ប្រធានគណៈកម្មការទី១០រដ្ឋសភា សន្យាពន្លឿនការដោះស្រាយដីធ្លី នៅបុរីកីឡា
- ដោយ: ប្រាថ្នា អត្ថបទ៖ ប្រាថ្នា ([email protected]) - យកការណ៍៖ ស្រ៊ុន ទិត្យ - ភ្នំពេញ ថ្ងៃទី០២ មករា ២០១៥
- កែប្រែចុងក្រោយ: January 02, 2015
- ប្រធានបទ: ដីធ្លី
- អត្ថបទ: មានបញ្ហា?
- មតិ-យោបល់
-
លោក ហូ វ៉ាន ប្រធានគណៈកម្មាការទី១០នៃរដ្ឋសភា និងជាតំណាងរាស្រ្ត មកពីគណបក្សសង្រ្គោះជាតិ បានសន្យាយ៉ាងដូច្នេះថា លោកនឹងជម្រុញ សាលារាជធានីភ្នំពេញ អង្គភាពប្រឆាំងអំពើពុករលួយ ឱ្យចាត់វិធានការឱ្យបានឆាប់រហ័ស ក្នុងការរកដំណោះស្រាយឱ្យសហគមន៍បុរីកីឡា ទាំង១៨៥គ្រួសារ ដែលកំពុងទាមទារអាគារពីរខ្នងទៀតនេះ។
លោកបានថ្លែងថា៖ «ដូច្នេះដើម្បីឆ្លើយតបបញ្ហានេះ ខ្ញុំសូមអំពាវនាវដល់បងប្អូនបុរីកីឡា សូមឱ្យរៀបចំឯកសារដែលខ្លួន បញ្ជាក់ថា យើងមានឯកសារគតិយុត្ត១៨៥គ្រួសារនេះ ពិតជាអ្នករស់នៅក្នុងបុរីកីឡាប្រាកដមែន ដើម្បីយើងធ្វើអន្តរាគមន៍ ទៅសុំផ្ទះ ឬក៏ឱ្យក្រុមហ៊ុនណ្នឹងសាងសង់ផ្ទះបន្តទៅទៀត»។
លោកបញ្ជាក់ថា លោកក៏បានធ្វើលិខិតទៅអង្គភាពប្រឆាំងអំពើពុករលួយ ដើម្បីឱ្យអង្គភាពប្រឆាំងអំពើពុករលួយ ស៊ើបអង្កេតអ្នកដែលឡើងទៅរស់ខុសច្បាប់ និងដោយសារការពុករលួយ។
នៅព្រឹកថ្ងៃទី០២ ខែមករានេះ អ្នកមានជម្លោះដីធ្លីមកពីសហគមន៍បុរីកីឡា និងសហគមន៍បឹងកក់បានរៀបចំ ប្រារព្ធពិធីរំឮកខួប៣ឆ្នាំ នៃការបណ្តេញចេញដោយបង្ខំនៃសហគមន៍បុរីកីឡា។ ក្រុមអ្នកតវ៉ាបាននាំគ្នាទៅតវ៉ា និងដាក់ញត្តិនៅសាលារាជធានីភ្នំពេញ និងរដ្ឋសភា ដើម្បីទាមទាររកដំណោះស្រាយ ។
ទាក់ទិននឹងការបណ្តេញអ្នកភូមិ នៅសហគមន៍បុរីកីឡាចេញ ដោយបង្ខំនេះ សមាជិករដ្ឋសភាធ្លាប់បានកោះហៅអភិបាលរាជធានីភ្នំពេញ លោក ប៉ា សុជាតិវង្ស និងប្រធានក្រុមហ៊ុន ផានអ៊ីម៉ិច លោកស្រី ស៊ុយ សុផាន ចូលបំភ្លឺរួចមកហើយ ប៉ុន្តែរហូតមកដល់ពេលនេះ នៅតែមិនទាន់មានដំណោះស្រាយ សម្រាប់ជនរងគ្រោះពីការបណ្តេញចេញទាំងនោះនៅឡើយ។
កាលពីថ្ងៃទី៣ ខែមករា ឆ្នាំ២០១២ ប្រជាសហគមន៍បុរីកីឡាជាង៣៨០គ្រួសារ ត្រូវបានក្រុមហ៊ុន ផានអ៊ីម៉ិច របស់លោកស្រី ស៊ុយ សូផាន បណ្តេញចេញទាំងបង្ខំ ឱ្យទៅរស់នៅជាយក្រុង ដូចជាភ្នំបាតជាដើម និងមួយចំនួនទៀតដែលមិនព្រមតាមការជម្លៀសចេញនោះ សុខចិត្តទ្រាំរស់នៅលើគំនរសម្រាម៕