ប្រាក់​រាប់​លាន ប៉ើង​ធ្លាក់​ពី​រថយន្ដ​ដឹក​ប្រាក់ បង្ក​ការ​ភ្ញាក់​ផ្អើល​នៅ​ហុងកុង (vdo)

ប្រាក់ប្រមាណជា២លានដុល្លារ បានប៉ើងចេញពីរថយន្ដដឹកប្រាក់ នៅកណ្ដាលទីក្រុងហុងកុង កាលពីថ្ងៃពុធទី២៥ ខែធ្នូ នេះ។ ទ្វារបស់រថយន្ដពាសដែក បានបិទមិនជាប់ ហើយបានរបើកឡើងដោយចៃដន្យ បង្ក​ឲ្យ​ហេតុការណ៍​នេះ​បង្អើល​ពេញ​ទាំង​ក្រុង​ហុងកុង និងបន្តទៅពេញពិភពលោកទៀត។
ទិដ្ឋភាពរើសលុយ ដែលប៉ើងធ្លាក់នៅតាមផ្លូវ។ (រូបថតផ្តិតពីវីដេអូ)
Loading...
  • ដោយ: សុបិន្ដ អត្ថបទ៖ សុបិន្ត ([email protected]) - ម៉ុងរ៉េអាល់ ថ្ងៃទី២៥ ធ្នូ ២០១៤
  • កែប្រែចុងក្រោយ: December 26, 2014
  • ប្រធានបទ: ចៃដន្យ
  • អត្ថបទ: មានបញ្ហា?
  • មតិ-យោបល់

ហេតុការណ៍នេះ បាន​ធ្វើ​ឲ្យ​មាន​ការ​កក​ស្ទះ​ចរាចរណ៍ នៅ​តាម​បណ្ដោយ​ផ្លូវ គ្លូសេស្ទ័រ (Gloucester) កណ្ដាល​ក្រុង​ហុងកុង ដោយ​សារ​តែ​មាន​អ្នក​ដំណើរ រួម​ជា​មួយ​នឹង​អ្នក​ជិះ​រថយន្ដ​ផង បាន​ឆ្លៀត​ឱកាស​ដើម្បី​ទៅ​រើស​ប្រមូល​យក​ប្រាក់​ទាំង​នោះ។ អ្នក​បើក​តាក់ស៊ី​មួយ​រូប បាន​ឈប់​រថយន្ដ​របស់​ខ្លួន នៅ​កន្លែង​ដែល​ប្រាក់​ប៉ើង​មក​ពាស​ពេញ ដើម្បី​រើស​យក​ក្រដាស​ប្រាក់ ដែល​មាន​ចំនួន​ជា​ច្រើន​រយ​សន្លឹក ជា​ច្រើន​ខ្ទាស់។

រូបភាព​ដាក់​បញ្ចាំង នៅ​តាម​ទូរទស្សន៍ បាន​បង្ហាញ​ឲ្យ​ឃើញ​ដែរ​ថា អ្នក​ដំណើរ​ជា​ច្រើន បាន​រត់​ចូល​ទៅ​ដណ្ដើម​យក​ប្រាក់​ទាំង​នោះ។ ហើយ​កង​កម្លាំង​នគរបាល ដែល​មួយ​ចំនួន​បាន​បំពាក់​ដោយ​អាវុធ និង​ពាក់​ឯក​សណ្ឋាន​ការពារ​ផង បាន​មក​ដល់​ទី​កន្លែង​ភ្លាមៗ ដើម្បី​ដាក់​ទី​កន្លែង​នោះ ឲ្យ​ស្ថិត​នៅ​ក្រោម​ការ​ត្រួត​ពិនិត្យ​របស់​អាជ្ញាធរ។

បើតាមមន្ត្រីនគរបាល បានឲ្យដឹងថា ទឹកប្រាក់ដែលបានប៉ើងចេញទៅ មានចំនួនប្រមាណជា ១៥,២៣លាន​ដុល្លារហុងកុង ត្រូវនឹង១,៩៦លានដុល្លារអាមេរិក។ ភ្លាមៗនេះ គេមិនអាចដឹងបាន ពីចំនួនទឹកប្រាក់ដែល​រើស​បានមកវិញ ដោយភ្នាក់ងារនគរបាល និងចំនួនទឹកប្រាក់ដែលរើសយកចេញទៅ ដោយអ្នកដំណើរ និង​អ្នក​បើក​បររថយន្ដនោះ នៅឡើយ។ ប៉ុន្តែនគរបាលបានប្រកាសថា៖ «នរណាក៏ដោយ ដែលបានរកឃើញ ក្រដាស​​ប្រាក់ដែលទើបនឹងយកចេញពីធនាគារនេះ សូមយកមកប្រគល់ឲ្យអាជ្ញាធរវិញ ឲ្យបានលឿន​បំផុត​តាម​ដែល​អាច​ធ្វើបាន។ ក្នុងករណីផ្ទុយពីនេះ នឹងត្រូវចាត់ទុកថា ជាការលួចមួយ។»

លោក វ៉ាង ស៊ូហុង (Wan Siu-hung) ស្នងការនគរបាលហុងកុង បានបញ្ជាក់ថា អ្នកបើកបររថយន្ដពាសដែក បានបើកបរក្នុងរយៈពេលកន្លះម៉ោង និងបានទៅដល់ទិសដៅដែលខ្លួនត្រូវទៅនោះរួចហើយ តែមិនបានដឹងថា ទ្វាក្រោយរបស់រថយន្ដដឹកប្រាក់របស់ខ្លួន បានរបើកឡើង ហើយកញ្ចប់លុយទាំងខ្ទាស់ៗ បានធ្លាក់ទៅលើដី​នោះទេ។ លុះត្រាទៅដល់ទិសដៅ ទើបអ្នកបើកបរបានដឹងខ្លួនថា ទ្វារថយន្ដខាងក្រោបានរបើក។ លោក វ៉ាង បាននិយាយទៀតថា នគរបាលហុងកុងបានបើកការស៊ើបអង្កេតមួយ ទៅលើប្រាក់ទាំងនោះ ដោយពឹង​ផ្អែក​លើលេខ​រៀងរបស់ក្រដាសប្រាក់ ដែលទើបនឹងបើកចេញពីធនាគារ។

រីឯអ្នកជំនាញខាងធនាគារវិញ បានថ្លែងទៅកាន់ប្រព័ន្ធផ្សព្វផ្សាយក្នុងស្រុកថា ការរក្សាទុកក្រដាសប្រាក់ ដែល​រើស​បានរបៀបនេះ នឹងអាចចាត់ទុកដូចជា«ការលួច»មួយ ហើយអាចរងការផ្ដន្ទាទោស រហូតដល់១០ឆ្នាំ នៅ​ក្នុង​ពន្ធនាគារ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...