នា​ព្រលប់​ម៉ោង​ប្រមាណ​ជា ១៨ និង ៣០​នាទី ថ្ងៃ​សុក្រ​ទី​២ ខែ​មករា បុរស​ចំណាស់​ម្នាក់ ដែល​កំពុង​អង្គុយ​មើល​ទូរទស្សន៍​នៅ​ក្នុង​ផ្ទះ បាន​ភ្ញាក់​ខ្លួន​ក្រញ៉ាង​ឡើង ដោយ​សារ​តែ​មាន​សម្លេង​គោះ​ទ្វា​ផ្ទះ​របស់​លោក និង​ជួប​ដោយ​ផ្ទាល់​ភ្នែក នូវ​ហេតុការណ៍​ដ៏​ញាប់ញ័រ​​មួយ។ លោក ឡារី វីលគីន (Larry Wilkins) បាន​ងើប​មក​បើក​ទ្វា តែ​បាន​សម្ដែង​ការ​រន្ធត់​ក្នុង​ចិត្ត​ជា​ខ្លាំង ព្រោះ​អ្នក​គោះ​ទ្វា​នោះ​ជា​ក្មេង​ស្រី​ម្នាក់ អាយុ​៧​ឆ្នាំ ដែល​គ្រប​ដណ្ដប់​ខ្លួន ទៅ​ដោយ​ឈាម។ នេះ​ជា​ការ​ថ្លែង​ឲ្យ​ដឹង​របស់​លោក វីលគីន ប្រាប់​ទៅ​ឲ្យ​បណ្ដាញ​ទូរទស្សន៍ NBCNews របស់​អាមេរិក។

បុរស​ចំណាស់ ៧១ឆ្នាំ ដែល​រស់​នៅ​ក្នុង​ក្រុង បាកប៊័រី ត្រៃ (Buckberry Trail) នៃ​រដ្ឋ គេនទូគី (Kentucky ភាគ​កណ្ដាល​ខាង​កើត​នៃ​សហរដ្ឋ​អាមេរិក) បាន​និយាយ​រៀប​រាប់​ថា៖ «នាង​តូច ចេញ​ឈាម​សឹង​តែ​ស្រោច​ខ្លួន ជា​ពិសេស​នៅ​លើ​ជើង​ទាំង​គូរ។ មុខ និង​ច្រមុះ​របស់​នាង ក៏​មាន​ប្រឡាក់​ដោយ​ឈាម​ដែរ។ នាង​ដើរ​មក​ដោយ​ជើង​ទទេរ​មួយ​ចំហៀង និង​ជើង​មួយ​ចំហៀង​ទៀត មាន​ពាក់​តែ​ស្រោម​ជើង​ម្ខាង​ប៉ុណ្ណោះ។»

«នាងបានរៀបរាប់ថា ម្ដាយនិងឪពុករបស់នាង បានស្លាប់អស់ ហើយនាងបានស្ថិតក្នុងគ្រោះថ្នាក់​យន្ដហោះ​មួយ។ នាងនិយាយទៀតថា យន្ដហោះនាពេលនោះ ស្ថិតនៅក្រោយខ្នងរបស់នាង។» លោក ឡារី វីលគីន បាន​ថ្លែងបន្ត។ ប៉ុន្តែនៅខាងក្រោយខ្នងរបស់នាងតូច មានចំងាយរហូតដល់ទៅជាង១គីឡូម៉ែត្រ ដែលធ្វើឲ្យអ្នក​ផង​កាន់តែរន្ធត់ចិត្ត នៅពេលគិតពីស្ថានភាពរបស់នាងតូច ក្នុងការដើរតែម្នាក់ឯង ទាំងព្រលប់មេឃងងឹត មករក​ការ​ជួយសង្គ្រោះ។

លោក វីលគីន បានរៀបរាប់បន្ថែមថា៖ «ខ្ញុំបានសួរនាង ពីអ្វីដែលខ្ញុំអាចជួយនាងបាន។ បន្ទាប់មក ខ្ញុំបានទៅ​យកស្រោមដៃមកពាក់ ដើម្បីលាងសម្អាតឲ្យនាង និងជាពិសេស បានទូរស័ព្ទហៅទៅ ៩១១ (លេខទូរស័ព្ទ ដើម្បីសុំការជួយសង្គ្រោះ នៅអាមេរិក)។»

នៅក្នុងសេចក្ដីប្រកាសព័ត៌មានមួយ របស់នាយនគរបាលតំបន់ លោក ឌិន ផាធើសុន (Dean Patterson) បាន​ឲ្យដឹងថា អាជ្ញាធរបានរកឃើញ គំនរបាក់បែកនៃតួយន្ដហោះ នៅក្នុងព្រៃក្បែរផ្ទះរបស់លោក ឡារី វីលគីន។ សេចក្ដីប្រកាសនោះ បានសរសេរទៀតថា៖ «ក្រុមអ្នកស៊ើបអង្កេត បានអះអាងពីមរណភាព របស់មនុស្សបួន​នាក់ នៅក្នុងហេតុការណ៍ធ្លាក់យន្ដហោះនេះ ក្នុងនោះ មានម្ដាយនិងឪពុករបស់កុមារីតូចនេះផង»។

បើតាមបណ្ដាញទូរទស្សន៍ដដែល បានឲ្យដឹងថា ម្ដាយឪពុកកុមារីតូច មានឈ្មោះអ្នកស្រី ម៉ាទី (Marty) អាយុ​៤៩ឆ្នាំ និងលោក គីមប៊័រលី ហ្គូស្ល័រ (Kimberly Gutzler) អាយុ៤៥ឆ្នាំ។ បងស្រី អាយុ៩ឆ្នាំ និងបងស្រី​ជីដូន​មួយ​អាយុ១៤ឆ្នាំ របស់នាងតូច ក៏បានស្លាប់នៅក្នុងព្រឹត្តិការណ៍នេះដូចគ្នាដែរ។

យន្ដហោះឯកជន ធុន Piper PA-34 បានហោះចេញពីក្រុង ឃីវ៉េស (Key West) ក្នុងរដ្ឋផ្លរីដ (Floride) ឆ្ពោះ​ទៅក្រុង មោល វើណុង (Mount Vernon) ក្នុងរដ្ឋអ៊ីលីណ័យ (Illinois)។ រដ្ឋការអាកាសចរណ៍ស៊ីវិលរបស់​អាមេរិក បានបញ្ជាក់ថាបានដឹងពីបញ្ហាម៉ាស៊ីន របស់យន្ដហោះ ហើយយន្ដហោះត្រូវបានអ្នកបើកបរប្ដូរទិស ទៅសុំចុះចតជាបន្ទាន់ នៅព្រលានយន្ដហោះនៃរដ្ឋ កេនទូគី មុននឹងបានដាច់ការទាក់ទង និងបានធ្លាក់​នៅ​ចំងាយ១៥គីឡូម៉ែត្រ ពីព្រលានយន្ដហោះ។

រីឯនាងតូច ដែលអត្តសញ្ញាណមិនត្រូវបានបង្ហាញនោះ ត្រូវបានបញ្ជូនទៅកាន់មន្ទីរពេទ្យមួយ ដើម្បី​ធ្វើការ​សង្គ្រោះ និងព្យាបាល ប៉ុន្តែនគរបាល បានអះអាងថា ស្ថានភាពរបស់នាង មិនស្ថិតក្នុងសភាពគ្រោះថ្នាក់ទេ។ លោក ឡារី វីលគីន បានថ្លែងថា៖ «នាងពិតជាក្លាហានណាស់។ ខ្ញុំខ្លួនឯង មិនគិតថាអាចធ្វើអញ្ចឹងបានទេ នៅអាយុ៧ឆ្នាំ។»៕