«ជួប​គ្នា​ដើរ​ប្រឆាំង​ភេវរកម្ម និង​ឧទ្ទិស​ទៅ​ជន​រង​គ្រោះ» ជា​ទិវា​ប្រវត្តិសាស្ត្រ​ថ្មី​របស់​បារាំង

មនុស្សរវាងពី១,៣ ទៅ១,៥លាននាក់ បានប្រមូលគ្នាមក«ដើរដើម្បីសន្តិភាព ប្រឆាំងភេវរកម្ម» កណ្ដាលរដ្ឋធានីប៉ារីស កាលពីរសៀលថ្ងៃអាទិត្យ។ បើគិតរួមទាំងនៅតាមបណ្ដាខេត្តផង ក្រុមមនុស្សបានចុះមកដើរតាមដងផ្លូវ ប្រមាណ​ជា​ជិត​៤លាន​នាក់ ដើម្បីប្រឆាំងនឹងការសំឡុតគម្រាមកំហែង បង្កឲ្យឡើងដោយក្រុមភេវរជន និងឧទ្ធិសទៅ​ដល់​ជន​រង​គ្រោះ​ទាំង ១៧នាក់ នឹងអំពើភេវរកម្ម ក្នុងប៉ុន្មានថ្ងៃចុងក្រោយ។
Loading...
  • ដោយ: ដារី អត្ថបទ៖ ដាវី ([email protected]) - ប៉ារីស​ ថ្ងៃទី១២​ មករា ២០១៥
  • កែប្រែចុងក្រោយ: January 12, 2015
  • ប្រធានបទ: ភេវរកម្ម
  • អត្ថបទ: មានបញ្ហា?
  • មតិ-យោបល់

កណ្ដាល​រដ្ឋធានី​ប៉ារីស ក្រុម​មនុស្ស​ទាំង​នោះ​បាន​ចាប់​ផ្ដើម​មក​ជួប​ជុំ​គ្នា​តាំង​ពី​ថ្ងៃ​ត្រង់ ថ្ងៃ​ទី១១ ខែ​មករា ប៉ុន្តែ​ការ​ចេញ​ដំណើរ​ពី​កន្លែង​ជួប​ជុំ Place de la Républiqu ឆ្ពោះ​ទៅ​កាន់​ទី​លាន​មួយ​ទៀតឈ្មោះ Place de la Nation ត្រូវ​បាន​ធ្វើ​នៅ​ម៉ោង​១៥​និង​៣០​នាទី​ប៉ុណ្ណោះ បន្ទាប់​ពី​ប្រធានាធិបតី​បារាំង លោក ហ្វ្រង់ស៊័រ ហូឡង់ (François Hollande) និង​មេ​ដឹកនាំ​ច្រើន​សិប​នាក់​ផ្សេង​ទៀត បាន​ធ្វើ​ដំណើរ​មក​ដល់​ទី​ណាត់​ប្រជុំ​គ្នា​នោះ។ ការ​ជួប​ជុំ​គ្នា នៅ​តែ​ប្រមូល​គ្នា​កាន់​តែ​ច្រើន​ឡើងៗ ខណៈ​រាត្រី​កាល​កាន់​តែ​ឈាន​មក​ដល់​ក៏​ដោយ។ ប្រសិន​ជា​គេ​មើល​រូបភាព​ពី​លើ​មេឃ​មក​វិញ រាប់​ចាប់​តាំង​ពី​ផ្នែក​ខាង​ជើង មក​ទល់​នឹង​ផ្នែក​ខាង​កើត គេ​នឹង​ឃើញ​ហ្វូង​មនុស្ស​ត្រៀម​ត្រា បាន​កាន់​កាប់​ដង​ផ្លូវ​នានា​នៃ​រដ្ឋធានី​ប៉ារីស​ដ៏​ល្បី គ្រប់​ច្រក​ល្ហក។

ចំនួនអ្នកចូលរួម...

ក្រសួងមហាផ្ទៃបារាំងបានថ្លែងថា ខ្លួនមិនអាចរាប់ចំនួនមនុស្សមកចូលរួមទាំងអស់នេះ បានទេ។ ប៉ុន្តែបើ​តាម​អ្នករៀបចំការជួបប្រជុំគ្នានេះ បានឲ្យដឹងថាអ្នកមកចូលរួមមានប្រមាណពី១,៣ទៅ១,៥លាននាក់។ បើសរុប​ចំនួនអ្នកចូលរួម ដែលត្រូវបានរៀបចំធ្វើនៅតាមបណ្ដាក្រុងធំៗផ្សេងទៀត នៃខេត្តនានាក្នុងប្រទេសបារាំង មានរហូតដល់ទៅ៣,៧លាននាក់។

ទិសដៅ...

ដើរពីកន្លែងមកជួបជុំ លើទីលានសាធារណរដ្ឋ ឆ្ពោះទៅទីលានមួយទៀតឈ្មោះ ណាស្យ៉ុង ដើម្បីបង្ហាញពី​ចំណង​សាមគ្គីភាពនៃប្រជាជាតិមួយ ប្រឆាំងនឹងអំពើភេរវនិយម និងចូលរួមមរណទុក្ខជាមួយជនរងគ្រោះ។ ភាសារបស់អ្នកទៅចូលរួម មានតែមួយប៉ុណ្ណោះ ដែលនិយាយចេញពីមាត់ព្រមៗគ្នា និងនៅលើផ្ទាំងក្រដាស​តូចធំ នោះគឺ «ខ្ញុំជាឆារលី (Je suis Charlie)» ដែលឆារលីតំណាងឲ្យទស្សនាវដ្ដីបារាំង ឬតំណាងឲ្យសិទ្ធិនៃ​ការបញ្ចេញមតិ របស់ពលរដ្ឋនៃប្រទេសបស្ចឹមលោក។ អ្នកខ្លះទៀត បានយកប៊ិច ឬខ្មៅដៃមកកាន់ ហើយតែង​លើកឡើងបង្ហាញគេឯង បញ្ជាក់អះអាងពីសេរីភាពនៃការសរសេរ ឬការគូរគំនូរ មិនអាចឲ្យនរណាមកគម្រាម​បានឡើយ។

ប៉ុន្តែ បើសិនជាការជួបជុំនេះ មានលក្ខណៈស្ងប់ស្ងៀមក្នុងន័យចូលរួមមរណទុក្ខ និងឧទ្ទិសទៅជនរងគ្រោះ​ក៏ដោយ តែយូរៗម្ដង ការស្រែកច្រៀងចម្រៀងភ្លេងជាតិបារាំង ឬក៏ការទះដៃអបអរក្រុមកងកម្លាំងនគរបាល ក៏កើតមានសឹងមិនដាច់ពេល។ ក្រុមកងកម្លាំងនគរបាល ដែលបានអនុវត្តន៍តួនាទីរបស់ខ្លួន ក្នុងការការពារ​សន្តិសុខសណ្ដាប់ធ្នាប់ ប៉ុន្តែបានពលីបីនាក់ នៅក្នុងហេតុការណ៍នៃអំពើភេវរកម្ម។ ពលរដ្ឋខ្លះបានស្ទុះរត់​ទៅ​អោបកងកម្លាំងនគរបាល ដែលកំពុងរៀបចំសណ្ដាប់ធ្នាប់នៅតាមដងផ្លូវ ខណៈឯពលរដ្ឋមួយចំនួនទៀត បាន​យកផ្កាមកហុចដល់ដៃកងកម្លាំងទាំងនោះ។

មនុស្សជាច្រើន បានសម្ដែងការរំភើប នឹងការប្រមូលផ្ដុំរបស់មនុស្សទាំងនេះ។ ក្នុងចិត្តគេម្នាក់ៗ បានគិតរួចជា​ស្រេច​ហើយ ថា«រួមគ្នាជាកម្លាំង» ដើម្បីបង្ហាញទៅក្រុមភេវរជនថា ពិភពលោកនេះមិនត្រូវបាន ដាក់ឲ្យស្ថិត​ក្រោមការបំបិទសិទ្ធិសេរីភាព ឬការគម្រាមកំហែងអ្វីឡើយ។ កញ្ញា ឡ័រ (Laure) ស្ថាបត្យករមួយរូបអាយុ​៣៥ឆ្នាំ ដែល​មានកាន់ក្រដាស «Je suis Charlie» នៅនឹងដៃ បាននិយាយថា៖ «ខ្ញុំមិនប្រាកដទេ ថាទិវា​ជួបជុំ​គ្នានេះ អាច​ដាស់ចលនាប្រជាជាតិទាំងមូលបាន ខណៈនៅមានមនុស្សជាច្រើន អង្គុយនៅក្នុង​ផ្ទះ​សុខ​ចិត្ត​​អើត​មើល​តាម​បង្អួច ហាក់មិនបានខ្វល់ជាមួយនឹងយើងទេ។ ប៉ុន្តែហ្វូងមនុស្សនៅថ្ងៃនេះ វាមានភាព​អស្ចារ្យ​ណាស់​ច៎ា។»  ចំណែកឯតារាដ៏ល្បីមួយរូបរបស់បារាំង ដែលបានទៅចូលរួមសកម្មភាពនេះដែរ បាន​​ថ្លែង​​ឡើង ដោយ​មាន​ពាក្យកំប្លុកកំប្លែងថា៖ «ខ្ញុំរកពាក្យមកនិយាយមិនបានទេ ពីការជួបជុំដ៏អស្ចារ្យនេះ ព្រោះ​វា​ជា​​លើក​​ទី​​មួយ​​របស់​ខ្ញុំហើយ ដែលខ្ញុំដើរបាន៣០ម៉ែត្រ ក្នុងរយៈពេល១ម៉ោង»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...