កឹម សុខា និងមេធាវី ទៅជួប មាជ សុវណ្ណារ៉ា ក្នុងពន្ធនាគាររសៀលនេះ
- ដោយ: អ៊ុម វ៉ារី ដោយ អ៊ុម វ៉ារី (ទាក់ទង៖ [email protected]) - ភ្នំពេញ ថ្ងៃទី១៧ វិច្ឆិការ ២០១៤
- កែប្រែចុងក្រោយ: November 17, 2014
- ប្រធានបទ: យុត្តិធម៌
- អត្ថបទ: មានបញ្ហា?
- មតិ-យោបល់
-
ក្នុងបណ្តាញសង្គម លោក កឹម សុខា (Kem Sokha) ក្នុងថ្ងៃទី១៧ ខែវិច្ឆិកានេះ បានសរសេរ នៅលើទំព័រហ្វេសប៊ុករបស់លោកថា «នៅវេលាម៉ោងពីរ រសៀល ថ្ងៃទី១៧ វិច្ឆិកា ២០១៤នេះ ខ្ញុំ នឹងទៅជួបសួរសុខទុក្ខលោក មាជ សុវណ្ណារ៉ា ដែលកំពុងត្រូវបានឃុំខ្លួននៅពន្ធនាគារព្រៃស “ម១”»។
លោកបានពន្យល់ថា ដំណើររបស់លោកទៅកាន់ទីនោះ ដើម្បីចង់ដឹងពីសុខទុក្ខ និងបង្ហាញពីការយកចិត្តទុកដាក់ របស់ថ្នាក់ដឹកនាំគណបក្ស។ ប្រធានស្ដីទីគណបក្សប្រឆាំងរូបនេះ បានសរសេរបន្តទៀតថា៖ «ខ្ញុំបានសុំឲ្យលោក មាជ សុវណ្ណារ៉ា មានការអត់ធ្មត់ និងប្ដេជ្ញាចិត្តខ្ពស់ ខណៈពេលថ្នាក់ដឹកនាំគណបក្សសង្គ្រោះជាតិ កំពុងខិតខំរកគ្រប់មធ្យោបាយ ដោះស្រាយចំពោះបញ្ហានេះ»។
រីឯលោក មេធាវី ចាន់ ចេង បានថ្លែងប្រាប់ទស្សនាវដ្តីមនោរម្យ.អាំងហ្វូ ក្នុងព្រឹកថ្ងៃទី១៧ ខែវិច្ឆិកានេះថា លោករួមដំណើរជាមួយលោក កឹម សុខា និងតំណាងរាស្រ្តពីរនាក់ផ្សេងទៀត ជួបសួរសុខទុក្ខលោក មាជ សុវណ្ណារ៉ា ដើម្បីស្វែងរកនីតិវិធីថ្មី ក្នុងការតវ៉ាតាមផ្លូវច្បាប់ ចំពោះការបដិសេធសុំនៅក្រៅឃុំ ដោយចៅក្រមស៊ើបអង្កេត លើរូបលោក មាជ សុវណ្ណារ៉ា នេះ។
លោកមេធាវីបានពន្យល់ថា៖ «ខ្ញុំបានដាក់ពាក្យធានាគាត់នៅក្រៅឃុំ មកដល់ពេលនេះមិនទាន់ឃើញ មានសញ្ញាណាមួយ ឆ្លើយតបមកខ្ញុំ។(…) ការមិនឆ្លើយតបរបស់ចៅក្រមស៊ើបសួរ មានន័យថា មិនព្រមចំពោះការស្នើសុំរបស់មេធាវីឡើយ។ (…) ខ្ញុំនឹងធ្វើការពិក្សា ជាមួយកូនក្តីខ្ញុំនៅពន្ធនាគារ។ ចំពោះនីតិវិធីទៅថ្នាក់លើ ទាល់តែមានការយល់ព្រមពីកូនក្តី ទើបអាចធ្វើទៅបាន។ ហើយមកដល់ពេលនេះ នីតិវិធីនៃការឆ្លើយតបរបស់ចៅក្រម ក៏ហួសពីប្រាំថ្ងៃ ដែលច្បាប់បានកំណត់ដែរ។»
លោកមេធាវីបានបញ្ជាក់ទៀតថា លោកនឹងបន្តពិភាក្សាជាមួយកូនក្តីរបស់លោក ចំពោះភាពស្ងៀមស្ងាត់របស់ចៅក្រមស៊ើបសួរនោះ នារសៀលថ្ងៃនេះ ថាតើនឹងត្រូវដំណើរការរឿងក្តីនេះ ដោយរបៀបណា៕