តារាហ្វេសប៊ុកដ៏ល្បី របស់​គណបក្ស​កាន់​អំណាច លោក ផែង វណ្ណៈ បាន​លើក​ឡើង​ថា បទ​ចោទ​ដែល​តុលាការ​បាន​ចោទ​ប្រកាន់​​ទៅ​លើ​លោក ថោង សារ៉ាត ម្ចាស់​បុរី៩៩៩ ជា​បទ​ចោទ​ដែល​ខុស​បច្ចេកទេស។ ខុស​បច្ចេកទេស ដោយ​លោក​លើក​ឡើង​ថា លោក​ចៅក្រម​សាលា​ដំបូង​រាជធានី​ភ្នំពេញ លោក លី សុខលេង បាន​ដាក់​បន្ទុក​ទៅ​លើ​លោក​ឧកញ៉ា ថោង សារ៉ាត់ មិន​ត្រឹម​ត្រូវ​តាម​ច្បាប់​នៃ​ក្រម​ព្រហ្មទណ្ទ។

តារាហ្វេសប៊ុក ដែលភាគច្រើន​អង្គុយ​ចាំ​តែ​រិះគន់​គណបក្ស​ប្រឆាំង រួម​ជា​មួយ​សកម្មជន​ទាំង​ឡាយ ដែល​មិន​ពេញ​ចិត្ត​បក្ស​កាន់​អំណាច​នេះ បាន​ដាក់​ជា​សំណូរ​ថា បទ​ចោទ​ដែល​ចៅ​ក្រម​សាលា​ដំបូង បាន​ចោទ​ទៅ​លើ​ឧកញ៉ា​វ័យ​ក្មេង​ថៅកែ​ក្រុមហ៊ុន អ៊ិនធើណេសិនណល អ៊ិនវេសមេន «តើ​ជា​កំហុស​អចេតនា ឬ ជា​កំហុស​ចេតនា? »

លោក ផែង វណ្ណៈ សរសេរបបញ្ជាក់ថា «តាមក្រមព្រហ្មទណ្ឌ ទង្វើរបស់ ថោង សារ៉ាត់ ត្រូវចោទពីបទ ផ្ដើម​គំនិតក្នុងអំពើឃាតកម្មគិតទុកជាមុន ដែលត្រូវផ្តន្ទាទោសតាមាត្រា ២៨ និង មាត្រា ២០០ នៃក្រមព្រហ្មទណ្ឌ នៃព្រះរាជាណាចក្រកម្ពុជា។ ប៉ុន្តែលោកចៅក្រមស៊ើបអង្កេត សាលាដំបូងរាជធានីភ្នំពេញ គឺលោក លី សុខលេង បែជាសរសេរថា ត្រូវផ្ដន្ទាទោសតាមមាត្រា ២៨ និង មាត្រា ៤០០ ទៅវិញ។ បើតាមខ្លឹមសារ មាត្រា ៤០០ ទោសដែលត្រូវអនុវត្ត អំពើទទួលផលចោរកម្មត្រូវផ្ដន្ទាទោសដាក់ពន្ធនាគារពី ២ ឆ្នាំ ទៅ ៥ ឆ្នាំ និង​ពិន័យ​ជាប្រាក់ពី ៤លាន ទៅ ១០ លានរៀល។ ដោយឡែក មាត្រា ២០០ បទឃាតកម្មគិតទុកជាមុន ជន​ល្មើស​ត្រូវផ្ដន្ទាទោសដាក់ពន្ធនាគារអស់មួយជីវិត។ ដូច្នេះ ពីរមាត្រានេះ ផ្ទុយគ្នាឆ្ងាយណាស់ លោកចៅក្រម​គួរ​តែ​ពិនិត្យកែសំរួលឡើងវិញ។»

តាមដីការកោះហៅរបស់លោក លី សុខហេង ចៅក្រមស៊ើបសួរនៃសាលាដំបូងរាជធានីភ្នំពេញ បានបញ្ជាក់ថា លោកថោង សារ៉ាត់ ហៅ«មិន» មានស្រុកកំណើតភូមិ-ឃុំបាវិត ស្រុកចន្រ្ទា ខេត្តស្វាយរៀង និងមានទីលំនៅ​បច្ចុប្បន្ននៅសង្កាត់ស្ទឹងមានជ័យ ត្រូវប្រកាន់ពីបទផ្តើមគំនិតក្នុងអំពើឃាតកម្មគិតទុកជាមុន ដែលប្រព្រឹត្ត​ទៅ​ នៅចំណុចមុខផ្ទះលក់ផ្លែឈើយីហោឡោ តិចសេង កាលពីថ្ងៃទី២២ ខែវិច្ចិកា ឆ្នាំ២០១៤ តាមបទល្មើស​ព្រហ្មទណ្ឌដែលមានចែងឱ្យផ្តន្ទាទោស តាមមាត្រា២៨ និងមាត្រា៤០០នៃក្រមព្រហ្មទណ្ឌ៕