និស្សិតពេទ្យធ្វើបាតុកម្ម ព្រោះនាយកសាលាមិនឲ្យចុះកម្មសិក្សា
- ដោយ: ក. វិច្ចនី ដោយ ក.វិច្ចនី (ទាក់ទង៖ [email protected]) - ភ្នំពេញ ថ្ងៃទី ២៤ វិច្ឆិកា ២០១៤
- កែប្រែចុងក្រោយ: November 24, 2014
- ប្រធានបទ: ឧត្តមសិក្សា
- អត្ថបទ: មានបញ្ហា?
- មតិ-យោបល់
-
នាយកវិទ្យាស្ថានវិទ្យាសាស្ត្រអន្តរជាតិ រងការចោទប្រកាន់ពីនិស្សិត ផ្នែកគិលានុបដ្ឋាក (បរិញ្ញាប័ត្ររង) ជំនាន់ទី១ ថាយកប្រាក់ ៦០ដុល្លារ សំរាប់ថ្លៃចុះកម្មសិក្សា តាមការកំណត់ ប៉ុន្តែមិនបានគោរពតាមពេលវេលាកំណត់ ធ្វើឲ្យនិស្សិតអត់ធ្មត់ នឹងការរងចាំមិនបាន ក៍នាំគ្នាធ្វើបាតុកម្មមិនចូលរៀន ដោយនៅឈរកាត់បដាពេញនៅមុខសាលា។ ការធ្វើបាតុកម្មរបស់ក្រុមនិស្សិតពេទ្រនេះ ធ្វើឡើងនៅព្រឹកថ្ងៃទី២៤ ខែវិច្ឆិកា ព្រឹកនេះ ដោយមាននិស្សិតសរុបទាំងអស់ចូលរួម និងផ្តិតមេដៃទាមទារឲ្យសាលាដោះស្រាយ មានចំនួនសរុប ៥០នាក់។
និស្សិតឈ្មោះ ថន រដ្ឋា រៀននៅវិទ្យាស្ថានខាងលើនេះ បានបញ្ជាក់ថា ការដែលខ្លួនដឹកនាំក្រុមធ្វើបាតុកម្មនេះ ដោយសារមានគោលបំណងបីចំនុច ដែលត្រូវឲ្យវិទ្យាស្ថានដោះស្រាយចំពោះពួកគេ ទី១ ក្រុមនិស្សិតផ្នែកគិលានុបដ្ឋាកបានសិក្សា អស់រយៈពេលបីឆ្នាំហើយ ប៉ុន្តែវិទ្យាស្ថានមិនបានផ្តល់ឱកាសឲ្យចុះកម្មសិក្សាទេ ទី២ នាយកវិទ្យាស្ថានបានយកលុយពីនិស្សិតម្នាក់ ៦០ ដុល្លារដើម្បីចុះកម្មសិក្សាប៉ុន្តែមិនបានចុះ ទី៣ កាលវិភាគសិក្សាមិនទៀងទាត់ និងមានថ្ងៃឈប់សម្រាកច្រើន។
និស្សិតរូបនេះ បានបន្តអំពាវនាវដល់ថ្នាក់ដឹកនាំ និងស្ថានប័នពាក់ព័ន្ធជួយដោះស្រាយបញ្ហានេះ ព្រោះថានិស្សិតមួយចំនួន មានជីវភាពក្រីក្រ មិនអាចសិក្សាទំាងមិនមានកម្មវិធីសិក្សាច្បាស់លាស់បានទេ។
និស្សិតមួយចំនួនបាន បោះបង់ការសិក្សានៅវិទ្យាស្ថាននេះ រួចទៅបន្តការសិក្សានៅសាលាផ្សេង ដោយពួកគេមើលឃើញ ពីភាពមិនប្រក្រតីច្រើន ដោយមិនគិតពីការខាតបង់ពេលវេលា និងប្រាក់កាសនោះទេ។ ចំណែកឯនិស្សិតដែលមានជីវភាពក្រលំបាក មិនហ៊ានបោះបង់ចោល នូវការសិក្សានៅទីនោះទេ ព្រោះពួកគេស្តាយថវិការដែលបានបង់សាលារួច ដែលមានចំនួន៥០០ដុល្លាក្នុងមួយឆ្នាំនោះ។
ក្នុងកំឡុងពេលក្រុមនិស្សិតកំពុងស្រែកតវ៉ានៅមុខសាលា នាយកសាលានេះកំពុងអង្គុយ នៅក្នុងការិយាល័យសាលា ដោយមិនបានចេញមកធ្វើការបកស្រាយ ចំពោះអ្នកសាព័ត៌មាន និងនិស្សិតនោះឡើយ។
និស្សិត ថន រដ្ឋា បានបញ្ជាក់ថាអាជ្ញាធរបានព្យាយាមសម្របសម្រួលជាមួយពួកគេ ហើយបាននិយាយថា នឹងកោះហៅអភិបាលខ័ណ្ឌ តំណាងនិសិ្សត នាយកសាលា អង្គការពាក់ព័ន្ធ និងអាជ្ញាធរដើម្បីធ្វើការពិភាក្សា រកដំណោះស្រាយឲ្យបានសមស្រប៕