នៅវេលាម៉ោង​ប្រមាណ​ជិត ១១ ថ្ងៃ​ត្រង់ តំណាង​ក្រសួង​យុត្តិធម៌ បាន​ចេញ​មក​ទទួល​ញត្តិ​ដែល​ព្រះសង្ឃ និង​ប្រជា​ពលរដ្ឋ​បាន​យក​ទៅ​ដាក់​នៅ​ក្រសួង​​នេះ។ ប៉ុន្តែ​ក្រុម​ព្រះ​សង្ឃ និង​ពលរដ្ឋ មិន​បាន​ប្រគល់​ញត្តិ​នេះ ឲ្យ​ទៅ​តំណាង​ក្រសួង​យុត្តិធម៌​ឡើយ ដោយ​ទាម​ទារ​សុំ​ឲ្យ​រដ្ឋមន្ត្រី​ក្រសួង​យុត្តិធម៌ ចេញ​មុខ​មក​ទទួល​ដោយ​ផ្ទាល់​តែ​ម្តង។

ដោយការទទឹងរងចាំ មិន​មាន​ឃើញ​រដ្ឋមន្រ្តី​ចេញ​មុខ​មក​ទទួល​ញត្តិ​របស់​ពួក​ខ្លួន ព្រះ​សង្ឃ​ដែល​និមន្ត​ទៅ​បិណ្ឌបាត្រ​យក​ភាព​យុត្តិធម៌ បាន​ធ្វើ​ពិធី​ផ្កាប់​បាត្រ ហើយ​មិន​ព្រម​ទទួល​យក​ចង្ហាន់​មក​ឆាន់​នោះ​ឡើយ នៅ​មុខ​ក្រសួង​យុត្តិធម៌ នា​ព្រឹក​ថ្ងៃ​ទី ១៨ ខែ​ធ្នូ កន្លង​មក​នេះ។

តាមសង្ឃដីការបស់ព្រះតេជគុណ កែវ សុម៉ាលី ដែលបាននិមន្តចូលរួមក្នុងពិធីនោះ បានឲ្យដឹងថា ការធ្វើ​ពិធី​ផ្កាប់បាត្រនេះ គ្រាន់តែចង់បិណ្ឌបាត្ររកភាពយុត្តិធម៌ ឲ្យសកម្មជនដែលជាប់ពន្ធនាគាទាំង ១៨ អង្គ​និងនាក់​តែប៉ុណ្នោះ ហើយការផ្កាប់បាទមិនទទួលយកចង្ហាន់នេះ ព្រោះតែមិនចង់សប្បាយ លើគំនរទុក្ខរបស់​ប្រជា​ពលរដ្ឋ។ ប្រសិនបើព្រះសង្ឃទទួលយកចង្ហាន់ បានឆាន់ឆ្អែត ហើយសប្បាយនោះ វាស្មើនឹងការប្រងើយ​កន្តើយ មិនរវល់ជាប្រជាពលរដ្ឋដែលកំពុងរគ្រោះ។

ព្រះតេជគុណអង្គនេះ បានន្ថែមយ៉ាងដូច្នេះទៀតថា ពិធីផ្កាប់បាត្របានបង្ហាញពីភាពអយុត្តិធម៌​នៅតែមាន​ចំពោះប្រជាពលរដ្ឋ និងព្រះសង្ឃដដែល ដោយហេតុថារដ្ឋមន្ត្រីក្រសួងយុត្តិ មិនព្រមចេញមកទទួលញត្តិ​ដែលព្រះសង្ឃបាននិមន្តសុំបិណ្ឌបាត្រនោះ។

យ៉ាងណាក៏ដោយ ក៏ពិធីផ្កាប់បាត្រនេះ មិនទទួលបានផ្លែផ្កា ដូចការទាមទារទេ ដោយរដ្ឋមន្ត្រីក្រសួងយុត្តិធម៌ នៅតែមិនចេញមកទទួលញត្តិ របស់ក្រុមអ្នកតវ៉ានោះឡើយ និងបាននិមន្ត និងបន្តដំណើរទៅបិណ្ឌបាត្រ នៅមុខព្រះបរមរាជវាំងបន្តទៀត។ បន្ទាប់ពីតំណាងព្រះបរមរាជវាំង បានចេញមកទទួលញត្តិរួចរាល់ហើយ ពួកគេបានបំបែកជួរ នៅវេលាម៉ោងប្រមាណជា ១រសៀល៕