លោក ស.គ.ស.ម បានបន្តទៀតថា គណបក្សប្រជាជនកម្ពុជាបានកាន់អំណាច តាំងពីឆ្នាំ១៩៧៩មក ឆ្លងកាត់ថ្ងៃទី២៣ តុលា និងការបោះឆ្នោតឆ្នាំ១៩៩៣ ដែលខ្លួនឯងចាញ់ឆ្នោតនោះហើយក៏ដោយ តែរហូតមកដល់ថ្ងៃនេះ ក៏នៅតែបង្ខំឲ្យគេឯងត្រូវតែស្តាប់ និងធ្វើតាមខ្លួន។ នយោបាយ«ឈ្នះៗ» មិនមានន័យថា ឈ្នះទាំងសងខាងទេ។ តែផ្ទុយទៅវិញ ជានយោបាយ ដើម្បីតែខ្លួនលោក ហ៊ុន សែន ឈ្នះ និងជានយោបាយគាបសង្កត់ប៉ុណ្ណោះ។
លោក ហ៊ុន សែន រដ្ឋាភិបាល និងគណបក្សប្រជាជនកម្ពុជា បានសប្បាយចិត្តនិងធ្លាប់បានធ្វើនយោបាយនេះ ដោយសារថ្ងៃ៧ មករា ១៩៧៩ រហូតធ្វើឲ្យមានថ្ងៃចុះហត្ថលេខា លើកិច្ចព្រមព្រៀងសន្តិភាពនៅទីក្រុងប៉ារីស ថ្ងៃ២៣ តុលា ១៩៩១នោះ។ អញ្ចឹង នៅពេលនេះ ប្រសិនបើរដ្ឋាភិបាលលោក ហ៊ុន សែន នៅប្រកាន់នយោបាយដដែល ឬគ្រាន់តែប្ដូរស្នៀតថ្មី សម្រាប់តែសម្បកក្រៅទេ ក្រុមគណបក្សប្រជាជនកម្ពុជា ត្រូវរំពឹងទុកជាមុនឲ្យហើយ ថានៅថ្ងៃខាងមុខ នឹងមានថ្ងៃទី២៣ ខែតុលានេះ លើកទី២ ឬលើកទី៣ ជាថ្មី និងជាបន្តបន្ទាប់ ដើម្បីធ្វើយ៉ាងណា ឲ្យប្រទេសកម្ពុជាមានការអភិវឌ្ឍន៍ គ្មានការរំលោភសិទ្ធមនុស្ស និងធានានូវបូរណភាពទឹកដី ព្រមទាំងអធិបតេយ្យជាតិទាំងមូលពិតប្រាកដ៕