អង់គ្លេស៖ សម្លាប់ឪពុកបង្កើត រួចយកឆ្អឹងមកធ្វើគ្រឿងសង្ហារិម
- ដោយ: ឈូករ័ត្ន ដោយ ឈូករ័ត្ន (ទាក់ទង៖ [email protected]) - ប៉ារីស ថ្ងៃទី២៩ វិច្ឆិកា ២០១៤
- កែប្រែចុងក្រោយ: December 01, 2014
- ប្រធានបទ: ឧក្រិដ្ឋកម្ម
- អត្ថបទ: មានបញ្ហា?
- មតិ-យោបល់
-
យុវជនជាតិអង់គ្លេសអាយុ២៨ឆ្នាំមួយរូប បានរងនូវការចោទប្រកាន់ ដោយតុលាការ ថាបានសម្លាប់ឪពុកបង្កើតរបស់ខ្លួន និងបានកាត់សាកសពជាកង់ៗ មុននឹងយកគ្រោងឆ្អឹង ដាក់ក្នុងប្រអប់ផ្លាស្ទីកមួយ ដែលត្រូវបានយកទៅប្រើប្រាស់ ជាកំណល់សម្រាប់ទ្រទូរទស្សន៍។ នេះបើតាមរបាយការណ៍មួយ របស់សារព័ត៌មានអង់គ្លេសឈ្មោះ តេលេហ្គ្រាហ្វ (Telegraph)។
សារព័ត៌មានបានសរសេររំលឹកឡើងវិញថា កាលពីថ្ងៃទី១៦ ខែឧសភា ឆ្នាំ២០១៣កន្លងទៅ យុវជនឈ្មោះ ណាថាន់ រ៉ូប៊ិនសុន (Nathan Robinson) មានជម្លោះតឹងសរសៃកយ៉ាងខ្លាំងមួយ ជាមួយឪពុករបស់ខ្លួន ឈ្មោះ វីល្លៀម ស្ពីល័រ (William Spiller) នៅក្នុងផ្ទះដែលអ្នកទាំងពីររស់នៅជាមួយគ្នា កណ្ដាលក្រុង Bournemouth (ផ្នែកខាងត្បូងនៃប្រទេសអង់គ្លេស)។
អ្នកជិតខាងដែលរស់នៅជាន់ខាងក្រោម បានឮសម្លេងស្រែកឡើងចុងក្រោយ របស់បុរសជាឪពុក នៅពេលនោះថា «ហ្អែងគិតថា អញត្រូវចិញ្ចឹមហ្អែងមួយជីវិតឬ?» រួចពីនោះមក ក៏ស្ងាត់ឈឹងរហូត។ បុរសចំណាស់ ត្រូវបានកូនខ្លួនបង្កើតសម្លាប់ និងកាត់រាងកាយជាកំណាត់ៗ ជាមួយនឹងកាំបិត និងរណាតូចៗចំនួនពីរ។ ដោយការបារម្ភនិងការជួយឈឺឆ្អាល មួយសន្ទុះក្រោយមក អ្នកជិតខាងរូបនោះ បានឡើងមកគោះទ្វាដើម្បីសួរសុខទុក្ខ។ តែបានឃើញយុវជនបើកទ្វាចេញមក ធ្វើដូចធម្មតាហាក់គ្មានរឿងអ្វីទាំងអស់។
លុះអ្នកជិតខាងនោះ បានត្រឡប់មកផ្ទះវិញ ស្រាប់តែបានឃើញមានសំណើមពណផ្កាឈូក បានជ្រាបចេញតាមពិដាន នៃបន្ទប់ទឹកខ្លួន។ បើតាមរាជអាជ្ញាអង់គ្លេស បានឲ្យដឹងថា ទឹកសំណើមពណ៌ផ្កាឈូកនោះ ជាការលាយបញ្ចូលគ្នារវាងឈាម និងទឹកលាងសម្អាត ដែលយុវជនបានទៅទិញមកដុសជូតផ្ទះ នៅបន្ទាប់ពីទង្វើឧក្រិដ្ឋរបស់ខ្លួន។
នៅក្នុងសវនាការ រូបថតជាច្រើនសន្លឹក ត្រូវបានយកមកបង្ហាញដល់ចៅក្រម ក្នុងនោះមានរូបថតមួយចំនួន បង្ហាញពីប្រអប់ដាក់គំនរឆ្អឹងរាងកាយរបស់ជនរងគ្រោះ។ ប្រអប់នោះធ្វើពីជ័ផ្លាស្ទីក មានបណ្ដោយប្រវែង១៨៣សង់ទីម៉ែត្រ និងមានទំងន់១៥៨គីឡូក្រាម។ រីឯលលាដ៍ក្បាលរបស់ជនរងគ្រោះ ត្រូវបានយុវជន រ៉ូប៊ិនសុន លាក់នៅក្នុងប្រអប់ដាក់ឯកសារ ទុកក្នុងបន្ទប់គេងរបស់ខ្លួន។
ច្រើនថ្ងៃបន្ទាប់ពីនោះមក យុវជន ណាថាន់ រ៉ូប៊ិនសុន នៅតែបន្តប្រកាន់ភ្ជាប់ នូវចរិក«ឈាមត្រជាក់»របស់ខ្លួនជានិច្ចជាកាល។ ដើម្បីបង្ហាញថាឪពុកខ្លួននៅរស់ធម្មតានោះ យុវជនបានបន្ត«ផ្ញើរចេញ ជាសារខ្លីៗ»ដោយប្រើទូរស័ព្ទរបស់ជនរងគ្រោះ។ នៅក្នុងរយៈពេលនោះ យុវជនថែមទាំងបានចាកចេញទៅលេងបុណ្យ នៅតំបន់ភាគខាងជើងនៃប្រទេសអង់គ្លេស ដោយចំណាយប្រាក់របស់ឪពុកនោះថែមទៀត។
រហូតមកដល់១ខែក្រោយ ទើបនគរបាលបានមកចាប់ខ្លួនយុវជននេះ នៅនឹងផ្ទះម្ដាយរបស់ខ្លួន។ នគរបាលបានដឹងរឿងនេះ បន្ទាប់ពីមិត្តភ័ក្រមួយរូបរបស់ជនរងគ្រោះ បានរាយការណ៍ពីការបាត់ខ្លួន របស់ វីល្លៀម ស្បីល័រ។ នៅក្នុងសវនាការ យុវជនបានទទួលស្គាល់កំហុស ត្រឹមតែពីបទ«មនុស្សឃាតដោយអចេតនាប៉ុណ្ណោះ» ហើយបានបដិសេធ ពីរាល់ការចោទប្រកាន់ដែលបកស្រាយថា ខ្លួនមានគម្រោងសម្លាប់ឪពុករបស់ខ្លួន។ រហូតមកដល់ពេលនេះ សវនាការនៅមិនទាន់ចប់នៅឡើយ រីឯសាលក្រមសម្រេចវាសនារបស់យុវជនជាប់ចោទវិញ ក៏នឹងត្រូវប្រកាស នៅក្នុងពេលខាងមុខនោះដែរ៕