ព្រាប កុល៖ ការប្រកាសទ្រព្យសម្បត្តិរបស់មន្រ្តីរាជការ គួរមានលក្ខណៈ«បើកចំហរ»
- ដោយ: ប្រាថ្នា អត្ថបទ៖ ប្រាថ្នា ([email protected]) - ភ្នំពេញ ថ្ងៃទី១២ ធ្នូ ២០១៤
- កែប្រែចុងក្រោយ: December 15, 2014
- ប្រធានបទ: តម្លាភាព
- អត្ថបទ: មានបញ្ហា?
- មតិ-យោបល់
-
នាយកប្រតិបត្តិអង្គការតម្លាភាពកម្ពុជា លោក ព្រាប កុល បានលើកឡើងថា ច្បាប់ប្រកាសទ្រព្យសម្បត្តិ នៅក្នុងប្រទេសកម្ពុជា មានលក្ខណៈជាការសំងាត់ មិនទាន់មានលក្ខណៈបើកចំហរនោះទេ។ លោកថា ប្រកាសទ្រព្យសម្បត្តិជាលក្ខណៈសំងាត់នេះ មានប្រសិទ្ធិភាពតែមួយភាគប៉ុណ្ណោះ ប៉ុន្តែមិនបានចូលរួមក្នុងការកាត់បន្ថយអំពើពុករលួយ ឲ្យមានប្រសិទ្ធភាពពេញលេញនោះទេ ។
លោក ព្រាប កុល បានពន្យល់ថា ចង់ឱ្យការអនុវត្តនេះឱ្យមានប្រសិទ្ធិភាពពេញលេញបាន ទាល់តែច្បាប់នេះតម្រូវឱ្យមន្រ្តីជាប់កាតព្វកិច្ចប្រកាសទ្រព្យសម្បត្តិទាំងអស់ ត្រូវប្រកាសជាចំហរ ដើម្បីឱ្យសាធារណៈជនដឹង និងចូលរួមតាមដាន ពីការកើនឡើងឬការប្រែប្រួល នៃទ្រព្យសម្បត្តិរបស់មន្រ្តីជាប់កាតព្វកិច្ច។ លោកថា បើកចំហរនេះ វាក៏បង្កភាពងាយស្រួល ក្នុងការចាត់វិធានការអនុវត្តច្បាប់ផងដែរ។
ការឡើងរបស់លោក ព្រាប កុល បានធ្វើឡើង បន្ទាប់ពីអង្គភាពប្រឆាំងអំពើពុករលួយ តាមរយៈគេហទំព័ររបស់ខ្លួន បានជូនដំណឹងដល់មន្រ្តីរាជទាំងអស់ ត្រូវប្រកាសទ្រព្យសម្បត្តិ និងបំណុលតាមការកំណត់ របស់អង្គភាពប្រឆាំងអំពើពុករលួយ។
សេចក្តីប្រកាសព័ត៌មាន របស់អង្គភាពប្រឆាំងអំពើពុករលួយនោះ បានបញ្ជាក់ថា មន្រ្តីដែលជាប់កាព្វតកិច្ច មានទាំងថ្នាក់ដឹកនាំ និងមន្ត្រីទទួលខុសត្រូវផង ត្រូវមកប្រកាសទ្រព្យសម្បត្តិ និងបំណុល សម្រាប់របប២ឆ្នាំ ដែលនឹងប្រព្រឹត្តិទៅ ចាប់ពីថ្ងៃទី១ ដល់ថ្ងៃទី៣១ ខែមករា ឆ្នាំ២០១៥ត្រូវ។ អង្គភាពប្រឆាំងអំពើពុករលួយ នឹងទទួលឯកសារប្រកាសទ្រព្យសម្បត្តិ និងបំណុលជារៀងរាល់ថ្ងៃ ពីថ្ងៃច័ន្ទ ដល់ថ្ងៃអាទិត្យ និងថ្ងៃបុណ្យ។
មន្រ្តីដែលជាប់កាតព្វកិច្ចប្រកាសទ្រព្យសម្បត្តិ ត្រូវបានបញ្ជាក់នៅក្នុងឯកសារខាងក្រោម និងមានជាអាថ៌៖
ទី១. មន្រ្តីរាជការដែលមានឋានៈស្មើ និងឋានៈចាប់ពីប្រធាននាយកដ្ឋានឡើងទៅ មន្រ្តីយោធានគរបាលដែលមានឋានន្តរស័ក្កចាប់ពីវរៈសេនីយ៍ឯកឡើងទៅ ចៅក្រមអាសនៈ ចៅក្រមអយ្យការ សារការី ក្រឡាបញ្ជី និងអាជ្ញាសាលា។
ទី២. សមាជិកព្រឹទ្ធសភានិតិកាលទី៣ រួមមានសមជិករាជរដ្ឋាភិបាលនីតិកាលទី៥ និងសមាជិកក្រុមប្រឹក្សាឃុំ-សង្កាត់អាណត្តិទី៣។
និងទី៣. សមាជិករដ្ឋសភានិតិកាលទី៥ លើកលែងតែតំណាងរបស់គណបក្សសង្រ្គោះជាតិ៣៣រូប ដែលបានប្រកាសកាលពិខែសីហា និងកញ្ញាឆ្នាំ២០១៤៕
