សម រង្ស៊ី៖ គណបក្សកាន់អំណាច តែងតែកម្ចាត់គណបក្សប្រឆាំង
- ដោយ: ក. វិច្ចនី អត្ថបទ និងយកការណ៍៖ ក. វិច្ចនី ([email protected]) - ភ្នំពេញ ថ្ងៃទី១៩ ធ្នូ ២០១៤
- កែប្រែចុងក្រោយ: December 19, 2014
- ប្រធានបទ: នយោបាយ
- អត្ថបទ: មានបញ្ហា?
- មតិ-យោបល់
-
គណៈបក្សកាន់អំណាច តែងតែព្យាយាមកម្ចាត់គណបក្សប្រឆាំង យ៉ាងហោចណាស់ក៏ចរិកនយោបាយនេះ នៅបន្តមានរហូតដល់ពេលបច្ចុប្បន្ន។ នេះជាការលើកឡើងរបស់លោក សម រង្ស៊ី ប្រធានគណបក្សសង្គ្រោះជាតិ ទៅកាន់អ្នកសារព័ត៌មាន នៅវិមានរដ្ឋសភាជាតិ បន្ទាប់ពីបានបញ្ជប់កិច្ចប្រជុំពិភាក្សា ស្តីពីការធ្វើវិសោធនកម្មបទបញ្ជាផ្ទៃក្នុង នៃរដ្ឋសភា នាព្រឹកថ្ងៃទី ១៩ ខែធ្នូ ឆ្នាំ២០១៤នេះ។
លោក សម រង្ស៊ី បាននិយាយថា វាគឺជាវប្បធម៌កម្ចាត់គ្នា ដែលឈានដល់វប្បធម៌ហឹង្សា ក៍ធ្លាប់មានដែរ។ លោក បានថ្លែងទៀតថា៖ «បើគេមិនកម្ចាត់រាងកាយទេ ក៍គេកម្ចាត់តាមផ្លូវច្បាប់ ឫតាមប្រព័ន្ធតុលាការដែរ ដើម្បីបញ្ជប់ជីវិតនយោបាយ នៃអ្នកតំណាងរាស្ត្រមកពីគណបក្សប្រឆាំង ដូចជាមានការដកអភ័យឯកសិទ្ធិ មានការបណ្តេញចេញពីរដ្ឋសភា មានការឲ្យតុលាការផ្តន្ទាទោសឲ្យជាប់គុក និរទេស...។ ដូច្នេះ គណបក្សប្រឆាំងមកទល់ពេលនេះ គឺជួបការលំបាក។»
ការថ្លែងរបស់មេដឹកនាំគណបក្សប្រឆាំង បានធ្វើឡើង នៅពេលដែលរដ្ឋសភាជាតិកម្ពុជា កំពុងត្រៀមធ្វើវិសោធនកម្ម លើបទបញ្ជាផ្ទៃក្នុង នៃរដ្ឋសភា ហើយការពិភាក្សារវាងក្រុមការងារ របស់គណបក្សទាំងពីរ កំពុងធ្វើការងារលើករណីនេះ។ លោក សម រង្ស៊ី បាននិយាយថា «វាជារបត់នយោបាយមួយដ៍សំខាន់ ព្រោះអ្វីដែលគេធ្លាប់និយាយថា គណៈបក្សប្រឆាំង ឥឡូវនេះមានការទទួលស្គាល់ អំពីតួនាទី ភារកិច្ច សិទ្ធិ បុព្វសិទ្ធ ដើម្បីឲ្យគណបក្សក្រៅរដ្ឋាភិបាលនេះ បានបំពេញតួនាទី ដូចមានចែងនៅក្នុងបញ្ជាផ្ទៃក្នុងនៃរដ្ឋសភា»។
ប្រធានគណបក្សសង្គ្រោះជាតិដ៏ល្បីល្បាញ បាននិយាយថា ក្រោយពីវិសោធនកម្ម លើបទបញ្ជាផ្ទៃក្នុង នៃរដ្ឋសភារួច លោកជឿជាក់ថា គណបក្សប្រឆាំង នឹងត្រូវបានគេបញ្ឈប់ការធ្វើទុក្ខបុកម្នេញ ហើយឈានពីការកម្ចាត់មកទទួលស្គាល់វិញ ដើម្បីធ្វើសកម្មភាពជាមួយគ្នា ដែលអាចនឹងចេញលទ្ធផលជាវិជ្ជមាន។ លោក សម រង្ស៊ី បានបញ្ជាក់ទៀតថា ដូច្នេះគណបក្សទាំងពីរ ត្រូវតែទទួលគ្នាសិន ហើយវាក៍ជាការបង្ហាញ ពីការគោរពពីគ្នាទៅវិញទៅមកផងដែរ។
ការធ្វើវិសោធនកម្ម លើបទបញ្ជាផ្ទៃក្នុងនៃរដ្ឋសភា បានផ្ដោតសំខាន់នៅក្នុងជំពូកទី ១២ ប្រការ៤៨ថ្មី នៃបទបញ្ជាផ្ទៃក្នុងរដ្ឋសភា។ ការធ្វើវិសោធន៍កម្មនេះ មិនមែនធ្វើឡើង ដើម្បីបម្រើផលប្រយោជន៍គណបក្សណាមួយឡើយ ឫបុគ្គលណាម្នាក់ដែរ និងមែនមែនគ្រាន់តែឆ្លើយតប ទៅនឹងស្ថានភាពប្រទេស នាពេលបច្ចុប្បន្ននោះដែរ។ នេះបើតាមសំដី របស់មេដឹកនាំគណបក្សប្រឆាំងដដែល។ ប៉ុន្តែវិសោធនកម្មនេះ «ធ្វើឡើងដើម្បីមានការធានាថា លទ្ធិប្រជាធិបតេយ្យនៅកម្ពុជា នឹងដំណើរការទៅមុខដោយរលូន មានភាពរឹងមាំ នឹងមានភាពចាស់ទុំ»៕