សកម្មជន​មួយ​ចំនួន ដែល​មក​ចូល​រួម​បាតុកម្ម​កាលពីថ្ងៃទី០១ ខែ​មករា ឆ្នាំ​២០១៥ ដឹក​នាំ​​ដោយ​​អ្នក​ស្រី ឡាក់ សុភាព បាន​ថ្លែង​ថា ពួក​គាត់​មិន​បាន​ដឹង​ថា ពួក​ខ្លួន​ត្រូវ​បាន​គេ​ហៅ​ឲ្យ​មក​ធ្វើ​បាតុកម្ម​ប្រឆាំង នឹង​គណបក្ស​ដែល​ខ្លួន​ឯង​ចូល​ចិត្ត​​ដូច្នេះ​ទេ។ សកម្ម​ជន​ទាំងនោះ បាន​និយាយ​ថា ធ្វើ​ម៉េច​ឲ្យ​តែ​មាន​យុត្តិធម៌ និង​សុខ​សន្តិភាព​ទៅ ជា​ការ​ល្អ​ណាស់​ទៅ​ហើយ។

លោកយាយ សី សុខេង អាយុ​ជិត ៦០ឆ្នាំ មក​ពី​ខេត្ត​តាកែវ បាន​ថ្លែង​ប្រាប់​ក្រុម​អ្នក​សារព័ត៌មាន​ថា ក្រុម​​លោក​យាយ​ដែល​មក​ពី​ខេត្ត​តាកែវ​ជាង ២១​នាក់ មិន​បាន​ដឹង​ថា​គេ​ហៅ​គាត់​មក​នេះ ដើម្បី​គាំទ្រ​អ្នក​ស្រី ឡាក់ សុភាព ធ្វើ​បាតុកម្ម​នៅ​មុខ​ទី​ស្នាក់ការ របស់​គណៈបក្ស​សង្គ្រោះ​ជាតិ​នោះ​ទេ គ្រាន់​តែ​ដឹង​ថា គេ​ហៅ​មក​ដើម្បី​ប្រជុំ​នៅ​គណៈបក្ស​សង្គ្រោះ​ជាតិ នៅ​ថ្ងៃ​ទី ១ ខែ​មករា ឆ្នាំ​២០១៥ នេះ​ប៉ុណ្ណោះ។

ស្រ្តីវ័យចំណាស់រូបនេះ បានបញ្ជាក់ទៀតថា៖ «មកដើម្បីប្រជុំអីចឹងទៅ បើដឹងថាគេប្រឆាំងគ្នាខ្ញុំអត់មកទេ ដ៍ចឹង ខ្ញុំមានទស្សនៈថាខឹង ខំធ្វើការឲ្យសង្គ្រោះជាតិរាល់ថ្ងៃ ថាខំឲ្យជាតិខ្មែរយើងឲ្យរស់ឡើងវិញ បើបែក​គ្នា​ចឹងខ្ញុំអត់ដឹង បើខ្ញុំដឹងខ្ញុំអត់មកទេ»។

លោកយាយ សី សុខេង បានឆ្លើយច្បាស់ៗទៀតថា បើលោកយាយមក គឺដើម្បីគាំទ្រលោក សម រង្ស៊ី និង​លោក កឹម សុខា។ ការលើកឡើងរបស់លោកយាយ ទំនងជាបានធ្វើឡើងទាំងទើសទាល់ ព្រោះលោកយាយ​មិនដឹងខ្លួន ថាអ្នកស្រី ឡាក់ សុភាព មានរឿងជាមួយគណបក្សខ្លួន ហើយហៅលោកយាយសម្រាប់គោល​បំណង​ខ្លួនដូច្នេះឡើយ។

លោកយាយបានបញ្ជាក់ថា បើគណបក្សសង្គ្រោះជាតិប្រឆាំងគ្នាអញ្ចឹង អ្នកដទៃនឹងសើចចំអកជាមិនខាន ដែលសមាជិកក្នុងគណបក្សប្រឆាំងគ្នាឯង មិនរួបរួមគ្នានោះ។ លោកយាយនៅតែប្រកាន់ពាក្យ​សម្តីរបស់​លោក​យាយថា គាត់ឡើងមក គឺដើម្បីគាំទ្រគណៈបក្សសង្រ្គោះជាតិ មិនមែនមកដើម្បីតវ៉ាប្រឆាំង​គណបក្ស​នោះទេ ហើយថាលោកយាយគាំទ្របក្សនេះ តាំងយូយាណាស់មកហើយ ហើយក៍មិនដែលទទួលបានអ្វី ដែល​ជា​ការទិញទឹកចិត្តដើម្បីឲ្យគាត់មកចូលរួមគាំទ្រនោះដែរ ពោលគឺគាត់សម្រេចចិត្តនឹងពេញចិត្ត​គណៈបក្ស​នេះ​ដោយ​ខ្លួន​ឯង។

ការលើកឡើងរបស់លោក សី ស៊ីខេង មានលក្ខណៈផ្ទុយពីការបញ្ជាក់ពីអ្នកស្រី ឡាក់ សុភាព។ អតីតសមាជិក​គណកម្មការនាយកគណបក្សសង្គ្រោះជាតិ បានថ្លែងប្រាប់អ្នកសារព័ត៌មានថា ក្រុមអ្នកមកធ្វើបាតុកម្ម​នៅថ្ងៃ​ទី​០១ ខែមករានេះ ដើម្បីមកគាំទ្រលោកស្រី ដោយអ្នកទាំងនោះបានឃើញនៅតាម​បណ្តាញ«សង្គម​ហ្វេសប៊ុក» ពីអំពើអយុត្តិធម៌ដែលគណៈបក្សសង្រ្គោះជាតិ បានធ្វើមកលើអ្នកស្រី។

គួរបញ្ជាក់ថា អ្នកស្រី ឡាក់ សុភាព បានដឹកនំាក្រុមសកម្មជនមកធ្វើបាតុកម្មនេះ ក្នុងគោលបំណងដើម្បី​ប្រឆាំង ទៅនឹងការបណ្តេញអ្នកស្រីចេញពីគណៈបក្សសង្គ្រោះជាតិកាលពីថ្ងៃទី៣០ ខែធ្នូ ឆ្នាំ២០១៤កន្លងទៅ ដោយ​សារអ្នកស្រីយល់ថា ការបណ្ដេញចេញនោះខុសច្បាប់របស់គណៈបក្ស និងខុសលក្ខចន្តិកៈ បទ​បញ្ជា​ផ្ទៃក្នុង​របស់គណៈបក្ស និងជាអំពើអយុត្តិធម៌មកលើលោកស្រី៕