អ្វី​ដែល​គេ​បាន​ដឹង ពី​ឃាតកម្ម​​លើ អ៊ឹង ម៉េងជឺ៖ មនុស្ស​​ជាង១០​​នាក់ ត្រូវ​​បាន​​ឃាត់​​ខ្លួន

មនុស្សជាង១០នាក់ នៃគ្រួសារលោក ថោង សារ៉ាត ត្រូវឃាត់ខ្លួន បន្ទាប់ពីសមត្ថកិច្ច ធ្វើការឡោមព័ទ្ធភូមិគ្រឹះ កាល​ពី​ល្ងាច​ថ្ងៃ​ទី៣ ខែធ្នូ។ ការឡោមព័ត៌នេះ ធ្វើឡើងបន្ទាប់ពីស៊ើបដឹងថា លោក ថោង សារ៉ាត ជាអ្នកបញ្ជា​ឲ្យ​សម្លាប់​​លោក អ៊ឹង ម៉េងជឺ ។ នេះបើតាមការអះអាង របស់លោក ជួន ណារិន ស្នងការរងទទួលបន្ទុកព្រហ្មទណ្ឌ នៃ​ស្នងការ​ដ្ឋាន​នគរបាល​រាជធានី​ភ្នំពេញ។
Loading...
  • ដោយ: អ៊ុម វ៉ារី អត្ថបទ៖ អ៊ុម វ៉ារី ([email protected]) - ភ្នំពេញ ថ្ងៃទី០៤ ធ្នូ ២០១៤
  • កែប្រែចុងក្រោយ: December 04, 2014
  • ប្រធានបទ: ឧក្រិដ្ឋកម្ម
  • អត្ថបទ: មានបញ្ហា?
  • មតិ-យោបល់

ការឡោមព័ទ្ធភូមិគ្រឹះលោក ថោង សារ៉ាត នៅ​សង្កាត់​ចាក់​អង្រែ​លើ កាល​ពី​ថ្ងៃ​ទី០៣ ខែ​ធ្នូ ឆ្នាំ​២០១៤​នេះ បន្ទាប់​ពី​កម្លាំង​សមត្ថកិច្ច បាន​ឃាត់​ខ្លួន​ជន​សង្ស័យ​ទី​បួន​ឈ្មោះ លី សៅ (ហៅវី) នា​សៀល​ថ្ងៃ​ដដែល។ ឈ្មោះ លី សៅ ត្រូវ​បាន​សង្ស័យ​ថា ជា​អ្នក​បើក​ម៉ូតូ​ដឹក​ជន​ដៃ​ដល់ ដែល​ទៅ​បាញ់​សម្លាប់​លោក អ៊ឹង ម៉េងជឺ។

រសៀលថ្ងៃទី៣ ខែធ្នូនេះ ប្ដី​ប្រពន្ធ​ដែល​មាន​ដើម​កំណើត​ជា​ជន​ជាតិ​វៀតណាម​ពីរ​​នាក់ និង​ជា​ឪពុក​ម្តាយ​លោក ថោង សារ៉ាត បាន​ធ្វើ​សន្និសីទ​សារព័ត៌មាន​មួយ​ដែរ ដោយ​ចេញ​មុខ​ការពារ​កូន​របស់​ខ្លួន ពាក់​ព័ន្ធ​នឹង​ការ​ចោទ​ប្រកាន់​សម្លាប់​លោក អ៊ឹង ម៉េងជឺ បន្ទាប់​ពី​សមត្ថកិច្ច​ឃាត់​ខ្លួន​អង្គរក្ស​ទី​បួន របស់​លោក ថោង សារ៉ាត។

អ្នកស្រី កែវ សារី (ហៅចែហាយ) ឋានរន្ដស័ក្ដិជាវរសេនីយ៍ទោ នៅក្រសួងការពារជាតិ និងជាអតីតទីប្រឹក្សា ​នៃ​អគ្គលេខាធិការដ្ឋាន​ព្រឹទ្ធសភា រួមនឹងលោក តាំង សុខ ហៅ ថោង ចំរើន ត្រូវជាម្តាយ និងជាឪពុកលោក ថោង សារ៉ាត់។ ក្នុងសន្និសិទសារព័ត៌មាននេះ ជាមួយនឹងការនិយាយភាសាខ្មែរមិនទាំងច្បាស់ផងនោះ អ្នកទាំង​ពីរ​បានអះអាងថា លោក ថោង សារ៉ាត់ ដែលជាកូនរបស់ខ្លួន មិនជាប់ពាក់ព័ន្ធនឹងករណីឃាតកម្ម លើលោក អ៊ឹង ម៉េងជឺ ទេ។ អ្នកទាំងពីរបន្តថា ហើយពេលនេះលោក ថោង សារ៉ាត់ បានរត់គេច និងលាក់ខ្លួននៅកន្លែង​មាន​សុវត្ថិភាពហើយ ក្រោមមូលហេតុ៖ «ខ្លាចសមត្ថកិច្ចចាប់ខ្លួន ទាំងគ្មានកំហុស»។

ក្រោយពីឃាត់ខ្លួនអង្គរក្សទីបួបនោះរួចមក នារសៀលថ្ងៃទី៣ ខែធ្នូ ដដែល កម្លាំងសមត្ថកិច្ចចម្រុះ បានធ្វើការ​ឡោមព័ទ្ធភូមិគ្រឹះ និងទីតាំងឡផលិតសាច់ប៉ាត់តេ ដើម្បីចាប់លោក ថោង សារ៉ាត ដែលជាមេខ្លោងបញ្ជា ដោយ​យោងតាមចម្លើយសារភាព របស់ជនសង្ស័យជាឃាតក។ ជនសង្ស័យទាំងបួននាក់ ត្រូវបានឃុំខ្លួន​នៅ​ស្នងការដ្ឋាននគរបាលរាជធានីភ្នំពេញ និងនៅរសៀលថ្ងៃទី៤ ខែធ្នូនេះ ត្រូវបានបញ្ជូនខ្លួន ឡើងតុលាការ​សាលាដំបូងរាជធានីភ្នំពេញ

គួបញ្ជាក់ថាជនសង្ស័យទាំងបួននាក់ ដែលក្រុមសមត្ថកិច្ចបានឃាត់ខ្លួន រួមមានឈ្មោះ សៀង វាសនា អាយុ​៤៤ឆ្នាំ សង្ស័យជាជនដៃដល់ បាញ់សម្លាប់លោក អ៊ឹង ម៉េងជឺ កាលពីយប់ថ្ងៃទី២២ ខែវិច្ឆិកា ឆ្នាំ២០១៤។ ចំណែក​ឈ្មោះ កុយ ចាន់ថល អាយុ២៩ឆ្នាំ និងឈ្មោះ មាស សម្បត្តិ អាយុ២៧ឆ្នាំ សង្ស័យថាជាអ្នកមើលផ្លូវ។ ឯឈ្មោះ លី សៅ សង្ស័យជាអ្នកបើកម៉ូតូដឹកជនដៃដល់ ត្រូវបានសមត្ថកិច្ចឃាត់ខ្លួនចុងក្រោយគេ នា​រសៀល​ថ្ងៃទី៣ ខែធ្នូនេះ។ ដោយឡែក លោក ថោង សារ៉ាត់ មិនត្រូវបានសមត្ថកិច្ចឃាត់ខ្លួនទេ ក្រោយពីបាន​ហៅ​សាក​សួរកាលពីថ្ងៃទី១ ខែធ្នូនោះមក។

ការឡោមព័ទ្ធភូមិគ្រឹះនោះ បើទោះបីស្វែងរកចាប់ខ្លួនលោក ថោង សារ៉ាត់ មិនទាន់បានក៏ដោយ ក្រុមសមត្ថកិច្ច​ចម្រុះបានធ្វើការឃាត់ខ្លួនឪពុកម្តាយ លោក ថោង សារ៉ាត់ និងមនុស្សផ្សេងទៀត ពីបទសមគំនិត​នៃអំពើ​ឃាតកម្ម លើលោក អ៊ឹង ម៉េងជឺ។ ក្រោយពីឃាត់ខ្លួនមនុស្សសរុប១៤នាក់ រួមមានឪពុកម្តាយ ប្រពន្ធ អ្នកបម្រើ និងអង្គរក្សលោក ថោង សារ់ាត់ នោះ ក្រុមសមត្ថកិច្ចបានរកឃើញអាវុធ៦ដើម ដែលបានធ្វើការលាក់ទុក ដោយ​ខុសច្បាប់។ នេះបើយោងតាមព័ត៌មាន ដែលផ្សព្វផ្សាយនៅលើគេហទំព័រសាលារាជធានីភ្នំពេញ។

សូមបញ្ជាក់ថា ការឈានដល់ការឃាត់ខ្លួន និងសាកសួរអង្គរក្សលោក ថោង សារ៉ាត់នេះ ដោយយោងតាម​កាមេរ៉ាសុវត្តិភាព ដែលបំពាក់ភ្ជាប់រថយន្តទំនើបរបស់លោក អ៊ឹង ម៉េងជឺនោះ។ អ្នកជំនាញបាននិយាយថា តាមសកម្មភាពក្នុងការមេរ៉ារថយន្ត ដែលបំពាក់គ្រប់ទិសនោះ បានបង្ហាញនូវសកម្មភាពមុនពេលកើតហេតុ និងមុនពេលមានអំពើបាញ់ប្រហារ។ តាមការមេរ៉ានោះ បង្ហាញឲ្យឃើញថា ដំបូងគេបានឃើញមនុស្ស២នាក់ ជិះម៉ូតូធុនទំនើបពាក់មួកសុវត្តិភាពទាំងពីរនាក់ បានជិះតាមពីក្រោយ រថយន្តជនរងគ្រោះរហូត។ នៅពេល​ជិត​ដល់កន្លែងកើតហេតុ អ្នកជិះខាងក្រោយបានបើកមួកសុត្តិភាពរបស់ខ្លួន និយាយទូរស័ព្ទ ដែលជាហេតុធ្វើ​ឲ្យ​កាមេរ៉ារថយន្តជនរងគ្រោះ ចាប់បានមុខជនសង្ស័យយ៉ាងច្បាស់នោះ។

គួររំលឹកថា លោក អ៊ឹង ម៉េងជឺ អាយុ៥៣ឆ្នាំ ត្រូវបានឃាតកបាញ់សម្លាប់មុខហាងលក់ផ្លែឈើឡោ តិចសេងម្តុំ​អាងទឹកអូឡាំពិក ខណៈលោកចុះពីរថយន្តម៉ាកឡិចស៊ីស៥៧០ (ពណ៌ឈាមជ្រូក) ដើម្បីទិញផ្លែឈើ។ លោក​បានស្លាប់ភ្លាមៗនៅកន្លែងកើតហេតុ វេលាម៉ោង៧និង២០នាទីយប់ ថ្ងៃទី២២ ខែវិច្ឆិកា ឆ្នាំ២០១៤។ ក្នុងវីដេអូ នៃកាមេរ៉ាសុវត្ថិភាព គេបានឃើញសកម្មភាពជាក់ស្តែង នៃជនដៃដល់ជាឃាតក ដែលបានឈរ​ជំទែងបាន​បាញ់​សន្ធាប់ទៅលើលោក អ៊ឹង ម៉េងជឺ ប្រៀបបាននឹងផ្ទាំងស៊ីប។

បន្ទាប់ពីថ្ងៃកើតហេតុភ្លាមៗ អ្នកលេងបណ្តាញព័ត៌មានសង្គម បានបង្ហោះវីដេអូឃ្លីបនៃសកម្មភាព ឃាតកបាន​បាញ់ប្រហារលោក អ៊ឹង ម៉េងជឺ។ ក្នុងអ្នកប្រើប្រាស់បណ្តាញសង្គម បានប្រៀបធៀបជនដៃដល់ក្នុងវីដេអូ ទៅ​នឹង​មន្ត្រីអង្គរក្ស របស់ស្នងការរងនគរបាលរាជធានីភ្នំពេញ លោក ជួន ណារិន ស្របពេលលោក​ចុះពិនិត្យ​សាក​សព ក្រោយឃាតកបាញ់សម្លាប់។

ការដាក់ការសង្ស័យនេះ ដោយសារមន្ត្រីរូបនោះស្ថិតក្នុងសម្លៀកបំពាក់ ឯកសណ្ឋាន កម្ពស់កំពរ ស្បែកជើង និងភិនភាគផ្សេងៗទៀត ដូចគ្នាច្រើនទៅនឹងឃាតករ ដែលបង្ហាញតាមការមេរ៉ាសុវត្តិភាព។ ប៉ុន្តែការសង្ស័នេះ ត្រូវបានស្នងការរងលោក ជួន ណារិន ចេញមុខបដិសេធ ហើយសមត្ថកិច្ចក៏មិនបានកោះហៅមន្ត្រី ដែល​បណ្តាញ​សង្គមដាក់ការសង្ស័យនេះ ទៅសាកសួរដែរ។

រហូតមកដល់ពេលនេះ គ្មានការបញ្ជាក់ណាមួយ ច្បាស់លាស់ និងជាផ្លូវការនៅឡើយថា លោក ថោង សារ៉ាត់ និងអង្គរក្ស ពិតជាពាក់ព័ន្ធ នឹងការធ្វើឃាតលើលោក អ៊ឹង ម៉េងជឺ ឡើយ។ ផ្ទុយមកវិញ មានតែការ​ចុះផ្សាយ​តាមប្រព័ន្ធព័ត៌មាន និងការលើកឡើងតៗ ដោយដាក់បន្ទុកលើលោក ថោង សារ៉ាត់ និងអង្គរក្ស​ទាំងនោះ​តែ​ប៉ុណ្ណោះ។ ការចោទប្រកាន់លោកថោង សារ៉ាត និងការឃាត់ខ្លួនអង្គរក្ស ថាជាអ្នកមេគំនិត និងជាអ្នកអនុវត្ត ក្នុងករណីឃាតកម្មកណ្តាលរាជធានីភ្នំពេញនេះ ក៏កំពុងស្ថិតក្នុងភាពស្រពិចស្រពិល នៅឡើយដែរ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...