«ចំពោះការចាប់ខ្លួនលោក មាជ សុវណ្ណារ៉ា នេះ (...) គឺ​គណបក្ស​សង្គ្រោះ​ជាតិ មិន​អាច​ទទួល​យក​បាន​ទេ» នេះ​ជា​ប្រតិកម្ម​លើក​ដំបូង​មួយ និង​ដោយ​ផ្ទាល់​របស់​មេ​ដឹកនាំ​គណបក្ស​សង្គ្រោះ​ជាតិ លោក កឹម សុខា ទៅ​នឹង​ការ​ចាប់​ខ្លួន​លោក មាជ សុវណ្ណារ៉ា ប្រធាន​​នាយក​ដ្ឋាន​​ព័ត៌មាន និង​ប្រព័ន្ធ​ផ្សព្វ​ផ្សាយ​របស់​គណបក្ស​ប្រឆាំង ដាក់​ពន្ធនាគារ​ដោយ​តុលាការ សាលា​ដំបូង​រាជធានី​ភ្នំពេញ កាល​ពី​ថ្ងៃ​ទី១១ ខែ​វិច្ឆិកា ម្សិល​ម៉ិញ​នេះ។

ផ្ដល់កិច្ច​សម្ភាស​ទៅ​ឲ្យ​វិទ្យុ​សម្លេង​សហរដ្ឋ​អាមេរិក លោក កឹម សុខា អនុ​ប្រធាន​គណបក្ស​ប្រឆាំង បាន​ថ្លែង​ថា ការ​ចាប់​ខ្លួន​មន្ត្រី​គណបក្ស​លោក​នេះ ជា​រឿង​ចាស់​ដដែលៗ​ ហើយ​ដែល​បាន​កើត​ឡើង តាំង​ពី​មុន​ថ្ងៃ​ទី២២ ខែ​កក្កដា ឆ្នាំ​២០១៤ នៃ​កិច្ច​ព្រម​ព្រៀង​រវាង​គណបក្ស​ធំៗ​ទាំង​ពីរ ជា​មួយ​នឹង​ការ​សន្យា​ដោយ​គណបក្ស​រៀងៗ​ខ្លួន ពី​ភាព​ស្ងប់​ស្ងាត់​ផ្នែក​នយោបាយ។ លោក​ថ្លែង​ទៀត​ថា៖ «ការ​ធ្វើ​នេះ គឺ​ផ្ទុយ​នឹង​កិច្ច​ព្រម​ព្រៀង ថ្ងៃ​ទី២២ ខែ​កក្កដា នោះ​ហើយ»។

លោកបានថ្លែងអះអាងថា គណបក្សសង្គ្រោះជាតិ ទាមទារឲ្យមានការដោះលែង លោក មាជ សុវណ្ណារ៉ា ទោះ​នៅក្នុងរូបភាពណាក៏ដោយ។ ការដោះលែងនេះ អាចជាកាយវិការ បង្ហាញពីបរិយាកាសដ៏ល្អមួយ ដើម្បី​ឲ្យ​គណបក្សទាំងពីរបន្តការជជែកគ្នា នៅក្នុងកំណែទម្រង់ទៅមុខទៀត។ ហើយបើទោះជាគណបក្ស​ទាំង​ពីរ មួយ​ជាគណបក្សប្រឆាំង និងមួយទៀតជាគណបក្សកាន់អំណាចក៏ដោយ ហើយការជជែកតវ៉ា តែងកើត​មាន​នៅ​ក្នុងលិទ្ធិប្រជាធិបតេយ្យជាធម្មតាក៏ដោយ តែគណបក្សសង្គ្រោះជាតិសំណូមពរ​ សុំឲ្យដៃគូរនយោបាយ​ទាំង​សងខាង មានការសហការគ្នាប្រកបដោយសុឆន្ទះជាតិ។

សូមរំលឹកដែរថា នៅក្នុងព្រឹ្តត្តិការណ៍ចុងក្រោយនេះ ពលរដ្ឋជាង១០នាក់ត្រូវបានអាជ្ញាធរចាប់ខ្លួនជាបន្តបន្ទាប់ ក្នុងនោះមានស្ត្រីសកម្មជនមកពីសហគមន៍បឹងកក់ ព្រះសង្ឃ និងមន្ត្រីគណបក្សសង្គ្រោះជាតិ លោក មាជ សុវណ្ណរ៉ា។ ក្រុមពលរដ្ឋនិងព្រះសង្ឃទាំងនោះ ត្រូវបានសាលាដំបូងរាជធានីភ្នំពេញ ចោទប្រកាន់ និងដាក់​ពន្ធនាគារក្នុងម្នាក់ៗ/អង្គ ចំនួនមួយឆ្នាំ និងពិន័យជាប្រាក់២លានរៀល ពីបទ«បង្កឧបសគ្គ​ដល់​ចរាចរណ៍»។

ដោយឡែក លោក មាជ សុវណ្ណារ៉ា ដែលមានតួនាទី ជាប្រធាន​នាយកដ្ឋាន​ព័ត៌មាន និងប្រព័ន្ធផ្សព្វផ្សាយ​របស់​គណបក្សសង្គ្រោះជាតិ ត្រូវចាប់ខ្លួន ពីបទផ្ដើម​គំនិតឲ្យមានហិង្សា ដោយចេតនា​មាន​ស្ថានទម្ងន់ទោស និង​បទ​ញុះញង់ឲ្យប្រព្រឹត្តបទឧក្រិដ្ឋ និងដឹកនាំ​ចលនា​កុបកម្មខុសច្បាប់ នៅក្នុងព្រឹត្តិការណ៍​វាយតប់គ្នា នាថ្ងៃទី១៥ ខែ​កក្កដា ឆ្នាំ២០១៤កន្លងទៅ។ មន្ត្រីគណបក្សប្រឆាំងរូបនេះ អាចជាប់ពន្ធនាគាររហូត​ដល់៣០ឆ្នាំ បើតុលាការ​រក​ឃើញថា លោកពិតជាមានទោសមែននោះ៕