បន្ទាប់ពី AirAsia ឥណ្ឌូនេស៊ីផ្អាកជើងហោះហើរ៦១ទៀត ពីក្រុមហ៊ុនចំនួន៥
- ដោយ: សេក មនោរកុមារ អត្ថបទ៖ សេក មនោរកុមារ ([email protected]) - ប៉ារីស ថ្ងៃទី១០ មករា ២០១៥
- កែប្រែចុងក្រោយ: January 11, 2015
- ប្រធានបទ: គ្រោះអាកាស
- អត្ថបទ: មានបញ្ហា?
- មតិ-យោបល់
-
បន្ទាប់ពីគ្រោះធ្លាក់យន្ដហោះ QW8501 របស់ក្រុមហ៊ុនអាកាសចរណ៍ អ៊ែរអេសៀ ដែលមានមនុស្សជិះ១៦២នាក់ កាលពីថ្ងៃទី២៨ ខែធ្នូ ចុុងឆ្នាំ២០១៤នេះ អាជ្ញាធររបស់ប្រទេសឥណ្ឌូនេស៊ី បានរកឃើញថា ជើងហោះហើរនេះ ពីក្រុងស៊ូរ៉ាបាយ៉ា (Surabaya) ឆ្ពោះទៅប្រទេសសាំងហ្គាពួរ ត្រូវបានធ្វើអាជីវកម្មដោយមិនមានការអនុញ្ញាត ឬដោយគ្មានអាជ្ញាបណ្ណ ដោយក្រុមហ៊ុនលក់សំបុត្រថោក អ៊ែរអេសៀ។ តាំងពីពេលនោះមក ផ្លូវហោះហើរមួយនេះ ត្រូវបានដកចេញពីប្រព័ន្ធហោះហើររបស់ប្រទេសឥណ្ឌូនេស៊ី។
មិនត្រឹមតែករណីមួយនេះទេ តែអាជ្ញាធរបានប្រកាសថា ខ្លួនក៏បានធ្វើការត្រួតពិនិត្យឡើងវិញ ពីអាជ្ញាបណ្ណទាំងឡាយដែលបានផ្ដល់ទៅឲ្យក្រុមហ៊ុនអាកាសចរណ៍ទាំងអស់ ដែលកំពុងធ្វើដំណើរការក្នុងប្រទេស។ ក្រុមហ៊ុនចំនួន៥ ដែលមានជើងហោះហើរចំនួន៦១ ត្រូវបានរកឃើញថាបានភ្ជាប់ជើងហោះហើរទាំងគ្មានការអនុញ្ញាត។ ហើយពីក្នុងនោះ ក្រុមហ៊ុន ហ្គារូដា ដែលជាក្រុមហ៊ុនអាកាសចរណ៍ជាតិរបស់ប្រទេសឥណ្ឌូនេស៊ី ត្រូវបានរកឃើញថា បានរំលោភជើងហោះហើរចំនួនបួន និងក្រុមហ៊ុនលក់សំបុត្រថោក ឡាយអនអ៊ែរ បានរំលោភរហូតដល់ទៅ ៣៥ជើងហោះហើរ។ ចំពោះអ៊ែរអេសៀ វិញ មិនត្រូវបានអាជ្ញាធររកឃើញករណីផ្សេង ក្រៅពីយន្ដហោះ QW8501 នោះឡើយ។
លោក អ៊ីញ៉ាស៊ីស ចូណាន់ (Ignasius Jonan) រដ្ឋមន្ត្រីអមនាគមន៍ បានថ្លែងបញ្ជាក់ប្រាប់អ្នកសារព័ត៌មានថា បុគ្គលិករដ្ឋការចំនួន១១នាក់ បានរងការពិន័យទាក់ទងនឹងទង្វើរាយមាយរបស់ពួកគេ និងត្រូវធ្វើកិច្ចសន្យាថា ករណីទាំងនេះ នឹងមិនកើតមានទៀតឡើយ។ លោក ចូណាន់ បានបន្ថែមទៀតថា៖ «ចេញពីការត្រួតពិនិត្យនេះ យើងបានបញ្ជាទៅនាយកដ្ឋានគមនាគមន៍ផ្លូវអាកាស ឲ្យបង្កើតការឃ្លាំមើល និងការអនុវត្តន៍ច្បាប់ដែលទាក់ទងនឹងអាកាសចរណ៍ស៊ីវិល។ ត្រូវតែមានតម្លាភាព ទៅលើប្រព័ន្ធហោះហើរដែលមានលក្ខណៈទៀតទាត់ទាំងអស់នេះ។»
ការប្រើប្រាស់គមនាគមន៍ផ្លូវអាកាស ក្នុងប្រទេសឥណ្ឌូនេស៊ី បានកើតឡើងយ៉ាងខ្លាំង នៅក្នុងប៉ុន្មានឆ្នាំចុងក្រោយនេះ។ ឧទាហរណ៍ ដូចយ៉ាងក្រុមហ៊ុន ឡាយអនអ៊ែរ បានទិញចូលនូវយន្ដហោះជាច្រើនគ្រឿងទៀត ដើម្បីបំពេញតម្រូវការរបស់អ្នកដំណើរ ដែលបានដូរត្រឡប់មកប្រើប្រាស់មធ្យោបាយបែបនេះវិញ ក្នុងការធ្វើដំណើររវាងពីកោះមួយទៅកោះមួយ នៃប្រទេសដែលស្ថិតលើទឹក និងមានកោះដល់ទៅជាង១៧០០០៕