«បញ្ហាដីធ្លីនៅរាជធានីភ្នំពេញ កំពុង​ត្រូវ​បាន​យក​ចិត្ត​ទុក​ដាក់​ដោយ​អាជ្ញាធរ ក្នុង​ការ​ជម្រុញ​ឲ្យ​បញ្ហា​ប្រឈម​មួយ​នេះ ត្រូវ​បាន​ដោះ​ស្រាយ ក្នុង​ពេល​ឆាប់​បំផុត​នា​ពេល​ខាង​មុខ» នេះ​ជា​ការ​អះ​អាង​របស់​លោក អភិបាល​រាជធានី​ភ្នំពេញ ប៉ា សុជាតិវង្ស ជា​មួយ​អ្នក​សារព័ត៌មាន​បន្ទាប់​ពី​បញ្ចប់​ការ​ឆ្លើយ​ផ្ទាល់​មាត់ នៅ​មុខ​គណៈកម្មការ​ទី​១ នៃ​រដ្ឋសភា។

នាវិមានរដ្ឋសភា ថ្ងៃ​ទី២៧ ខែ​វិច្ឆិកា ឆ្នាំ​២០១៤ លោក ប៉ា សុជាតិវង្ស បាន​បង្ហាញ​នូវ​ដំណោះ​ស្រាយ​នានា ចំពោះ​បញ្ហា​វិវាទ​ដី​ធ្លី ដែល​កំពុង​កើត​មាន​ក្នុង​រាជធានី​ភ្នំពេញ ដូច​ជា​តំបន់​បឹង​កក់ បុរី​កីឡា ថ្ម​គោល​ជា​ដើម។ នៅ​ចំពោះ​មុខ​លោក អេង ឆៃអៀង ប្រធាន​គណៈ​កម្មការ​ទី១ នៃ​រដ្ឋសភា លោក​អភិបាល​រាជធានី​បាន​អះអាង​ថា លោក​​បាន​​នឹង​​កំពុង​​ធ្វើការ​ដោះស្រាយបញ្ហា​ដីធ្លី ដោយ​យក​ចិត្ត​ទុក​ដាក់ និង​ប្រឹង​ប្រែង​ខ្លាំង​បំផុត នា​ពេល​កន្លង​មក។

លោកបានបង្ហាញនូវឧទាហរណ៍ជាក់ស្តែងដូចជា ករណីបឹងកក់ បុរីកីឡា ថ្មគោល បឹងត្របែក និងតំបន់ផ្សេងៗ​ទៀត អាជ្ញាធរបាននឹងបន្តដោះស្រាយបញ្ហាជាបន្តបន្ទាប់។ ឯអ្នកដែលនៅសេសសល់ដូចជាករណី​បឹងកក់​សល់​តែ ២៦គ្រួសារ និងខាងបុរីកីឡាសល់តែ១០០គ្រួសារនោះ។ ដោយឡែកតំបន់ជ្រោយចង្វា​ប្រជា​ពលរដ្ឋ​មានដី ឬផ្ទះស្ថិតនៅចម្ងាយ១០០ម៉ែត្រពីផ្លូវ អាជ្ញាធរនិងវាស់វែងទុកឲ្យពលរដ្ឋ។ ចំពោះអ្នកមានដីស្រែ ក្រុម​ការងារក្រុងនឹងបន្តដោះស្រាយឲ្យពួកគាត់ជាបន្តទៀត។

ចំពោះករណីការចាប់ខ្លួន អ្នកតវ៉ារឿងទឹកលិចភូមិនៅបឹងកក់ និងព្រះសង្ឃ កាលពីថ្ងៃទី១១ និងថ្ងៃបន្តបន្ទាប់​មកនោះ ត្រូវបានអភិបាលក្រុងរូបនេះ លើកឡើងថា នោះមិនស្ថិតក្នុងរង្វង់នៃទំនាស់ដីធ្លីទេ ហើយក៏មិន​មែន​ជាវិធានការរបស់លោកដែរ តែជានីតិវិធីតាមផ្លូវច្បាប់របស់តុលាការ។

ចំពោះករណីនៃការដោះសារខាងលើនេះ ត្រូវបានប្រធានគណៈកម្មការទី១ នៃរដ្ឋសភា លោក អេង ឆៃអ៊ាង មើលឃើញថា ជាករណីពាក់ព័ន្ធ និងការចោទប្រកាន់ និងការចាប់ខ្លួនអ្នកទាំងនោះ គ្រាន់តែជាករណីតូចមួយ​ប៉ុណ្ណោះ ក្នុងរឿងបញ្ហាដីធ្លី ក៏ដូចជារឿងស្វែងរកជំនួយ ក្នុងការកាត់បន្ថយទឹកលិចលំនៅដ្ឋាននោះ។

លោកបានធ្វើសំណូមពរដល់អាជ្ញាធរពាក់ព័ន្ធទាំងអស់ ត្រូវដោះស្រាយបញ្ហាដោយសន្តិវិធី តាមការជជែក ពិភាក្សាគ្នា ដើម្បីជៀសវាងដោះស្រាយនូវវិធានការរដ្ឋបាល ដូចជាការការបណ្តេញចេញដោយបង្ខំ ដែល​ជា​ហេតុនាំឲ្យមានការរិគន់ច្រើនពីមជ្ឈដានជាតិ និងអន្តរជាតិ។ ហើយលោកបានស្នើបន្ថែម ដល់អភិបាល​រាជធានី​ភ្នំពេញ ឲ្យធ្វើការបន្ធូរបន្ថយទោស ដល់អ្នកកំពុងជាប់ឃុំទាំងនោះ ឲ្យមានសេរីភាពក្នុងពេល​ឆាប់ៗ​នេះ។ លោក អេង ឆៃអៀង បានបញ្ជាក់ទៀតថា៖ «គណៈកម្មការយើងខ្ញុំ សំណូមពរឲ្យឯក​ឧត្តមអភិបាល​ពិនិត្យ​លទ្ធភាពក្នុងការ ជួយរកមធ្យោយបាយ ធ្វើម៉េចបន្ធូរបន្ថយដល់អ្នកបឹងកក់ដែលបានជាប់ឃុំ មាន​សេរីភាព ឲ្យបានឆាប់»។

ក្នុងរយៈពេលជាងបីម៉ោងនៃជំនួប ប្រធានគណៈកម្មការទី១ នៃរដ្ឋសភា បានបញ្ជាក់ជាចុងក្រោយថា ថ្មីបើការ​ជជែកគ្នា ផ្អែកលើការជឿទុកចិត្ត និងការទទួលយក នូវការលើកឡើងរបស់លោកអភិបាលរាជធានីក៏ដោយ លោកនៅតែបន្តតាមដានឃ្លាំមើលការអនុវត្តនេះ ចាប់ពីពេលនេះតទៅមុខ មិនចំពោះតំបន់ណា ដែលមាន​បញ្ហារឿងដីធ្លីនោះទេ។

សូមតាមទស្សនាកិច្ចសម្ភាសលោក ប៉ា សុជាតិវង្ស និងលោកអេង ឆៃអ៊ាង ជាមួយអ្នកសារព័ត៌មាន​ដូចខាង​ក្រោម៖

(វីដេអូមិនទាន់រួចរាល់)