ចប់កិច្ចប្រជុំត្រីភាគី តែកំណត់ប្រាក់ឈ្នួលកម្មករឆ្នាំ២០១៥ មិនទាន់បាន
- ដោយ: ប្រាថ្នា ដោយ ប្រាថ្នា (ទាក់ទង៖ [email protected] ) - ភ្នំពេញ ថ្ងៃទី៣០ តុលា ២០១៤
- កែប្រែចុងក្រោយ: October 31, 2014
- ប្រធានបទ: វិបត្តិកម្មករ
- អត្ថបទ: មានបញ្ហា?
- មតិ-យោបល់
-
កិច្ចប្រជុំត្រីភាគី ចរចារឿងប្រាក់ខែកម្មករ សម្រាប់ឆ្នាំ២០១៥ ដែលមានសមាសភាព មកពីរដ្ឋាភិបាល ៩រូប ភាគីថៅកែរោងចក្រ ៩រូប និងមេដឹកនាំសហជីព ៩រូប បានបញ្ចប់ ពីល្ងាចថ្ងៃព្រហស្បតិ៍ ទី៣០ ខែតុលា ឆ្នាំ២០១៤ ហើយ។ ក្រោយពីកិច្ចប្រជុំ របស់ក្រុមការងារបច្ចេកទេសចម្រុះ ត្រីភាគី រយៈពេល១០ថ្ងៃមកនេះ ចាប់ពីថ្ងៃទៅ២០ ដល់ថ្ងៃទី៣០ ខែតុលាមិនទទួលបានលទ្ធផលនោះទេ ដោយពួកគេមិនបានឯកភាព លើតួលេខរួម ស្តីពីការតម្លើងប្រាក់ខែកម្មករ សម្រាប់ឆ្នាំ២០១៥ នោះឡើយ។
ភាគីទាំងបី នៅតែប្រកាន់យកតួលេខ ដែលបានដាក់ស្នើរ នៅក្នុងអង្គប្រជុំរៀងៗខ្លួន។ សម្រាប់ភាគីតំណាងរដ្ឋាភិបាល កំណត់យកលេខ ១២១ដុល្លារ។ ភាគីថៅកែរោងចក្រ រក្សាជំហរតម្លើងប្រាក់ខែ កម្មកររោងចក្រកាត់ដេរត្រឹម ១១០ដុល្លារ។ រីឯភាគីសហជីព កំណត់តួលេខ ១៤០ ដុល្លារ។
តាមរយៈសេចក្តីថ្លែងការណ៍ ដែលចេញផ្សាយក្រោយកិច្ចប្រជុំ នៅថ្ងៃទី៣០ ខែតុលានេះ លទ្ធផលដែលសម្រេចក្នុងកិច្ចប្រជុំ រយៈពេល១០ថ្ងៃនេះ រួមមាន៖
១. បានបោះឆ្នោតជាសម្ងាត់ ដោយទទួលបានសម្លេងឆ្នោត ៩ លើ២៧ ដើម្បី កំណត់យកតួលេខចំនួន១២១ដុល្លារ ៩លើ២៧ កំណត់យកតួលេខចំនួន១១០ដុល្លារ ៧លើ២៧កំណត់យក១៤០ដុល្លារ ជាប្រាក់ឈ្នួលអប្បបរមា សម្រាប់ជូនគណៈកម្មាការប្រឹក្សាការងារ ធ្វើការជជែកពិភាក្សាបន្ថែម និងសម្លេង២លើ២៧ អនុបវាទ។
២. ទទួលបានសម្លេង១៧លើ២៧ គោរព និងលើកទឹកចិត្តដល់និយោជកណា ដែលបានផ្តល់ប្រាក់ឈ្នួលលើសប្រាក់ឈ្នួលអប្បបរមា ឆ្នាំ២០១៥ និងអត្ថប្រយោជន៍បន្ថែម ដល់កម្មរនិយោជិត។ មិនលើកទឹកចិត្ត ឱ្យមានការទាមទារផ្សេងៗ ដែលខុសនីតិវិធីនៃច្បាប់។
៣. សម្លេង២១ លើ២៧ អំពាវនាវឱ្យម្ចាស់ផ្ទះជួល ម្ចាស់អាហារដ្ឋាន និងម្ចាស់មធ្យោបាយដឹកជញ្ជូន កម្មករកុំតម្លើងថ្លៃជាពិសេសថ្លៃទឹកភ្លើង។
យោងតាមសេក្តីថ្លែងការនេះ បានបញ្ជាក់ថា បើតាមគោលការណ៍ឯកភាព របស់ក្រុមការងារត្រីភាគី ក្រុមការងារសូមយកតួលេខ១២១ដុល្លារ និង១១០ដុល្លា ដែលជាសម្លេងភាគច្រើន ក្នុងជមម្រើសទាំងបីដាក់ជូនគណៈកម្មាការប្រឹក្សាការងារ ពិនិត្យពិភាក្សាបន្ថែម៕