បើកបញ្ច្រាសទិស បុកក្មេងចេញពីសាលាបាក់ជើងគ្មានអ្នកទទួលខុសត្រូវ
- ដោយ: ក. សោភណ្ឌ អត្ថបទ៖ ក.សោភ័ណ្ឌ([email protected]) - យកការណ៍៖ ហេង វុទ្ធី - ភ្នំពេញ ថ្ងៃទី៣១ ធ្នូ ២០១៤
- កែប្រែចុងក្រោយ: January 01, 2015
- ប្រធានបទ: គ្រោះថ្នាក់
- អត្ថបទ: មានបញ្ហា?
- មតិ-យោបល់
-
តើក្នុងសង្គមនេះ សម្បូរតែមនុស្សអាត្មានិយម និងគ្មានការទទួលខុសត្រូវទេឬអ្វី? ជួប ឃើញ ដឹងថាមានបញ្ហា តែធ្វើមិនដឹង និងមិនចង់ជួប ហើយអ្នកខ្លះបានជួបហើយ តែគេចធ្វើមិនដឹង ក្រោមគំនិតគិតថា «បើអាចគេចបាន នោះគេនឹងគេច ធ្វើជាមិនដឹងមិនលឺ ដើម្បីកុំឲ្យជាប់ពាក់ព័ន្ធវែងឆ្ងាយ»។ នេះជាព្រឹត្តិការណ៍ ដែលបានកើតឡើងនៅភូមិទី១៥ ផ្លូវ៤៧ សង្កាត់ស្រះចក ខណ្ឌដូនពេញ រាជធានីភ្នំពេញ។ នៅវេលាម៉ោង ៤និង៤៥នាទីល្ងាច ថ្ងៃទី៣១ ខែធ្នូ ឆ្នាំ២០១៤នេះ មានគ្រោះថ្នាក់ចរាចរណ៍មួយ ដែលបង្ករបួសដល់ជនរងគ្រោះរហូតបាក់ជើង។
សាក្សីនៅកន្លែងកើតហេតុ ខាងមុខអនុវិទ្យាល័យ ហ៊ុន សែន ប៊ុន រ៉ានី វត្តភ្នំ បានឲ្យដឹងថា ជនបង្កឈ្មោះ រ៉ែម ភេទប្រុស ជាអ្នកធ្វើការនៅក្នុងអង្កការក្រៅរដ្ឋាភិបាលមួយ បានជិះម៉ូតូបុកក្មេងប្រុសម្នាក់ ឈ្មោះ យឿន ណាជិន រៀននៅថ្នាក់ទី៧E1នៃវិទ្យាល័យខាងលើ។ ម៉ូតូបង្កនោះ មានធុនអាគុបផ្លាកលេខភ្នំពេញ1BC-2823 បើកបរពីជើងទៅត្បូង ក្នុងទិសដៅបញ្រ្ចាសពីគេ។ ស្របពេលដែលសិស្សានុសិស្ស នៅអនុវិទ្យាល័យនេះ បានចេញពីរៀននៅពេលល្ងាច ហើយសិស្សខ្លះនៅមុនពេលកើតហេតុបានរត់ប្រឡែងគ្នា និងមិនបានឃើញម៉ូតូដែលជិះមកបញ្ច្រាសពីខាងមុខ ក៏ប៉ះគ្នា ហើយបណ្តាលឲ្យរងរបួសជើងជាទម្ងន់។
បន្ទាប់ពីកើតហេតុរួច លោកគ្រូអ្នកគ្រូ ជាពិសេសលោកនាយកសាលា បាននិយាយប្រាប់អ្នកសាព័ត៍មានថា លោកមិនបានដឹង ចំពោះហេតុការណ៍ទាំងអស់នេះទេ។ លោកនាយកសាលា បានឲ្យទៅសាកសួរលោកគ្រូទទួលបន្ទុកថ្នាក់។ រីឯលោកគ្រូទទួលបន្ទុកថ្នាក់ ក៏បានឆ្លើយដែរថា លោកមិនដឹងនិងបង្គាប់អ្នកសារព័ត៌មានឲ្យ ទៅសួរមិត្តភក្កិរបស់ក្មេងរងគ្រោះវិញទៅ។
យុវសិស្ស ឃឹម បញ្ញា ជាមិត្តរួមថ្នាក់ជាមួយ ជនរងគ្រោះបាននិយាយថា ពេលចេញពីរៀននៅមុខសាលា ខ្លួនបានរត់ប្រឡែងគ្នាដូចរាល់ដង តែម្តងនេះមិនបានឃើញ ម៉ូតូមកពីមុខទើបមិត្តភក្កិរបស់ខ្លូនជួបគ្រោះថ្នាក់។ ភ្លាមៗនោះមិត្តរួមសាលា ទាំងអស់បានរៃលុយគ្នា ដើម្បីយកជនរងគ្រោះទៅសង្គ្រោះនៅពេទ្យ គន្ធបុប្ផា។
នៅក្នុងហេតុការណ៍នេះដែរ លោក ឈាង សុវណ្ណ នាយរងបុស្ត៍ ស្រះចកបានឲ្យទស្សនាវដ្តីមនោរម្យ.អាំងហ្វូដឹងថា គឺលោកហ៊ានសន្និដ្ឋាថា ម្ចាស់ម៉ូតូជាអ្នកខុសព្រោះ គាត់បើកបរបញ្ច្រាសទិស ហើយបង្កគ្រោះថ្នាក់ទៀត។លោកថា ម៉ូតូត្រូវបានឃាត់ទុក រងចាំការដោះស្រាយទៅតាមច្បាប់៕