ស្រវឹង ខឹងខ្ចីលុយបងស្រីមិនបាន គប់កញ្ចក់ផ្ទះបែកខ្ចេច
- ដោយ: ក. វិច្ចនី អត្ថបទ៖ក. វិច្ចនី ([email protected]) - យកការណ៍៖ ហេង វុទ្ធី - ភ្នំពេញ ថ្ងៃទី ១៦ ធ្នូ ២០១៤
- កែប្រែចុងក្រោយ: December 17, 2014
- ប្រធានបទ: ផ្ទៃក្នុង
- អត្ថបទ: មានបញ្ហា?
- មតិ-យោបល់
-
ស្រ្តីពីរនាក់បងប្អូន នៅប្លុកផ្សារស្ទឹងមានជ័យ បានឈ្លោះប្រកែកគ្នា ទាំងយប់អាធ្រាត ធ្វើឲ្យភ្ញាក់ផ្អើលអស់អ្នកជិតខាង មិនបានដេកពួនម្តងជាពីរដងទៅហើយ នៅក្នុងយប់ថ្ងៃទី ១៦ ខែធ្នូនេះ។ រឿងរ៉ាវបង្ករហេតុ ឲ្យទៅជាមានរឿងវែងឆ្ងាយដូច្នេះ បណ្តាលមកពីអ្នកស្រី មាស ស្រីពៅ ជាប្អូនស្រីភាគីដើមហេតុ បានផឹកស្រាស្រវឹង ហើយបានបីកូនរបស់ខ្លួនដែល ទើបនឹងសម្រាលនោះ ទៅផ្ទះបងស្រីបង្កើតរបស់ខ្លួនឈ្មោះ មាស ស្រីកា ដើម្បីខ្ចីលុយ។
ដោយសារតែអ្នកស្រី មាស ស្រីពៅ បានផឹកស្រាស្រវឹងជោគហើយនោះ ហើយនិយាយស្តីក៍លែងដឹងទិសតំបន់ បងស្រីរបស់អ្នកស្រី ក៍ប្រាប់ឲ្យបីកូនត្រឡប់មកផ្ទះវិញ ព្រោះគិតថាយប់ត្រជាក់ដូច្នេះ អាចប៉ះពាល់ដល់សុខភាពកូន។ ភ្លាមៗនោះ ស្រ្តីកូនខ្ចីរូបនេះ បានបីកូនត្រឡប់មកផ្ទះវិញ ប៉ុន្តែមិនបានប៉ុន្មានម៉ោងផង ស្រាប់តែគេឃើញស្ត្រីដដែលនេះ បានកាន់កំបិតចំនូនពីរ សំដៅមកផ្ទះបងស្រីខ្លួនម្តងទៀត ដែលបំរុងនឹងយកកំបិតនោះ មកចាក់សំលាប់អ្នកស្រី មាស ស្រីកា ជាបង ប៉ុន្តែត្រូវបានអ្នកជិតខាងឃាត់ទាន់ពេល។
រឿងរ៉ាវក្នុងគ្រួសារត្រឹមប៉ុណ្ណោះ នៅមិនបញ្ចប់ដោយងាយៗនោះទេ ព្រោះទំនងជាសុរាកាន់តែជ្រាបសុះសាច់ហើយ។ អ្នកភូមិនៅក្បែរ បានឮពាក្យជេរបញ្ចោរបងស្រី មិនបាត់មួយមាត់។
អ្នកស្រី មាស ស្រីពៅ បានស្រែកថា បងស្រីរបស់គាត់ បាននិយាយម៉ាកងាយគាត់ ជាជនក្រីក្រមិនស្មើនឹងខ្លួន និងថាបងស្រីរបស់ខ្លួន មានចិត្តអាក្រក់ណាស់ មិនសមដាក់ឈ្មោះត្រកូលដូចខ្លូននោះទេ។ អ្នកស្រី មាស ស្រីពៅ បានបញ្ជាទៅអ្នកស្រី មាស ស្រីកា ជាបងស្រីបង្កើតរបស់ខ្លួន ឲ្យដូរត្រកូលចេញ ដើម្បីកុំឲ្យជាប់ពូជជាមួយគ្នា។
ទំនងជាពាក្យជេរប្រទេចរបស់មនុស្សស្រវឹង ធ្វើឲ្យលោតចំចំណុច និងទ្រាំមិនបានផង អ្នកស្រី មាស ស្រីកា ជាបង ក៍ស្ទុះមកទះកំផ្លៀងមួយដៃពេញមួយទំហឹង ទៅលើស្ត្រីទើបនឹងឆ្លងទន្លេ បង្កឲ្យជម្លោះរវាងបងប្អូនស្រីទាំងពីរ ផ្អើលដល់អាជ្ញាធរមូលដ្ឋាន។ បន្ទាប់ពីចុះមកសម្រួល និងសន្យារងចាំដល់ពេលព្រឹក ទើបដោះស្រាយបញ្ហានេះឲ្យដាច់ស្រេច បុរសម្នាក់ដែលតាំងខ្លួនជាតំណាងឲ្យអាជ្ញាធរនោះ បានសម្រេចការបញ្ចុះបញ្ចូល ឲ្យស្ត្រីទាំងពីរស្ងាត់មាត់ ដើម្បីត្រឡប់ទៅផ្ទះវិញរៀងៗខ្លួន។
ហេតុតែចង់ឈ្នះបងស្រី និងក្រោយពីបុរសម្នាក់នោះ បានចាកចេញមិនទាន់បានប៉ុន្មាននាទីផង នៅវេលាម៉ោងប្រហែលជាង ៩ និង៣០នាទីយប់ អ្នកស្រី មាស ស្រីពៅ បានកាន់ដុំថ្មសំដៅមករករឿង ដល់ផ្ទះអ្នកស្រី មាស ស្រីកា ជាថ្មីម្តងទៀត។ ប៉ុន្តែលើកនេះ ប្អូនស្រីបែបលេងរៀងធ្ងន់ជាងមុន និងលេងមែនទែន ព្រោះអ្នកស្រីជាប្អូនឆ្នាស់ឆ្នើមរូបនេះ បានព្រលែងដុំថ្មជាច្រើនដុំ បណ្តាលឲ្យកញ្ចក់ទ្វាផ្ទះរបស់បងស្រី បែកខ្ចាយ។ មើលទៅ បែបឈ្លោះគ្នា មិនចេះចប់ទេ ព្រោះអ្នកយកព័ត៌មានយើង បាននៅកន្លែងកើតហេតុរហូតដល់ម៉ោង ជាង១០ យប់ ប៉ុន្តែសម្រែកក្ដៅក្រហាយ នៅតែបន្តវាយលុកគ្នាទៅវិញទៅមក កាន់តែរន្ថើនឡើង៕