កាត់លិង្គរបស់យុវជនម្នាក់ ព្រោះសង្ស័យថាប៉ះពាល់កូនប្រុសខ្លួន
- ដោយ: សុបិន្ដ ដោយ សុបិន្ត (ទាក់ទង៖ [email protected]) - ម៉ុងរ៉េអាល់ ថ្ងៃទី១៩ វិច្ឆិកា ២០១៤
- កែប្រែចុងក្រោយ: November 20, 2014
- ប្រធានបទ: ឧក្រិដ្ឋកម្ម
- អត្ថបទ: មានបញ្ហា?
- មតិ-យោបល់
-
រងទារុណកម្មបីម៉ោង និងទីបំផុតទៅ លិង្គរបស់ខ្លួនត្រូវបានកាត់ផ្ដាច់ នឹងកាំបិតរូតមួយ ដោយស្ត្រីវ័យ៣២ឆ្នាំ ឈ្មោះ បូនីតា វេឡា (Bonita Vela)។ នេះជាអ្វី ដែលបានកើតឡើង ចំពោះយុវជនវ័យ១៨ឆ្នាំមួយរូប ដែលនៅមុនកើតហេតុ យុវជនគ្រាន់តែបានមកលេងនឹងមិត្តស្រីរបស់ខ្លួន កូនស្រីរបស់អ្នកស្រី បូនីតា ប៉ុណ្ណោះ។ ហេតុការណ៍ដ៏ឈឺចាប់ បានកើតឡើងតាំងពីថ្ងៃទី២៨ ខែធ្នូ ឆ្នាំ២០១៣កន្លងទៅ ក្នុងរដ្ឋ អ៊ិនឌីយ៉ាណា (Indiana - ភាគកណ្ដាលខាងកើតសហរដ្ឋអាមេរិក) តែសវនាការកាត់ទោស ទើបនឹងបញ្ចប់ទៅរួចរាល់ ក្នុងពេលថ្មីៗនេះប៉ុណ្ណោះ។
ជម្រើសដែលបានផ្ដាច់លិង្គដល់ត្រឹមគល់!
ហេតុអ្វី បានជាយុវជននេះ បានរងទារុណកម្ម និងរងការកាត់ផ្ដាច់លិង្គរបស់ខ្លួនបែបនេះ? ព្រោះការសង្ស័យមួយបានកើតឡើង៖ យុវជននេះបានប៉ះពាល់ ផ្លូវភេទកុមារាមួយរូប អាយុ២ឆ្នាំ ដែលជាកូនប្រុសពៅរបស់អ្នកស្រី បូនីតា។ តែការសងសឹង ដោយអ្នកម្ដាយ បូនីតា ដូចជាមានលក្ខណៈជ្រុលហួស៖ ចាប់បង្ខាំងខ្លួនយុវជន រួចដាក់កំហិតឲ្យរើសជម្រើសមួយ ពីក្នុងចំណោមជម្រើសពីរ៖ ជីវិត ឬលិង្គ? ស្ថិតក្នុងភាពភ័យតក់ស្លុត យុវជនបានរើសយកជីវិត។
បញ្ហាដែលសំខាន់នោះ គឺយុវជនដ៏កំសត់ បានអះអាងហើយអះអាងទៀត រហូតមកទល់ពេលនេះ ថាខ្លួនមិនបានប៉ះពាល់ ឬបៀតបៀនផ្លូវភេទ កុមារកូនប្រុសរបស់អ្នកស្រី បូនីតា សូម្បីបន្តិចឡើយ។ នៅក្នុងសវនាការវិញ ក៏អ្នកម្ដាយរូបនេះ និយាយថាខ្លួនពិតជាគ្មានភស្តុតាងឲ្យច្បាស់លាស់ ដើម្បីបង្ហាញថាយុវជន ដែលជាមិត្តប្រុសរបស់កូនស្រីខ្លួននេះ បានប្រព្រឹត្តិដូចការសង្ស័យនោះដែរ។ ប៉ុន្តែកំហឹងទំនងជាបានរីកធំឡើង ព្រោះនៅពេលនោះ អ្នកស្រី បូនីតា និងមិត្តភ័ក្រពីរនាក់ទៀត បានជុំគ្នាជក់«កញ្ឆា»។
យុវជនរងគ្រោះ ត្រូវបានជួយសង្គ្រោះ ក្នុងពេលក្រោយមកដោយក្រុមគ្រូពេទ្យជំនាញ ហើយអាចរកបានត្រឡប់មកវិញ នូវភេទរបស់ខ្លួនដូចដើម។ តែសម្រាប់ជនដៃដល់ប្រដាប់ដោយកាំបិតរូត អ្នកស្រី បូនីតា វិញ បានទទួលស្គាល់កំហុសរបស់ខ្លួន នៅចំពោះមុខចៅក្រមនៅក្នុងសវនាការ ពីបង្ខាំងខ្លួនដោយខុសច្បាប់ និងប្រើប្រាស់កម្លាំងជ្រុល ធ្វើឲ្យមានរបួសស្នាម។ ការទទួលស្គាល់ទោសកំហុសនេះ បានជួយសម្រាលទោសអ្នកស្រី មកជាប់ទោសត្រឹម១០ខែ នៅក្នុងផ្ទះ ក្រោមការត្រួតពិនិត្យអេឡិកត្រូនិករបស់តុលាការ និងអាចបន្តទោសថែម៦ខែទៀត។ តុលាការក៏បានបង្គាប់ឲ្យអ្នកស្រី ត្រូវទៅពិនិត្យពីកម្រិត«កំហឹង»របស់ខ្លួន ជាមួយនឹងគ្រូពេទ្យជំនាញដែរ៕