ក្រុមតន្ត្រីមួយនៅទួលសង្កែ បង្កើតឡើងពីជនពិការទាំងអស់
- ដោយ: ក. សោភណ្ឌ ដោយ ក. សោភ័ណ្ឌ (ទាក់ទង៖ [email protected]) - ភ្នំពេញ ថ្ងៃទី១៣ វិច្ឆិកា ២០១៤
- កែប្រែចុងក្រោយ: November 15, 2014
- ប្រធានបទ: ជ្រុងមួយ
- អត្ថបទ: មានបញ្ហា?
- មតិ-យោបល់
-
ជនពិការប្រមាណជា៥០នាក់ បានរួមគ្នាបង្កើតជាសមាគមមួយ នៅសង្កាត់ទួលសង្កែ ខណ្ឌឬស្សីកែវ រាជធានីភ្នំពេញ ដើម្បីកកើតបានជា ក្រុមតន្ត្រីដ៏ពិសេសមួយបែប ដែលមានសិល្បៈករសុទ្ធតែជាជនពិការ។ ក្រុមតន្ត្រីនេះ ប្រគុំពីរលើក ពេលព្រឹក និងពេលល្ងាច ហើយពេលចេញប្រគុំនៅក្រៅម្តងៗ មានគ្នាតែ១០នាក់ប៉ុណ្ណោះ ដោយផ្លាស់ប្តូរវេនគ្នា នៅក្នុងការច្រៀងឬលេងភ្លេង។ នេះជាការលើកឡើងរបស់ លោក ជា ហ៊ន ដែលជាប្រធានមូលនិធិតន្រ្តីជនពិការ ដែលទើបនឹងមានរូបរាងនេះ។
ប្រធានមូលនិធិ បានថ្លែងប្រាប់ទស្សនាវដ្តីមនោរម្យ.អាំងហ្វូឲ្យដឹងថា ក្នុងសិល្បៈករដែលសុទ្ធជាជនពិការវ័យចំណាស់ម្នាក់ៗ ទទួលបានប្រាក់ពី៣០០០០៛ ទៅ៦០០០០៛ ក្នុងការចេញប្រគុំម្តងៗ។ លោកបានចង្អុលប្រាប់ថា ក្នុងការប្រគុំនៅទីផ្សារលើកនេះ មានសិល្បៈករស្រី៦នាក់ ប្រុស៤នាក់។
ទើបបញ្ចប់ការច្រៀងរួច អ្នកស្រី ហៀង ស្រីឡែន សិល្បៈការិនីមួយរូប ពីក្នុងចំណោមក្រុមតន្ត្រីនេះ បានរៀបរាប់ពីជីវិតផ្ទាល់ខ្លួនប្រាប់ទស្សនាវដ្ដីថា អ្នកស្រីពិការភ្នែកតាំងពីតូចមក ហើយសព្វថ្ងៃបងស្រីមានស្វាមី ដែលជាជនពិការដូចគ្នា។ ដូចជាជនពិការដ៏ទៃទៀតដែរ អ្នកស្រីមកច្រៀងនៅទីនេះ ដើម្បីបានថវិកាគ្រាន់ចិញ្ចិមជីវិតប្រចាំថ្ងៃ។ ប៉ុន្តែកម្រៃដែលទទួលបានពីការសម្ដែងនេះ មិនអាចយកមកដោះស្រាយបញ្ហាជីវិតបានទេ ហើយជីវភាពរបស់ក្រុមជនពិការទាំងនោះ នៅតែមានការលំបាកនៅឡើយ។
ទន្ទឹមនឹងការថ្លែងអំណរគុណយ៉ាងជ្រាលជ្រៅ ទៅដល់សប្បុរសជននានានោះ លោក ជា ហ៊ន បានអំពាវនាវដល់រដ្ឋាភិបាល ក៏ដូចជាមេដឹកនាំកម្ពុជាទាំងឡាយ ឲ្យជួយយកចិត្តទុកដាក់ទំនុកបំរុងជនពិការ និង ជួយផ្តល់ឱកាសដល់ជនពិការ ឲ្យបានបញ្ចេញសមត្ថភាពផ្ទាល់ខ្លួន ទាំងក្នុងប្រទេស និងក្រៅប្រទេសផង៕
