រ៉ុង ឈុន៖ ករណី«សញ្ជាតិពីរ»របស់ ពុង ឈីវកេក គួរត្រូវបានលើកលែង
- ដោយ: អ៊ុម វ៉ារី ដោយ អ៊ុម វ៉ារី (ទាក់ទង៖ [email protected]) - ភ្នំពេញ ថ្ងៃទី១៩ វិច្ឆិកា ២០១៤
- កែប្រែចុងក្រោយ: November 20, 2014
- ប្រធានបទ: បោះឆ្នោត
- អត្ថបទ: មានបញ្ហា?
- មតិ-យោបល់
-
ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន បានចោទគណបក្សប្រជាជនកម្ពុជា ថាកំពុងបង្កភាពស្មុគស្មាញ បង្កើតការជាប់គាំង និងជំរុញឲ្យមានឧបសគ្គជាថ្មីម្តងទៀត ក្នុងការបង្កើតនូវ គណៈកម្មាធិការជាតិរៀបចំការបោះឆ្នោត (គ.ជ.ប) ត្រឹមត្រូវ យុត្តិធម៌ និងឯករាជ្យនេះ។ លោកបានថ្លែងបញ្ជាក់ ក្នុងកិច្ចសម្ភាស ជាមួយទស្សនាវដ្តីមនោរម្យ .អាំងហ្វូ ថ្ងៃទី១៩ ខែវិច្ឆិកា ថាករណី«សញ្ជាតិមួយ» កំពុងត្រូវបានយកមកធ្វើជា«ឧបសគ្គ» ដោយគណបក្សប្រជាជនកម្ពុជា ក្នុងការបង្កើត គ.ជ.ប ថ្មី។
កាលពីថ្ងៃទី១៧ ខែវិច្ឆិកាថ្មីៗនេះ លោក ប៊ិន ឈិន ប្រធានក្រុមការងារបច្ចេកទេស មកពីគណបក្សប្រជាជនកម្ពុជា បានលើកយកបញ្ហា«សញ្ជាតិពីរ» មកអះអាងថា ជាករណីចាំបាច់ ដើម្បីក្លាយជាសមាជិករបស់ គ.ជ.ប ថ្មី។ មន្ត្រីជាន់ខ្ពស់គណបក្សប្រជាជនកម្ពុជារូបនេះ បានថ្លែងបញ្ជាក់ថា៖ «យើងមិនចង់ឲ្យមានឥទ្ធិពល ពីនេះពីនោះ។ ជា គ.ជ.ប ឯករាជ្យ និងមានជាក្នុងរដ្ឋធម្មនុញ្ញ។»
ប៉ុន្តែលោក គួយ ប៊ុនរឿន ប្រធានក្រុមការងារបច្ចេកទេស មកពីគណបក្សសង្គ្រោះជាតិ បានលើកឡើងផ្ទុយពីលោក ប៊ិន ឈិន វិញ ដោយបានរំពឹងថា៖ «ការកំណត់យកសញ្ជាតិតែមួយ វាអាចចាត់ទុកថាជាការរើសអើង។ (...) ព្រោះរដ្ឋធម្មនុញ្ញយើង គាំទ្រប្រជាពលរដ្ឋខ្មែររស់នៅក្រៅប្រទេស និងមានសញ្ជាតិពីរ។»
ករណីសញ្ជាតិពីរនេះ ត្រូវបានគេយោងដល់ករណីរបស់លោកស្រី ពុង ឈីវកេក ដែលធ្លាប់ត្រូវបានគណបក្សធំទាំងពីរព្រមព្រៀង ឲ្យក្លាយជាជាសមាជិកទី៩ នៃគ.ជ.ប កាលពីប៉ុន្មានខែមុនរួចហើយ។ លោក រ៉ុង ឈុន បានផ្ដល់ជាយោបល់ថា ករណីរបស់លោកស្រី ពុង ឈីវកេក ជាសមាជិកទី៩ នៃ គ.ជ.ប គួរជាករណីមួយត្រូវលើកលែង បើទោះជាមានការកំណត់ ឲ្យមានសញ្ជាតិតែមួយក្តី។ លោកបានយោងមូលហេតុថា ព្រោះនេះជាការសម្រេចចិត្ត និងការឯកភាពគ្នា រវាងគណបក្សទាំងពីរ ក្នងពេលកន្លងមក។
យ៉ាងណាក៏ដោយ ក៏មន្ត្រីជាន់ខ្ពស់របស់គណបក្សប្រជាជនកម្ពុជា លោក ប៊ិន ឈិន បានថ្លែងអះអាងថា ករណីនេះ នៅមិនទាន់សម្រេចអ្វីបាននៅឡើយ ដោយចាំស្នើសុំការសម្រេច ពីថ្នាក់ដឹកនាំកំពូល៕