នីតិវិធីបោះឆ្នោតបែបទំនើប នឹងត្រូវដាក់សាកល្បងនៅខេត្តចំនួនពីរ
- ដោយ: ក. វិច្ចនី អត្ថបទ៖ ក. វិច្ចនី ([email protected]) - យកការណ៍៖ ស្រ៊ុន ទិត្យ - ភ្នំពេញ ថ្ងៃទី ១៨ ធ្នូ ២០១៤
- កែប្រែចុងក្រោយ: December 18, 2014
- ប្រធានបទ: បោះឆ្នោត
- អត្ថបទ: មានបញ្ហា?
- មតិ-យោបល់
-
លោក គល់ បញ្ញា នាយកប្រតិបត្តិនៃអង្គការខុមហ្វ្រែល បានថ្លែងថា ចំណុចសំខាន់ៗ ដែលមានការផ្លាស់ប្តូរខុសគ្នាពីប្រព័ន្ធ និងនីតិវិធីបច្ចប្បន្ន ជាមួយនឹងនីតិវិធី នៃការចុះឈ្មោះបោះឆ្នោតបែបទំនើប នឹងត្រូវយកទៅអនុវត្តសាកល្បងនៅក្នុងខេត្ត រតនៈគីរី និងខេត្ត កំពង់ចាម ដើម្បីបញ្ជាក់ឲ្យដឹងថា ប្រព័ន្ធថ្មីនេះ នឹងធានាថាគ្មានឈ្មោះស្ទួន និងការបញ្ចូលទិន្នន័យ មិនឲ្យមានកំហុសឆ្គង។ ការលើកឡើងរបស់លោក គល់ បញ្ញា បានធ្វើឡើងនៅក្នុងសន្និសីទមួយ ស្តីពីការផ្លាស់ប្តូរចំណុចសំខាន់ៗ ពីប្រព័ន្ធបោះឆ្នោតបច្ចុប្បន្ន ជាមួយនឹងប្រព័ន្ធបោះឆ្នោតថ្មី បែបទំនើប នាព្រឹកថ្ងៃទី ១៨ ខែធ្នូ ឆ្នាំ២០១៤នេះ។
បើសិនជាការសាកល្បងនេះ ទទួលបានជោគជ័យតាមគម្រោងនោះ ប្រព័ន្ធនេះ អាចដំណើរការចុះឈ្មោះបោះឆ្នោត ដើម្បីបង្កើតបញ្ជីឈ្មោះបោះឆ្នោតថ្មី ក្នុងរយៈពេលប្រហែល ៨០ថ្ងៃ ទៅ៩០ថ្ងៃ បំពេញការងារសម្រាប់អ្នកចុះឈ្មោះបោះឆ្នោត ១០លាននាក់ ហើយចំណាយថវិការប្រមាណជា ១៧លានដុល្លារអាមេរិក។
គួបញ្ជាក់ថា ប្រព័ន្ធបោះឆ្នោតនេះ ត្រូវបានបង្កើតឡើងសម្រាប់បម្រើឲ្យការចុះឈ្មោះ និងការធ្វើបច្ចុប្បន្នភាពបញ្ជីឈ្មោះបោះឆ្នោត ដែលវាប្រើប្រាស់ឧបករណ៍បច្ចេកវិជ្ជាទីនើប ហើយសម្របទៅតាមលទ្ធភាព និងសមត្ថភាពនៅមូលដ្ឋាន និងអាចជឿទុកចិត្តបានក្នុងកំរិតខ្ពស់។ ទិន្នន័យ ដែលមាននៅក្នុងបញ្ជីឈ្មោះបច្ចុប្បន្ន ត្រូវប្រើប្រាស់ជាមូលដ្ឋានសម្រាប់ប្រព័ន្ធ និងបញ្ជីថ្មី។
ប្រព័ន្ធបែបទំនើបនេះ នឹងពង្រឹងស្ថាប័នទទួលខុសត្រូវឲ្យច្បាស់លាស់ គ្មានឈ្មោះស្ទួន បង្កើនភាពត្រឹមត្រូវ នៃទិន្នន័យអ្នកបោះឆ្នោត ដែលមិនអាចបំបាត់បាន។ ម្យ៉ាងវិញទៀត វានឹងជួយបន្ថយបន្ទុករបស់អ្នកចុះឈ្មោះបោះឆ្នោត ក្នុងការពិនិត្យបញ្ជីឈ្មោះបោះឆ្នោត និងបង្កើនតម្លាភា ពក្នុងការធ្វើសវនកម្មបញ្ជីឈ្មោះបោះឆ្នោតថែមទៀតផង៕